Վերստին առաջադրվել է Արցախ-ԼՂՀ-ի ճանաչման օրինագիծը

Հրապարակվել է Հեղինակ` Hayary
Հոկտեմբերի 14-ին ԱԺ «Ժառանգություն» խմբակցության 7 պատգամավորներ «ԱԺ-ի կանոնակարգ» օրենքով սահմանված կարգով խորհրդարանի նախագահ Հովիկ Աբրահամյանին են ուղարկել «Լեռնային Ղարաբաղի Հանրապետությունը ճանաչելու մասին» ՀՀ օրենքի նախագիծը: Նախագծի 1-ին հոդվածով «Հայաստանի Հանրապետությունը ճանաչում է Լեռնային Ղարաբաղի Հանրապետությունը»: Ընդունվելու դեպքում օրենքն ուժի մեջ կմտնի պաշտոնական հրապարակման օրվան հաջորդող 10-րդ օրը: Օրենքով սահմանված կարգով ԱԺ նախագահի կողմից օրինագիծը շրջանառության մեջ պետք է դրվի առաջիկա 2 օրերի ընթացքում:
Նախագծի հեղինակները կարծում են, որ «սույն օրենքի ընդունմամբ Հայաստանի Հանրապետության (ՀՀ) կողմից իրավամբ կճանաչվի Արցախի փաստացի կարգավիճակը՝ ելնելով այն բանից, որ Լեռնային Ղարաբաղի Հանրապետությունը (ԼՂՀ) բավարարում է ինքնիշխան պետության համար միջազգային օրենքի բոլոր նախապայմանները: Օրենքը

հիմք կհանդիսանա Հայաստանի եւ Լեռնային Ղարաբաղի հանրապետությունների՝ ԼՂՀ պաշտոնական ճանաչումից ծագող հարաբերությունները կարգավորելու, Արցախի անվտանգությունն ապահովելու եւ ամրապնդելու գործում ՀՀ իրավունքներն ու պարտականությունները որոշակիացնելու, Հայաստանի ազգային շահն ու պետական քաղաքականությունը սահմանելու, հետհակամարտյան վերականգնման աշխատանքներին Հայաստանի մասնակցության համար… Օրենքը Հայաստանի Հանրապետությանը նաեւ թույլ կտա հետհակամարտյան վերականգնման շրջանում ԼՂՀ եւ շահագրգիռ այլ պետությունների, դոնոր կազմակերպությունների հետ միասին աջակցել հակամարտության գոտում պատերազմի հետեւանքների վերացմանը՝ խաղաղ քաղաքացիների կյանքի ու աշխատանքի բնականոն պայմանների ստեղծմանը, փախստականների վերադարձին եւ տարածքների վերաբնակեցմանը»:
Կարծում ենք, ամենաճիշտը տարիներ առաջ ՀՀ-ի եւ ԼՂԻՄ-ի որոշումներն իրագործելն է՝ երկու հայկական հանրապետությունների վերամիավորումը ճանաչելը:
Հատկապես հայ-թուրքական ծավալումների առկա պայմաններում պետք է շտապել այս խնդիրը լուծել, քանի դեռ այլոք չեն սկսել դա անել:

Վահագն Նանյան

Կկառուցվի՞ Հայաստանը շրջանցող երկաթուղին

Ադրբեջանը վերանայել է Բաքու-Թբիլիսի-Կարս երկաթուղային միջանցքի կառուցման ծրագիրը եւ որոշում կայացրել՝ կրճատել դրա ֆինանսավորումը:
Սա խոսում է այն բանի մասին, որ Ադրբեջանը կորցրել է այս ծրագրի հանդեպ իր հետաքրքրությունը: Այս փաստը վստահաբար անմիջականորեն առնչվում է հայ-թուրքական հարաբերությունների հետ, ինչի մասին վաղուց արդեն բացահայտ խոսում են Ադրբեջանում:
Բաքուն նոր չէ, որ հրապարակայնորեն ցուցադրել էր իր դեմքը եւ հայ-թուրքական հարաբերությունների կարգավորման գործընթացի տարբեր փուլերում ընդգծված ցույց էր տվել իր դժգոհությունը: Դեռեւս Ադրբեջան-Թուրքիա գազամուղով անցնող գազի սակագների առումով հստակություն չկա հենց այդ պատճառով:
Այսպես Ադրբեջանը փորձում է հայ-թուրքական հարաբերությունների գործընթացում Թուրքիայից հնարավորինս շատ խոստումներ կորզել:

Արտակ Հայոցյան

«Լուսանցք» թիվ  35 (121),  2009թ.

Այս գրառումը հրապարակվել է Հ.Ա.Մ., Հոդվածներ խորագրում։ Էջանշեք մշտական հղումը։