Ո՛չ ՁԻԱՀ-ի «ժանտախտին»

Անի Մարության

Հաշմանդամ առողջները

Դեկտեմբերի 3-ին հաշմանդամների միջազգային օրն է: Նոյեմբերի 15-ից դեկտեմբերի 15-ը հաշմանդամների պաշտպանության միամսյակ է հայտարարված:
Բայց դժվար է այսօր ասել, թե ով է հաշմանդամ, ով` ոչ: Հաշմանդամ է նա, ով սայլակով է, բայց փայլուն երաժշտություն է հնարում, հիանալի երգեր գրում, թե՞ նա, ով առանց սայլակի է, ոտք ու ձեռքով, բայց անառողջ դատողություններ ունի, սիրում է անբնականը: Հաշմանդամ է նա, ով կու՞յր է, բայց մտքի թռիչք ունի, թե՞ նա, ով կույր չէ, բայց ոչ միայն սրատես չէ, այլեւ քթից այն կողմ բան չի տեսնում:
Առո՞ղջ են նրանք, ովքեր դեկտեմբերի 3-ին Երեւանի մարզահամերգային համալիրում «շոու բիզնես»-ային «աստղերի» համերգ են կազմակերպել, որ ոչ այլ ինչ է, քան մղձավանջային աղմկոտ երաժշտությամբ մարդակապիկների ելույթ: Առո՞ղջ են այդ կարգի համերգներից հաճույք ստացողները, մնում է հարցական: Այս մարդուկներ-երգողները իրենց ոռնոցներն ու անիմաստ բառաշարադրանքները իբր մշակույթ են ներկայացնում` անարգելով այն ամենը, ինչը ընդհանրապես մշակույթ է կոչվում:
Առո՞ղջ են մեր այն հարուստ գործիչները, ովքեր այս ոռնացողներին Երեւան են հրավիրում ու մատուցում սերնդին, մնում է հարցական: Բայց որի պատասխանը բոլորս գիտենք: Առողջներս:
Հ.Գ. – Երեւանի տարբեր վայրերում անցկացվեցին միջոցառումներ՝ հաշմանդամների միջազգային օրվա կապակցությամբ:

Աշոտ Բադալյան

Ամանորին ընդառաջ՝ գների աճ

11 ամիսների ընթացքում գներն աճել են 4,5%-ով: ՀՀ Ազգային վիճակագրական ծառայության տվյալներով` 2009թ. հունվար-նոյեմբերին սպառողական գների միջին ամսական հավելաճը կազմել է 0,4%, ինչը 0,1 տոկոսային կետով ցածր է նախորդ տարվա նույն ժամանակահատվածի համապատասխան ցուցանիշից: Տարվա կտրվածքով գնաճը 4,6% է կազմել:
Պարենային ապրանքների շուկայում նախորդ ամսվա համեմատ գնաճը եղել է 2%, ինչի վրա իր անմիջական ազդեցությունն է թողել շաքարավազի, կենդանական եւ բուսական յուղերի, բանջարեղենի, ձկնամթերքի, մրգի 2-13.5% գնաճը: Ոչ պարենային ապրանքների շուկայում նախորդ ամսվա համեմատ գրանցվել է 1,4% գնաճ, ինչի վրա իր անմիջական ազդեցությունն է թողել բենզինի եւ դիզելային վառելիքի՝ համապատասխանաբար 4,5% եւ 6,5% գնաճը:
Մատուցված ծառայությունների ոլորտում այս տարվա նոյեմբերին հոկտեմբերի համեմատ արձանագրվել է սակագների 0,1% հավելաճ: Ըստ ԱՎԾ տեղեկատվության, տրանսպորտի եւ մշակույթի ոլորտի ծառայությունների սակագները նշված ժամանակահատվածում աճել են, համապատասխանաբար, 0,4% եւ 1,4%-ով:

Արտակ Հայոցյան

Ճգնաժամը կասեցրել է «համակարգչային առաջընթացը»

ՀՀ պաշտոնյաները համաշխարհային ճգնաժամի սկզբնական մասում հավաստիացնում էին, որ այն մեր երկրի տնտեսության վրա ոչ մի ազդեցություն չի ունենա: Ժողովրդի մեջ նույնիսկ զրույցներ էր տարածվում, թե «Հայաստանն այնքան չկա երեւի, որ համաշխարհային ճգնաժամն ազդեցություն ունենա…»: Պաշտոնյաներից ոմանք էլ կես լուրջ, կես կատակ արձագանքում էին, թե՝ «Լավ է, որ Հայաստանը ինտեգրված չէ միջազգային տնտեսությանը, եւ ճգնաժամը ոչ մի կերպ չի ազդի երկրի վիճակի վրա…»: Սակայն, ճգնաժամը ոչ միայն ազդեց ՀՀ ընդհանուր վիճակին, այլեւ թելադրեց ու մղեց մեզ նոր վարկային պարտքեր կուտակելու եւ երկիրը օտար փողերից վերստին կախման մեջ գցելու: Մեր կառավարության ժամանակակից անդամները ոչ միայն չեն կարողանում կարգավորել տնտեսության վիճակը, այլեւ չեն կարողանում ապահովել նույնիսկ «եվրաարժեքներին համահունչ» համակարգչային «առաջընթացը» մեր երկրում:  
Ըստ մաքսային հսկողության վարչության պետ Գեւորգ Սաղոյանի, 2008թ. ՀՀ ներմուծված համակարգչային տեխնիկան ընդհանուր մաքսային արժեքով կազմում է 11,5 մլրդ. դրամ: Այս տարվա 2009թ. 10 ամիսներին ներմուծվել է 9,4 մլրդ. դրամ մաքսային արժողությամբ համակարգչային տեխնիկա: Եթե համամասնորեն 10 ամսվա վերածենք այս տվյալները, ապա ստացվում է համարյա հավասար պատկեր. անցյալ տարվա 10 ամիսների ընթացքում ներմուծվել է 9,5 մլրդ. դրամի մաքսային արժողությամբ համակարգչային տեխնիկա, իսկ այս տարվա 10 ամիսների ընթացքում՝ 9,4 մլրդ. դրամի:
Չնայած սրան, Գ. Սաղոյանը հայտնել է, որ ճգնաժամը բացասական է ազդել նաեւ այդ ցուցանիշների վրա. «Այս ոլորտը շատ արագ է զարգանում եւ դրա ներմուծումների աճը պիտի ավելի մեծ լիներ, սակայն ճգնաժամի հետեւանքով, ըստ երեւույթին ստացվել է համարյա նույն թիվը»:

Գոհար Վանեսյան

Բյուջեի նախագծում փոփոխություններ եղան

Կառավարությունը 2010թ. բյուջեի նախագիծը ընթացիկ տարվա հոկտեմբերի 2-ին ներկայացրեց ԱԺ: Քննարկումների արդյունքում փոփոխություններ եղան: Կառավարությունը երեկ քննարկեց օրինագծի լրամշակված տարբերակը: Ֆինանսների նախարար Տիգրան Դավթյանը ներկայացրեց փոփոխված ցուցանիշները:
Ըստ այդմ, 2010թ. բյուջեի նախագծում եկամուտները դարձան 742 մլրդ. դրամ: Համեմատության համար նշենք, որ նախնական տարբերակը 677 մլրդ. դրամ էր: Այսինքն` եկամուտներն ավելացան 65 մլրդ. դրամով: 742 մլրդ. դրամից 570 մլրդ.-ը հարկային եկամուտներն են: Այսպիսով հարկեր / ՀՆԱ հարաբերակցությունը դարձավ 17,7%: 75 մլրդ. դրամով ավելացան ծախսերը` դառնալով 935 մլրդ.: Բայցեւ ավելացավ բյուջեի պակասորդը` 183 մլրդ. դրամից դառնալով 193 մլրդ. դրամ: Սա  կազմում է ՀՆԱ-ի 6%-ը: Ըստ Տ. Դավթյանի, այս 6%-ը չնայած դարձյալ մեծ ցուցանիշ է, բայց 1,5%-ով ցածր է այս տարվա սպասողական ցուցանիշից:
Ի դեպ, 65 մլրդ. դրամով ավելացած եկամուտներից 18 մլրդ.-ը կուղղվի ավելացված արժեքի հարկի վերադարձման համար: Սրանով գործադիրը մտադիր է աջակցել արտահանողներին: 1,7 մլրդ.-ը կուղղվի ավանդների վերադարձմանը: 5 մլրդ. դրամով կավելանան դպրոցաշինությանն ուղղված ծախսերը:
Թերեւս այս փոփոխություններում կարեւոր մի բան է եղել.  ավելանալու են նաեւ պաշտպանությանն ուղղված ծախսերը` 19.4 մլրդ. դրամով: Սա, ֆինանսների նախարարի հավաստմամբ, արվել է նաեւ պատգամավորների արձագանքները հաշվի առնելով: Ճիշտ է, 19,4-ի ավելացումը պաշտպանության համար մի բան չէ, բայց, ինչպես ասում են, վռիկը հեչից միշտ ավելի լավ է:

Սեփ. լրատվություն

«Լուսանցք» թիվ 42 (128), 2009թ.