Մենամարտը 1-ին եւ 2-րդ նախագահներն են սկսում

Իսկ Ռ. Քոչարյանն ասել է. «Ինձ զարմացնում է իմ հնարավոր վերադարձի վերաբերյալ ծավալված քննարկումը՝ ՌԴ-ում ընթացող քաղաքական գործընթացների հետ ուղիղ փոխկապակցմամբ: Եվ դա տեղի է ունենում ՀՀ Անկախության 20-ամյակի ճոխ տոնակատարություններից անմիջապես հետո՞: Վստահ եմ, որ քաղաքական գործընթացները պետք է հասունանան այստեղ, Հայաստանում, այլ ոչ թե նույն հարթության մեջ պրոյեկցվեն դրսից»:

Եվ  արդեն իսկ հարց է ծագում՝ ո՞վ կպահանջի Քոչարյանի վերադարձը: Ոմանք դա կապում են ԲՀԿ նախագահ Գ. Ծառուկյանի ակտիվացման հետ, ոմանք չեն դադարում պնդել ՀՅԴ-ի տարբերակը, քանզի դաշնակցականները դեռ պարտք են Քոչարյանին՝ ՀՀՇ-ական քաղաքական դատավարություններից ազատվելու համար: Նաեւ արդեն լուրեր են շրջանառվում, որ որոշ գործարարներ իրենց շրջանում ստորագրահավաք են նախաձեռնել՝ Քոչարյանի վերադարձի պահանջարկը արդարացնող:

Իսկ Տեր-Պետրոսյանի համար Քոչարյանը «պրոբլեմ չի»: ՀՀ 1-ին նախագահի համար «շինծու թեմա է Քոչարյանի քաղաքականություն վերադարձը… Քոչարյանը մարած քարտ է… Նա քաղաքական գործիչ չէ եւ չի եղել… Համակերպվել է համակարգին՝ սկզբում խորհրդային, ապա ՀՀՇ-ական»… Ահա թե ինչ է մտածում Լ. Տեր-Պետրոսյանը՝ վերջում խորհուրդ տալով մոռանալ Ռ. Քոչարյանին: Ի դեպ, Տեր-Պետրոսյանը կարծում է, որ միակ մարդը, ով այսօր հենարան կլինի Քոչարյանին, ԱԳ նախկին նախարար Վ. Օսկանյանն է:

Վստահ ենք՝ ՀՀ 2-րդ նախագահը դեռ կպատասխանի ՀՀ 1-ին նախագահին, ով իր վերադարձը չգիտես ինչու իրական է համարում, անգամ ընդունելի եւ սպասելի, իսկ իրեն հաջորդող նախագահինը՝ ոչ:

Գուցե «ահից է գոռում» տարբերա՞կն է…

Տեր-Պետրոսյանը Քոչարյանին «ոչնչացնելուց» հետո, անցել է գործող նախագահին: Ըստ նրա, իր այդ հավատամքը բխում է հետեւյալ սկզբունքային ելակետերի հստակ ըմբռնումից. 1. ՀՀ ներկա վարչախումբը իշխանությունը յուրացրել է ոչ թե արդար ընտրությունների, այլ լայնածավալ կեղծիքների, բռնությունների, սեփական ժողովրդի դեմ կազմակերպված սառնասիրտ սպանդի միջոցով:

2. Վարչախումբը ոչ միայն ընդունակ, այլեւ մտադիր էլ չէ փոխել իր հանցավոր էությունը եւ իրական բարեփոխումների միջոցով հաղթահարել երկրում առկա քաղաքական ու սոցիալ-տնտեսական ճգնաժամը, ինչպեսեւ թեկուզ մասնակիորեն շտկել օրինականության, ժողովրդավարության եւ մարդու իրավունքների բնագավառներում տիրող անհանդուրժելի վիճակը: 3. Վարչախմբի հետագա գոյությունը խոչընդոտում է պետության բնականոն զարգացումը, ոչնչացնում ժողովրդի ստեղծագործ ոգին եւ, առանց չափազանցության, սպառնում երկրի ազգային անվտանգությանը:

ՀԱԿ-ը պահանջում է ՀՀ 3-րդ նախագահից՝ 1. Մինչեւ տարեվերջ անցկացնել արտահերթ նախագահական եւ խորհրդարանական ընտրություններ: 2. Ընտրություններից առաջ ՀՀ ընտրական օրենսգրքում կատարել էական փոփոխություններ՝ ընդգրկելով իրենց ներկայացրած հայտնի առաջարկները: 3. Առաջիկա 3 ամիսներին բացահայտել 2008թ. մարտի 1-ի 10 սպանությունները եւ քրեական հետապնդում սկսել դրանց պատասխանատուների նկատմամբ: 4. Ազատ արձակել քաղբանտարկյալ Տիգրան Առաքելյանին եւ կարճել Կոնգրեսի 7 երիտասարդ ակտիվիստների նկատմամբ հարուցված քրգործերը: 5. Վերացնել Երեւանում փողոցային առեւտրի վրա դրված անօրինական արգելքը: 6. Չեղյալ հայտարարել Երեւանում տեղադրված կրպակների ապամոնտաժման վերաբերյալ ընդունված որոշումը: 7. Դադարեցնել մայրաքաղաքի ճարտարապետական նկարագրի այլանդակումը եւ արգելել Երեւանի կենտրոնում բարձրահարկ շենքերի կառուցումը: 8. Օրենքով արգելել բարձրաստիճան պետական պաշտոնյաների, ԱԺ պատգամավորների եւ ՏԻՄ ղեկավարների կողմից մամուլի միջոցների եւ լրագրողների դեմ դատական հետապնդումների հարուցման պրակտիկան:

Այսքանից հետո, ՀԱԿ-ՀՀՇ-ական պարագլուխները գրեթե հայտարարում են, թե անկախությունն էլ է իրենց մենաշնորհը, ինչպես Արցախի ազատագրումը… Ազգի անունից ու ազգի արյունը իրենց վերագրելը նախկին հհշականների կամ ներկայիս կոնգրեսականների համար այլեւս դարձել է խրոնիկ հիվանդություն:

ԱԺ ՀՀԿ խմբակցության անդամ Վ. Կարախանյանը (հին Հանրապետականներից) այս առիթով ասել է. «Երբ ՀՀԿ-ն պայքարում էր Հայաստանի անկախության համար, ամեն ինչ անում անկախ Հայաստան ունենալու համար, Տեր-Պետրոսյանը նույնիսկ չէր երազում քաղաքական կարիերայի մասին»: Պատգամավորը հիշեցրել է, որ ՀՀԿ-ն եւ շատ այլ կազմակերպություններ ոչ միայն մեծ ներդրում են ունեցել Հայաստանի անկախության, այլ նաեւ երկրի սահմանների պաշտպանության ու պետականության ամրապնդման համար:

Վստահ ենք՝ ՀՀ 3-րդ նախագահն էլ իր պատասխանները կհնչեցնի, երբ Քոչարյանն իր խոսքը Տեր-Պետրոսյանի մասին ասած կլինի: Ամեն դեպքում հանրությունը կսպասի պատասխանների:

Վահագն Նանյան

*  *  *

Ոտգցոցի՞ Դաշնակցությանը

Ըստ «Wikileaks»-ի, 1993-95թթ. ՀՀ-ում ԱՄՆ դեսպան Հարի Գիլմորը 1993թ. հուլիս 27-ին թվագրված եւ պետդեպ ուղարկված նամակում խոսում է «Հայաստանի հետ PKK-ի (ՔԲԿ-Քրդստանի բանվորական կուսակցության) հնարավոր կապերի մասին:

Դեսպանը գրում է, որ իրենք բարձրացրել են հարցը այն ժամանակվա ԱԳ նախարար Վահան Փափազյանի մոտ, որը պատասխանել է. «PKK-ի եւ ՀՀ կառավարության միջեւ որեւէ կապ չկա: Բայց չի բացառվում, որ նման կապ կարող է լինել որոշ ընդդիմադիր խմբերի, ինչպես, օրինակ, դաշնակների միջեւ»…

Հարցին՝ թե խոսքը Հայաստանի դաշնակցականների, թե Աթենքում գտնվող կենտրոնական գրասենյակի դաշնակցականների մասին է, նախարար Փափազյանը պատասխանել է. «Տարբերություն չկա»:

Նամակում դեսպանը խոսում է նաեւ այն մասին, որ դեսպանատունը փորձել է ստուգել, արդյո՞ք իրականությանը համապատասխանում են Թուրքիայում տարածված լուրերը, որ Հայաստանում PKK-ի ամսագիր է հրատարակվում:

Պարզվել է, որ ամսագիրը ընդամենը 2 համար է թողարկել, իսկ ամսագրի գլխավոր խմբագիրը պարզաբանել է, որ Հայաստանում PKK-ն գործունեություն չի ծավալել:  

Ոտգցոցի Տեր-Պետրոսյանի՞ն, թե՞ Հայաստանին

Ըստ «Wikileaks»-ի  մի փաստաթղթի, որում Ադրբեջանում ԱՄՆ նախկին դեսպան Էնն Դերսին ԱՄՆ պետքարտուղարությանն ուղարկված նամակում (2008թ. սեպտեմբերի 26) վկայակոչելով իր անանուն աղբյուրը (դիվանագետը նրան անվանում է X), նշվում է, թե «Իրան-Ղարաբաղ-Հայաստան-Սեւ ծով երթուղով Ադրբեջան մտնող իրանական թմրանյութերից շահույթ են ստանում նաեւ հայ բարձրաստիճան քաղաքական գործիչները եւ կառավարության պաշտոնյաները, ներառյալ նախկին նախագահ Լեւոն Տեր-Պետրոսյանը… Ադրբեջանցի պաշտոնյաները Տեր-Պետրոսյանին մեղադրում են իրանական թմրանյութերի առեւտրից շահույթ ստանալու համար»,- նշվում է փաստաթղթում:

Կարեն Բալյան

Բամբասանք եւ իրականություն –

Բախտի, անբախտի, թե՞ յաբախտի…

Նորանոր լուրերը չեն թողնում, որ զարմանքը երկար սպասեցնել տա մեր քաղաքական ոլորտում: Մեր պաշտոնյաներն ու մեծահարուստները երբեմն տարօրինակ դրսեւորումներ ու սովորույթներ են ցուցաբերում:

Դրանց հաճախ են անդրադառնում հատկապես սոցիալական կայքէջերը, օրինակ նշում են, որ «նրանցից մեկը տուն է կառուցում Ազգային ժողովի շենքի նմանությամբ, մյուսը մի ամբողջ գազանանոց է պահում՝ կազմված վայրի գազաններից, մեկ այլը տան մոտակայքում եկեղեցի է կառուցում, որ թաքուն ապաշխարի, հաջորդը մարդկանց նստացնելուց ազատ ժամերին ծաղիկներ է լուսանկարում…»:

Իսկ վերջերս «Հրապարակ»-ը հավելելով գրել էր, որ «որոշ բարձրաստիճան անձինք ու օլիգարխներ էլ հաճախակի այցելում են աստղագուշակների ու բախտ նայողների: Ըստ տեղեկությունների՝ աստղերի միջոցով իրեն սպասվող իրադարձությունները պարբերաբար ճշտելու սովորույթ ունի նաեւ ՀՀ փոխվարչապետ, տարածքային կառավարման նախարար Արմեն Գեւորգյանը»:

Գոհար Վանեսյան

«Լուսանցք» թիվ 34 (210), 2011թ.