Մի շարք հայ մտավորականների՝ Թուրքիայի նախագահին հղած նամակի հրապարակումից հետո (հայոց ցեղասպանության ճանաչմանն ուղղված), մի շարք թուրք մտավորականներ էլ որոշեցին թեման շարունակել ինտերնետում:
Ու դեռ թարմ են թուրք մտավորականների կողմից «Հայոց ցեղասպանության համար հայերից ներողություն խնդրելու» ինտերնետային նախաձեռնության արձագանքները, որին ոմանք ոգեւորությամբ էին մոտենում: Սակայն, շատերը հասկացան, որ սա որեւէ կապ չունի ցեղասպանության ճանաչման հետ եւ հերթական բարոյական հաղթանակն են փորձում մեզ մատուցել…
Հիմա էլ մի խումբ հայեր են ի հայտ եկել նմանատիպ մի նախաձեռնությամբ. սրանք ներողություն են խնդրում թուրքերից «ԱՍԱԼԱ» («ՀԱՀԳԲ»-Հայաստանի ազատագրության հայ գաղտնի բանակ) խմբավորման կողմից իրականացրած սպանությունների համար:
Սիդնեյի Մակքուարի համալսարանի դոկտոր Արմեն Գակավյանը, ով նաեւ «Հայ-թուրքական երկխոսության խմբի» համանախագահն է, նախաձեռնել է թուրքերից ներողություն խնդրելու վերոնշյալ արշավը: Նա «Ռադիկալ» թուրքական թերթին տված հարցազրույցում ասել է, որ կստեղծվի մի փաստաթուղթ, եւ հայերը կկարողանան զետեղել իրենց ստորագրությունները տվյալ փաստաթղթի տակ. «Այս արշավի միջոցով մենք ցույց կտանք մեր ի սրտե աջակցությունը մեր թուրք ընկերների կողմից նախաձեռնված ներողության արշավին»: Հայերի հայտարարությունում նշվելու է. «Ես ներողություն եմ խնդրում թուրքերից այն սպանությունների համար, որոնք իրականացվել են հայ ժողովրդի անունից եւ ես կարեկցում եմ թուրքերի ցավին»:
Այս կասկածելի հայի պնդմամբ «թուրք մտավորականության արշավը ոգեշնչել է իրեն նախաձեռնել համանման ջանքեր: Թուրք մտավորականության քայլը մեծ նախաձեռնություն էր, վեհանձնության ապացույց, քանի որ դժվար է առերեսել անցյալը: Թե՛ որպես մեկ անձ, թե՛ ժողովուրդ, ես հույս ունեմ, որ հայերն ի զորու են ի ցույց դնել միեւնույն համարձակությունը, ինչպես եւ թուրքերը, եւ առերեսել անցյալի մութ էջերը»:
Հիշեցնենք, որ թուրք մտավորականության կողմից ինտերնետային կայքում զետեղված ներողության տեքստը հետեւյալն է. «Իմ խիղճը չի ընդունում «Մեծ ողբերգության» նկատմամբ ցուցաբերվող անտարբերությունը եւ հերքումը, որին ենթարկվել են Օսմանյան կայսրության հայերը 1915թ.: Ես չեմ ընդունում այդ անարդարությունը եւ իմ անունից ցավում եմ իմ հայ եղբայրների ու քույրերի ցավերի եւ տառապանքների համար: Ես ներողություն եմ խնդրում իրենցից»: Այս նախաձեռնության տակ ստորագրել է ավելի քան 30 հզ. մարդ: Դե ինչ, կարծես վարակը տարածվելու միտում ունի: Շուտով երեւի ի հայտ կգան հայեր, ովքեր կընդունեն թուրքերի այն տեսակետը, թե հայերն են ցեղասպանել թուրքերին ու ներողություն կհայցեն մեկ այլ ստորագրահավաքով: Հետո գուցեեւ Արցախյան ազատամարտի արդյունքները հարցականի տակ դրվեն եւ պատերազմում սպանված ադրբեջանցիների համար ներողություն հայցողներ էլ հայտնվեն: Ու եթե այդպես շարունակվի, մի քանի տականքներ էլ կգտնվեն, որ թյուրքական տարրից ներողություն կխնդրեն, որ Արարիչը մեզ հայ է ստեղծել ու Հայկական լեռնաշխարհը մեր բնական Հայրենիքն է դարձրել, ինչն էլ «ստիպել» է թուրքերին զոռով մտնել մեր տարածքները եւ պարտադրաբար մեզ կոտորել, որպեսզի իրենց համար «ոտքի տեղ անեն»…
Սա շատ նման է մի եվրատեսակետի, որը մատուցել են հայկական գաղթօջախներից մեկի դպրոցներում: Այս առաջադրանքով հայ երեխաներին հարց է տրվել, թե արդյո՞ք ճիշտ է վարվել Հայկ նահապետը, որ նետահարել ու սպանել է Բելին: Ավելի ճիշտ չէ՞ր լինի, որ Հայկը Բելի հետ նստեր բանակցությունների սեղանի շուրջ… Ինչպես ասում են՝ մեկնաբանություններն ավելորդ են:
Կարծում ենք՝ մեր պետական այրերը պիտի արագ արձագանքեն այսպիսի խեղկատակություններին եւ հրապարակային վերաբերմունք դրսեւորեն՝ պաշտպանելով մեր ազգի ու պետության շահերը:
Իսկ ինչ մնում է «ԱՍԱԼԱ»-ի նվիրյալ հայորդիների անձնասպանական գործողություններին, ապա նաեւ դրա շնորհիվ է, որ այսօր պատմության աղբանոցում չի հայտնվել հայոց ցեղասպանության հարցը եւ արմենգակավյանները իրենց հայ են զգում…
Արման Դավթյան
Loading ...
