Շաբաթվա մարզական կյանքից

Գերազանց արդյունք
Լեհական Վլադիսլավովո քաղաքում կայացավ ծանրամարտի Եվրոպայի երիտասարդական առաջնությունը:
Մեր մինչեւ 23 տարեկան տղամարդկանց ընտրանին թիմային հաշվարկով գրավեց 1-ին տեղը՝ դառնալով Եվրոպայի չեմպիոն: Մեր ծանրորդները Եվրոպայի երիտասարդական անդրանիկ առաջնությունում նվաճեցին 6 մեդալ՝ 3 ոսկի, 2 արծաթ եւ 1 բրոնզ:
Արթուրն անկասելի է
«Showtime» հեռուստաընկերության կողմից պրոֆեսիոնալ բռնցքամարտի գերմիջինքաշային կարգում կազմակերպված գերմրցաշարում Գերմանիան ներկայացնող հայ բռնցքամարտիկ Արթուր Աբրահամը 12-րդ ռաունդում նոկաուտի ենթարկեց ամերիկացի Ջերմեյն Թեյլորին:


«Ես հենց այսպիսի հաղթանակի էի ձգտում: Ուզում էի, որ այն վառ ու վստահ լինի: Ողջ մենամարտի ընթացքում պահ էի փնտրում, որ նոկաուտի հասցնող հարված հասցնեմ, եւ, վերջապես, դա ինձ հաջողվեց 12-րդ ռաունդում: Գերազանց մարտ էր, գերազանց հաղթանակ: Ապրի Թեյլորը, շատ ուժեղ տղա է, սակայն իմ դեմ մենամարտում նա ոչ մի հնարավորություն չուներ»,- մենամարտից հետո ասել է Արթուր Աբրահամը:
Պարտությունից հետո ամերիկացի Ջերմեյն Թեյլորն անմիջապես տեղափոխվել է հիվանդանոց՝ բուժման համար: Նա խոստովանել է, որ նույնիսկ չի տեսել Արթուր Աբրահամի՝ աջ ձեռքով կատարած հարվածը, որը նրան հասցրեց նոկաուտի: Նա վերականգնվում է Գերմանիայում, իսկ բուժումը կշարունակի ԱՄՆ-ում:

Օլիմպիադան եւ քաղաքականությունը
«Եթե Ռուսաստանն իր նվաճողական զորքերը չհանի Վրաստանի տարածքից, Սոչիում կայանալիք ձմեռային Օլիմպիական խաղերը բոյկոտելու հարցը հրատապ կդառնա»: Այս մասին լրագրողներին հայտնել են Վրաստանի խորհրդարանում, որտեղ տեղի է ունեցել երկրի տարածքային ամբողջականության վերականգնման ժամանակավոր հանձնաժողովի եւ արտաքին կապերի ու արտասահմանյան հայրենակիցների հետ հարաբերությունների կոմիտեի համատեղ նիստը:
«Սոչիում Օլիմպիական խաղերի անցկացումը ցինիզմ կլինի: Այնտեղ բնակվում էին ժողովուրդներ, օրինակ՝ չերքեզների մի մասը, որոնց ռուսները լիովին ոչնչացրեցին»,- Վրաստանի խորհրդարանի պատգամավոր Նուգզար Ցիկլաուրիի խոսքերը մեջբերել է «Ռոսբալթ»-ը:
«Այդ Օլիմպիադան տեղի է ունենալու մարդկանց ոսկորների վրա: Երկիրը, որն այսպիսի պատմական անցյալ ունի եւ այսօր էլ շարունակում է մարդու իրավունքների զանգվածային խախտումները, ըստ իս, արժանի չէ այնպիսի միջոցառման, ինչպիսին Օլիմպիադան է»,- ավելացրել է պատգամավորը:
Շատ հեշտ են խոսում վրացի օրենսդիրները` «մոռանալով»` թե՛ Ջավախքում եւ թե՛ հայկական այլ բռնազավթված տարածքներում ինչեր են անում իրենք՝ վրացիները, եւ դեռ ակնկալում են էլի տարածքներ կորզել Հայաստանից…

Արսեն Պետրոսյան

«Լուսանցք» թիվ 36 (122), 2009թ.

Այս գրառումը հրապարակվել է Հ.Ա.Մ., Հոդվածներ խորագրում։ Էջանշեք մշտական հղումը։