ՀՀ ԱԳ նախարար Էդվարդ Նալբանդյանն օրերս ընդունեց ԵԱՀԿ Մինսկի խմբի համանախագահներ Յուրի Մերզլյակովին (Ռուսաստան), Բեռնար Ֆասիեին (Ֆրանսիա), Ռոբերտ Բրադկեին (ԱՄՆ) եւ ԵԱՀԿ գործող նախագահի անձնական ներկայացուցիչ Անջեյ Կասպրչիկին: Քնարկվել են արցախյան հիմնախնդրի կարգավորման գործընթացին առնչվող հարցեր: Այլ մանրամասներ պաշտոնապես չեն հաղորդվում:
ԵԽ նախարարների կոմիտեի Ագոյի մոնիտորինգային խմբի զեկույցը Հայաստանում եւ Ադրբեջանում իրականացրած այցերի վերաբերյալ դեռ չի ներկայացվել: Նախատեսվում է դա անել փետրվարի 3-ին:
Ագոյի խումբը Երեւանում հանդիպումներ է ունեցել եւ իշխանության եւ ընդդիմության ներկայացուցիչների հետ, ծանոթացել երկրում ընթացող բարեփոխումներին, նախագահական ընտրություններին հաջորդած իրադարձություններին, արցախյան հիմնախնդրի, հայ-թուրքական հարաբերությունների կարգավորման բանակցային գործընթացների վերջին քայլերին ու զարգացումներին:
Արտակ Հայոցյան
Հերթական եռակողմը
Ձեռք բերված պայմանավորվածության համաձայն` հունվարի 25-ին, ՌԴ Սոչի քաղաքում կկայանա Հայաստանի նախագահ Սերժ Սարգսյանի, Ռուսաստանի նախագահ Դմիտրի Մեդվեւդի եւ Ադրբեջանի նախագահ Իլհամ Ալիեւի եռակողմ հանդիպումը` նվիրված ԼՂՀ հակամարտության կարգավորմանը:
Սա ՌԴ ԱԳ նախարար Լավրովի` օրերս Երեւան կատարած այցից հետո արցախյան թեմայով նոր հանդիպում է:
* * *
Եթե վրացիները մերժեն, ապա` անկախություն
Վրացական իշխանությունները նախաձեռնել են նոր դատավարություններ ջավախքահայ հասարակական եւ քաղաքական գործիչների նկատմամբ:
Ըստ «Երկիր» միության, ներկայումս նաեւ ընթանում է Արամ Բատոյանի նկատմամբ հեռակա դատավարությունը, որը Ջավախքի երիտասարդական մարզամշակութային միության (կազմակերպության ղեկավարը Վահագն Չախալյանն է) կենտրոնի տնօրենն էր: Նրան վրացական իշխանությունների կողմից մեղսագրվում է ՋԵՄՄ-ի շենքում զենք պահելը, որն իբր հայտնաբերվել էր 2008թ. հուլիսի 21-ի խուզարկության ընթացքում:
Այս նոր հեռակա դատավարություններն ուղղված են ամրապնդելու Ջավախքում տիրող պետական ահաբեկչության ռեժիմը, ինչպես նաեւ ջավախքահայության մեջ առկա վախի տրամադրությունները:
Հաշվի առնելով վերոնշյալը՝ «Երկիր» միությունը պահանջում է վրացական իշխանություններից՝
1. Անհապաղ անցկացնել Ախալքալաքում 2008թ. հուլիսի 17-21-ի դեպքերի նոր անաչառ հետաքննություն.
2. Վերանայել ջավախքահայ քաղաքական ակտիվիստների եւ նրանց ընտանիքների անդամների նկատմամբ ընդունված բոլոր մեղադրական դատավճիռները.
3. Դադարեցնել ջավախքահայ ակտիվիստների նկատմամբ ծայր առած ոստիկանական հալածանքները եւ քաղաքական հետապնդումները:
Նաեւ կոչ է արվում միջազգային կազմակերպություններին եւ Վրաստանում հավատարմագրված դիվանագիտական ներկայացուցչություններին ուշադրություն դարձնել Ջավախքում ծավալվող իրադարձություններին՝ ճնշում գործադրելով վրացական իշխանությունների վրա՝ հայաբնակ երկրամասում հալածանքները դադարեցնելու նպատակով:
Նարե Մշեցյան
Հ.Գ. – Բողոքին եւ կոչին միանում են Հայ Արիական միաբանությունն (ՀԱՄ) ու Հայ ազգայնականների համախմբումը (ՀԱՀ) եւ հավելում, որ վրացական իշխանությունների հակահայ քաղաքականությանը (ոչ միայն Ջավախքում, նաեւ Թբիլիսիում եւ այլն) պետք է արձագանքեն նաեւ ՀՀ իշխանությունները, որոնք պարտավոր են պաշտպանել ջավախքահայերի եւ վիրահայերի իրավունքները: Կամ էլ‘պետք է առաջ քաշեն Ջավախքի ինքնավարության, իսկ վրացիների մերժման դեպքում` հայկական երկրամասի անկախության խնդիրը:
«Լուսանցք» թիվ 2 (133), 2010թ.