Ինչքան է անհրաժեշտ ԱԷԿ-ը շահագործումից դուրս բերելու համար

Աստղինե Քարամյան

Թուրքիան նոր ՀԱԷԿ-ի կառուցմանը մասնակցել չի կարող

Հայաստանում նոր միջուկային էներգաբլոկի կառուցման ծրագրի իրականացման նպատակով կառավարման ծառայությունների ձեռք բերման համար պետական գնումների գործակալության հայտարարած մրցույթի արդյունքում հաղթեց Worley Parsons միջազգային կոնսորցիումը: ՀՀ կառավարությունն ու «Worley Parsons»-ը արդեն կնքել են 459.7 մլն դոլարի պայմանագիր: Դրանում ներառված են նախագծային, վերահսկողական, խորհրդատվական ծառայություններ եւ այլն:
Շրջանառող այն լուրերը, թե Թուրքիան կմասնակցի հայկական նոր միջուկային էներգաբլոկի կառուցմանը, իրականությանը չեն համապատասխանում:   Թուրքիան նոր ՀԱԷԿ-ի ծրագրում մասնակցություն ունենալ չի կարող՝ հետեւյալ պարզ պատճառով. բանն այն է, որ, ինչպես բացատրում են մասնագետները, ատոմակայան կառուցելը սովորական արտադրամասի շենք-շինություն սարքելու պես մի մի բան չէ: Եվ ատոմակայանը այն օբյեկտն է, որ անպայման պետք է կառուցվի ատոմային էներգետիկայի բնագավառում տարիների մասնագիտական, այն էլ հաջողված փորձ ունեցողը: Եվ այս ամենը ՄԱԳԱՏԵ-ի պահանջներից է: Իսկ Թուրքիան ատոմային էներգետիկայի դպրոց չունի: Թուրքիայի՝ մեր նոր ԱԷԿ-ի կառուցմանը մասնակցության մասին լուրերը վերաբերում են միայն ֆինանսական ներդրումներին: Սակայն, հազիվ թե ֆինանսական մասնակցությունը լինի: Եթե Թուրքիան ուզում է ինքն ատոմակայան ունենալ, դժվար այնքան լրացուցիչ գումարներ ճարի, որ մասնակցի հայկական միջուկային նոր էներգաբլոկի կառուցմանը:
 
Սեփ. լրատվություն

Արդյունաբերական աճով ԱՊՀ-ում 4-րդն ենք

2010թ. առաջին 2 ամսիների ընթացքում նախորդ տարվա նույն ժամանակաշրջանի համեմատ ՀՀ արդյունաբերական արտադրանքի ծավալներն ավելացել են 9,4%-ով:
Այս ցուցանիշով Հայաստանն ԱՊՀ երկրների շարքում 4-րդն է: Արդյունքերը հրապարակել է ԱՊՀ միջպետական վիճակագրական ծառայությունը:
Արդյունաբերության զարգացման ցուցանիշով 1-ին տեղում է Ղրղզստանը՝ 205,8%, այնուհետեւ գալիս են Տաջիկստանն ու Ղազախստանը՝ համապատասխանաբար՝ 15% եւ 10,4%: Ուզբեկստանում այդ ցուցանիշը կազմել է 9%, Ուկրաինայում՝ 8,8%, Ադրբեջանում՝ 6,7%: Ռուսաստանում այդ 2 ամիսներին արդյունաբերությունն աճել է 5,8%-ով՝ զբաղեցնելով ցուցակի 8-րդ հորիզոնականը:
Տասնյակում են հայտնվել նաեւ Բելառուսն ու Մոլդովան՝ համապատասխանաբար՝ 4,2% եւ 4,1%:
ԱՊՀ երկրներում միջին հաշվով այս տարվա հունվար-փետրվար ամիսներին արդյունաբերական արտադրանքի ծավալները նախորդ տարվա նույն ժամանակաշրջանի համեմատ ավելացել են 7%-ով:

Անի Մարության

Մենք ե՞նք մղում դեպի Թուրքիա

Տարեսկզբից ամեն շաբաթ Թուրքիա մեկնող առեւտրականների թիվը կրճատվել է մոտ 2 անգամ:
Երեւանից Ստամբուլ մեկնող ավտոբուսների վարորդների ասելով՝ ներկայումս շաբաթական մոտ 360 հայ առեւտրական է գնում Թուրքիա:
Թուրքիա մեկնողների թվի կրճատումը բոլորովին էլ պայմանավորված չէ հայ-թուրքական
հարաբերությունների վերջին զարգացումներով: Ուղղակի ավելացել է բեռի կշռի գինը՝ 1 կգ-ի դիմաց վճարվող 3 դոլարը այժմ դարձել է 5 դոլար: Ըստ վարորդների, քաղաքական զարգացումները չեն խանգարում թուրք գործընկերների հետ լավ հարաբերություններին:
Ամեն շաբաթ Երեւանից մեկնում է 8 ավտոբուս: Թուրքական ընկերություններին պատկանող այդ ավտոբուսներով ամեն չվերթին մեկնում է 45 ուղեւոր: Նախկինում Երեւանից Ստամբուլ տանող ավտոբուսների թիվը 17 էր:
Հիմնականում ամառային շրջանում է մեծանում հանգստանալ ցանկացողների հոսքը դեպի Թուրքիա, սակայն նրանք գնում են ոչ թե Ստամբուլ, այլ՝ Անթալիա:
Ի դեպ, առեւտրականների կանխատեսմամբ՝ հայ-թուրքական սահմանի բացումից հետո առանձնապես իրենց կյանքում բան չի փոխվի: Նույնսիկ կասկածում են, թե իրենց եկամուտը կավելանա:
Հայ-թուրքական հարաբերությունները բոլորովին էլ կապ չունեն մեր ժողովրդի ապրուստի հետ եւ սահմանի բացումով ոչինչ չի ավելանա. կարծում են առեւտրականները, ովքեր մտավախություն ունեն. «հիմա իբր քիչ են հարկ վերցնում, սահմանը բացելուց հետո ավելի շատ կվերցնեն»:
Սակայն այդ առեւտրականները ասում են, որ Թուրքիայի վարչապետ Էրդողանի՝ հայերին արտաքսելու մասին վերջին հայտարարություններից հետո արդեն վախով են մեկնում հարեւան երկիր, բայց այլ տարբերակ չունեն, քանի որ առեւտուրն է իրենց պարտքերը մարելու եւ օրվա հացը ապահովելու միակ միջոցը:
Այսպիսի մի խնդիր էլ չէ՞ր արդյոք հայ մարմնավաճառների հոսքը Թուրքիա եւ արաբական երկրներ…

Արտակ Հայոցյան

«Լուսանցք» թիվ 13 (144), 2010թ.