Հայաստանի առաջնությունում

Հրապարակվել է Հեղինակ` Hayary
Ֆուտբոլի ազգային առաջնությունում ավարտվեց 26-րդ փուլը:
                     Խ  Հ   Ո  Պ     Գ         Մ
Փյունիկ       26  18  5  3   57-12     59
Միկա           26  17  4  5   57-29     55
Ուլիս            26  14  5  7   41-21    47
Բանանց       26  13  4  9  37-25     43  
Գանձասար  26  11  2 13  22-42    35
Շիրակ          26   5   8 13  22-48    23
Կիլիկիա       26   5   4 17  20-48    19
Արարատ      26   1  8 17  15-49     11

Առաջնության ռմբարկուներն են
Արթուր Քոչարյանը («Ուլիս»)՝ 14 գնդակ, Բոտի Դեմելը («Միկա»)՝ 13 գնդակ, Հենրիխ Մխիթարյանը («Փյունիկ») եւ Սամվել Մելքոնյանը («Բանանց»)՝ 11-ական գնդակ, Արամ Ոսկանյանը («Միկա»)՝ 10 գնդակ, Արտյոմ Ադամյանը («Ուլիս») եւ Արսեն Ավետիսյանը («Գանձասար»)՝ 9-ական գնդակ:

Խայտառակ պարտություններ
Հայաստանի կանանց եւ աղջիկների ֆուտբոլի հավաքականները շարունակում են խայտառակ կերպով հանդես գալ միջազգային ասպարեզում: Կանանց մինչեւ 17 տարեկանների հավաքականը Սերբիայում ընթացող Եվրոպայի առաջնության որակավորման 1-ին փուլում Ռուսաստանի թիմին 0:19 հաշվով պարտվելուց հետո զիջեց Իսպանիային՝ 0:21 հաշվով: Իսկ Հայաստանի կանանց ազգային հավաքականն աշխարհի 2011թ. առաջնության ընտրական խաղում Երեւանում զիջեց Իտալիայի թիմին՝ 0:8, իսկ Սլովենիային` 1:5 հաշիվներով: Այս միակ գոլը աշխարհի առաջնությունում խփած մեր ֆուտբոլիստուհիների առաջին գնդակն է, որը խփեց Քրիստինե Մանգասարյանը՝ 11 մ հարվածով: Հիշեցնենք, որ Ֆինլանդիային մերոնք պարտվել էին 0:4 հաշվով: Նման խաղով մեր կանանց ֆուտբոլը չի կարող հեռանկար ունենալ:

Ադրբեջանի դրոշները` աղբամաններում
Ադրբեջանական լրատվամիջոցները տեղեկություն են տարածել՝ կապված իրենց երկրի դրոշի հանդեպ Թուրքիա-Հայաստան ֆուտբոլային խաղում ցուցաբերած վերաբերմունքի հետ: Սեփական արժանապատվությունը ոտնահարած տեղեկություններից բացի հաղորդել են այն մասին, որ Թուրքիայում ադրբեջանական դրոշների հանդեպ անհարգալից վերաբերմունքի համար ընթացող հետաքննությունն արդեն արդյունք է տվել: Այս մասին Բուրսայի քաղաքապետ Շահաբեթին Հարպուտն է հայտնել «D» հեռուստաալիքին: Հիշեցնենք, որ հիշյալ խաղում ադրբեջանական դրոշները մարզադաշտում հայտնվելու փոխարեն… հայտնվել էին աղբամաններում եւ զուգարաններում: Եվ ահա, ադրբեջանական կողմի բողոքներից հետո Թուրքիայում սկսել են պատժել այն ոստիկաններին, ովքեր «անարգել» են Ադրբեջանի դրոշը:

Աշխարհում 58-րդն ենք
 2008թ. օլիմպիական խաղերից հետո կայացած աշխարհի երիտասարդական եւ պատանեկան առաջնություններում ՀՀ ներկայացուցիչներն առայժմ չեն կարողացել նվաճել ոսկե մեդալ:
Մեր պատանի մարզիկ-մարզուհիներն այդ մրցումներում 1 անգամ դարձել են արծաթե մեդալակիր, 7 անգամ՝ բրոնզե: Այդ ցուցանիշով աշխարհում զբաղեցնում ենք 58-րդ հորիզոնականը:
Աշխարհի երիտասարդական եւ պատանեկան առաջնություններում առ այսօր բոլորից հաջող հանդես են եկել Ռուսաստանի ներկայացուցիչները՝ 83 մրցանակ (32 ոսկի, 18 արծաթ, 33 բրոնզ):
Ներկայացնում ենք նախկին ԽՍՀՄ-ի հանրապետությունների ցուցանիշները.
                      Ո     Ա     Բ   Ընդ.
1 . Ռուսաստան     32   18   33   83
15. Ուկրաինա        5     6   11    22
19. Ադրբեջան         3     3     3     9
22. Ուզբեկստան    3     0     4     7
28. Բելառուս          2     1     5     8
52. Ղազախստան   0     3    2     5
54. Վրաստան         0     2    2     4
54. Մոլդովա           0     2    2     4
56.  Լատվիա          0     2    1     3
58. Հայաստան       0    1     7     8
60. Լիտվա              0     1     3    4
66. Տաջիկստան     0     1     0    1
74. Ղրղըզստան      0     0    1    1
74. Էստոնիա           0     0    1    1
-… Թուրքմենստան 0     0    0    0

Ավարտեցին առատ ավարով
Վանաձորում կայացած ազատ ոճի ըմբշամարտի միջազգային մրցաշարում, որը կրում է Ստեփան Սարգսյանի անունը, հայ մարզիկները 11 մրցանակ են նվաճել: Մինչեւ 66 եւ 84 կգ քաշային կարգերում հաղթողի կոչումը նվաճել են Ժիրայր Հովհաննիսյանը եւ Հայաստանի դրոշի ներքո հանդես եկող Վադիմ Լալիեւը: Արծաթե մրցանակակիրներ են դարձել Վալտեր Մարգարյանը՝ մինչեւ 60 կգ քաշային կարգում, ինչպես նաեւ 66 եւ 96 կգ քաշային Համազասպ Հովսեփյանն ու Էդգար Ենոքյանը: Մրցանակային 3-րդ տեղն են զբաղեցրել 6 մարզիկներ:

Եվրոպայում շախմատային մրցապայքար է
Սերբիայի Նովի Սադ քաղաքում ընթանում է շախմատի Եվրոպայի տղամարդկանց 17-րդ եւ կանանց 8-րդ թիմային առաջնությունը: Հայաստանի տղամարդկանց հավաքականում են Լեւոն Արոնյանը, Վլադիմիր Հակոբյանը, Գաբրիել Սարգսյանը, Արման Փաշիկյանը եւ Տիգրան Պետրոսյանը, իսկ կանանց թիմում ընդգրկված են Էլինա Դանիելյանը, Լիլիթ Մկրտչյանը, Լիլիթ Գալոյանը եւ Սիրանուշ Անդրեասյանը: Տղամարդկանց մեր հավաքականը միջին վարկանիշով (2703) 38 մասնակիցների մեջ զիջում է միայն Ռուսաստանի (2742) եւ Ադրբեջանի (2721) թիմերին եւ 3-րդն է: Կանանց մեր ընտրանին 5-րդ միջին ցուցանիշն ունի (2398)՝ Ռուսաստանի (2500), Վրաստանի (2491), Ուկրաինայի (2463) եւ Լեհաստանի (2429) հավաքականներից հետո:
Տղամարդկանց հավաքականը 7 փուլից հետո 11 միավորով առաջատարների խմբում է՝ Ռուսաստանիի եւ Ադրբեջանի թիմերի հետ: Կանանց հավաքականը 10 միավորով 3-5-րդ տեղում է, 12-ական միավորով առաջատար են Ռուսաստանի եւ Վրաստանի հավաքականները:

Առաջատարների թվում է
Գրոսմայստեր Ավետիք Գրիգորյանը եւ ՖԻԴԵ-ի վարպետ Աննա Հայրապետյանը մասնակցում են Արգենտինայում ընթացող մինչեւ 20 տարեկանների շախմատի աշխարհի առաջնությանը: 13 փուլից բաղկացած մրցաշարում կայացել են 7-րդ փուլի հանդիպումները: Ա. Գրիգորյանը 5 միավոր ունի եւ բաժանում է 5-11-րդ տեղերը: Աղյուսակը 6 միավորով գլխավորում է Բելառուսի ներկայացուցիչ Սերգեյ Ժիգալկոն:  

Արսեն Պետրոսյան
«Լուսանցք» թիվ 37 (123), 2009թ.

Այս գրառումը հրապարակվել է Հ.Ա.Մ., Հոդվածներ խորագրում։ Էջանշեք մշտական հղումը։