Անհեքիաթ ամանոր

Աշոտ  Բադալյան

Կորցրե՞լ ես անձնագիրդ, ավելի շատ վճարիր

Գործադիրը երեկ հրավիրեց իր առաջին նիստը եւ, ի թիվս այլ խնդիրների, քննարկեց մի հարց` անձնագրերը կարճ ժամկետում տրամադրելուն վերաբերող:
Ոստիկանությունը ծառայությունների վճարովի մատուցման պայմանագրի հիման վրա անձնագիր կարող է տալ կամ փոխանակել ավելի կարճ ժամկետներում: Ներկայացնում ենք այդ ծառայությունների վճարների չափերը:
ՀՀ քաղաքացու կորած անձնագրի փոխարեն նոր անձնագիր տալը 1 աշխատանքային օրվա ընթացքում արժե  60 հազար դրամ: Կորած անձնագրի փոխարեն նոր անձնագիր տալը` 3-րդ աշխատանքային օրը, արժե 50 հազար դրամ: Կորած անձնագրի փոխարեն նոր անձնագիր տալը` 5-րդ աշխատանքային օրը, արժե 40 հազար դրամ:
Ինչ վերաբերում է անձնագիր տալուն կամ փոխանակելուն (երբ անձնագիրը չի կորել). ՀՀ քաղաքացու անձնագիր տալը կամ փոխանակելը` 1 աշխատանքային օրվա ընթացքում արժե 20 հազար դրամ: Անձնագիր տալը կամ փոխանակելը` 3-րդ աշխատանքային օրը արժե 10 հազար դրամ:
Ոստիկանապետ Ալիկ Սարգսյանը այս փոփոխությունը կատարելու անհրաժեշտությունը պայմանավորում է հետեւյալ հանգամանքով. վերջին ամիսներին կտրուկ աճել է կորստյան գործերով ՀՀ ոստիկանության անձնագրային ծառայություններ դիմող այն քաղաքացիների թիվը, ովքեր ցանկություն ունեն ավելի կարճ ժամկետում ստանալ նոր անձնագրերը: Քաղաքացիների նման դիմումները չեն բավարարվել, քանի որ ՀՀ կառավարության 25.12.98թ. թիվ 821 որոշմամբ հաստատված կարգի 15-րդ կետի 2-րդ պարբերությամբ սահմանված են կորած անձնագրի փոխարեն նորը տալու ավելի ուշ ժամկետներ /կորած անձնագրի փոխարեն նորը տրվում է 1-ամսյա ժամկետում, իսկ լրացուցիչ ուսումնասիրություն եւ ստուգում չպահանջող դեպքերում` 15-օրյա ժամկետում, իսկ նախատեսվող փոփոխությունների համաձայն կորած անձնագրի փոխարեն նորը տրվում է դիմումը ստանալու 15-րդ օրը/:
Այսինքն` 5-օրյա ժամկետը չի վերաբերում անձնագրերի կորստյան դեպքերին: ՀՀ կառավարության 2008 թվականի դեկտեմբերի 11-ի համապատասխան որոշման մեջ փոփոխություն կատարելով` հնարավոր կլինի ՀՀ քաղաքացիների կորած անձնագրերի փոխարեն, վերջիններիս ցանկությամբ, նորերը տալ 1-օրյա, 3-օրյա կամ 5-օրյա ժամկետներում` վճարովի ծառայության մատուցման պայմանագրի հիման վրա:

Աստղինե  Քարամյան

500 մլն-ի ջանը սաղ լինի

Վարչապետ Տիգրան Սարգսյանը կառավարության երեկվա նիստում նախարարներին հանձնարարեց տարվա ընթացքում իրականացվելիք երեք կարեւորագույն ծրագրեր ներկայացնել, որոնք որոշակի ոլորտներում պետք է դրական տեղաշարժ ապահովեն:
Կառավարությունը քննարկեց Հյուսիս-հարավ ճանապարհային միջանցքի ներդրումային ծրագրին հավանություն տալու մասին հարցը: Ըստ էկոնոմիկայի նախարար Ներսես Երիցյանի, «Հյուսիս-հարավ  ճանապարհային միջանցքի ներդրումային ծրագիրը» խոշոր ենթակառուցվածքային ծրագիր է, որի նպատակն է միջազգային չափանիշներին բավարարող տրանսպորտային ուղիներով երկրի հարավը կապել հյուսիսի հետ եւ ապահովել ելքը դեպի միջազգային շուկաներ:
Ասիական զարգացման բանկը, որ կլինի ծրագրի հիմնական ֆինանսավորողներից մեկը, ՀՀ կառավարությանը կհատկացնի 500 միլիոն դոլարի վարկ, որից 60 մլն-ն` արտոնյալ պայմաններով: Ի դեպ, այս բանկը ֆինանսավորում է նաեւ Ադրբեջան-Վրաստան միջանցքի ադրբեջանական հատվածը, ինչպես նաեւ Փոթի-Բաթումի-Սարպի ճանապարհային միջանցքը:

Սեփ. լրատվություն

«Լուսանցք» թիվ 1 (132), 2010թ.