ԱԱԾ-ն «փողերի լվացման» գո՞րծ է պարզաբանում…
Այն, որ ԲՀԿ-ն խախտելով ՀՀԿ-ի հետ պայմանավորվածությունները որոշեց առանձին գերուժ երեւալ ու անգամ ընդդիմադիր խաղեր տալ, չէր կարող շարունակություն չունենալ, եւ այդպես էլ եղավ: Չնայած ՀՀ նախագահ Սերժ Սարգսյանի վերջին արտերկրյա այցին ճանապարհողների շարքում է եղել նաեւ ԲՀԿ ղեկավար Գագիկ Ծառուկյանը եւ բարի ճանապարհ մաղթել «նախագահ ջան»-ին, միեւնույնն է, ինչ-որ կարեւոր բան կոտրված է այլեւս:
Մեկ այլ ԲՀԿ-ական՝ Նաիրա Զոհրաբյանը հավելել է. «Կարծում եմ՝ առաջիկա մի քանի օրերի ընթացքում գործընթացը շատ հստակ կլինի բոլորիս համար եւ դրանից հետո միայն ԲՀԿ-ն անպայմանորեն հանդես կգա շատ ավելի կոնկրետ գնահատականով ու եզրակացությամբ: Երեւույթը մեզ համար մտահոգիչ է, եւ մենք որեւէ հիմք չունենք չհավատալու ԲՀԿ անդամ մեր գործընկերոջ հայտարարությանը առ այն, որ իր ստեղծած ու հիմնադրած հիմնադրամը օրենքի հետ որեւէ խնդիր չի ունեցել»:
ԱԺ փոխնախագահ եւ ՀՀԿ մամուլի խոսնակ Էդուարդ Շարմազանովն արագ արձագանքել է. «Հարգելի պարոն Օսկանյան, ՀՀ-ում քաղաքական պատվերների ու ռեպրեսիաների ժամանակները մնացել են անցյալում… Ընդունելով յուրաքանչյուր քաղաքացու, այդ թվում՝ պատգամավորի ազատ արտահայտվելու իրավունքը, առնվազն տարօրինակ եմ համարում Օսկանյանի նման մեկնաբանությունը: Որովհետեւ քիչ թե շատ քաղաքականությամբ հետաքրքրվող մարդը պետք է շատ լավ գիտակցեր, որ ՀՀ-ում այս տարիների ընթացքում կառուցվում է ժողովրդավարական երկիր, իսկ վերջին տարիների ընթացքում այնպիսի առաջընթաց է գրանցվել, որ դրա մասին ՀՀ այցի ընթացքում նույնիսկ ԱՄՆ պետքարտուղարը խոսեց»:
ՕԵԿ պատգամավորական խմբակցության ղեկավար Հեղինե Բիշարյանն էլ հայտնել է. «Գործին տեղյակ չեմ, թե ինչու են պարոն Օսկանյանին հրավիրել հարցաքննության: Դա երեւի իրավապահ մարմինների խնդիրն է, եւ եթե որեւէ խնդիր կա, անկախ նրանից, թե ով է քաղաքացին, պարտավոր են հրավիրելու: Եթե այդ ստուգումների արդյունքում ամեն ինչ ապացուցվի, որ որեւէ լուրջ բան չկա եւ իրեն պարզապես կանչել են, գուցե դա քաղաքական ենթատեքստի վերածվի: Բայց ես ինքս իրավապահ մարմին չեմ եւ չեմ կարող գնահատական տալ: Կարծում եմ՝ դա կապ չունի քաղաքական դաշտի հետ եւ հիմնականում առնչվում է իրավական խնդիրների հետ: Ես գտնում եմ, որ պետք չէ ամեն ինչ քաղաքականացնել: Եթե մարդը քաղաքական դաշտում է գործում, ապա դա չի նշանակում, որ ինչ առնչվում է իր հետ, պետք է քաղաքականացնել»:
Կարծում ենք՝ սա միայն առաջին լուրջ հակամարտությունն է ու ոչ՝ վերջինը: ՀՀԿ խմբակցության անդամ Վարդան
Այվազյանը նաեւ հնարավոր է համարում, որ կարող է հայտնաբերվի, թե Գագիկ Ծառուկյանը պետությանը միլիոնների պարտք ունի եւ դա չի կարող ԲՀԿ-ի հետ հակադրություն դիտարկվել: ՀՀԿ-ական պատգամավորը ԲՀԿ-ին «նորմալ ուժ» է համարել, մինչդեռ, օրինակ «Ազատ դեմոկրատներ»-ի փոխնախագահ Անուշ Սեդրակյանը ԲՀԿ-ին «ընդհանրապես չի ընկալում որեւէ կերպ»: Նրա խոսքերով՝ «ՀՀԿ-ն հայտարարել է, որ ինքը իշխանություն է, ՀԱԿ-ն ու «Ժառանգությունն» էլ՝ թե ընդդիմություն են: ԲՀԿ-ն ոչ իշխանություն է, ոչ էլ ընդդիմություն՝ ես կսպասեմ հայտարարությանը…. ԲՀԿ-ն հոգով-սրտով կոալիցիա է»:
Իսկ լրագրողների այն լրացուցիչ հետաքրքրությանը, թե արդյո՞ք Գագիկ Ծառուկյանի որոշումը՝ չստորագրել կոալիցիոն հուշագիր ՀՀԿ-ի հետ, ԲՀԿ-ականների ու, մասնավորապես, գործարար կուսակցապետի համար կարող է ճակատագրական լինել՝ ասենք հայտնաբերվի, որ ԲՀԿ առաջնորդը պետությանը 100 մլն. պարտք ունի, Վարդան Այվազյանը նշել է, թե ոչինչ չի բացառվում. «Կարող է, ամեն ինչ էլ կարող է: Կարող է Այվազյան Վարդանինն էլ հայտնաբերվի, կամ էլ ձերը»:
ԲՀԿ խոսնակը կուսակցական Օսկանյանի հիմնադրամի փողերի լվացման հետ կապված խնդրի առումով ասել է. «Ո՞նց կարելի է եթե-ի վրա հիմա ինչ-որ եզրակացություններ անել: Երբ քրգործը համապատասխան ձեւով ներկայացվի, ես կտամ մեր մեկնաբանությունը»: Եվ միայն այս դեպքում ԲՀԿ-ն կցուցաբերի իր վերաբերմունքը նաեւ Օսկանյանի նկատմամբ:
ՀԱԿ համակարգող, ԱԺ ՀԱԿ խմբակցության ղեկավար Լեւոն Զուրաբյանն անդրադարձել է Օսկանյանին ու փողերի լվացման համար ԱԱԾ մեղադրանքին, եւ նշել. «Եթե մենք ապրեինք նորմալ, օրինական պետությունում, սա կարող էր ընկալվել նորմալ գործընթաց: Այո, իրավապահ մարմինները կարող են վարահսկել հ/կ-ների ֆինանսական հոսքերը եւ օրենքով պատժել, բայց մենք ապրում ենք մի պետությունում, որի իրական պատկերը լավ գիտենք, եւ ես չեմ զարմանա, երբ պարզվի, որ այս ամենը քաղաքական հետապնդում է»:
Ճիշտ է, այ, որ ժամանակին ԱԱԾ-ն «Լեւոնի իշխանական թիմի» ընդհանուր եւ անհատական գործերը եւս տնտղեր (հիմա էլ ուշ չէ, պետք է պարզապես վերհանել ՀՀ 2-րդ նախագահի օրոք գործած Քաղաքական խորհրդի հայտնի ուսումնասիրությունն ու որոշումը), ապա ՀԱԿ-ՀՀՇ-ականները իրենց կարծիքները վստահաբար բանտից կհայտնեին… Կամ էլ չէին հայտնի առհասարակ՝ ամոթից:
ՀՅԴ Բյուրոյի անդամ Վահան Հովհաննիսյանը, անձամբ ճանաչելով Օսկանյանին, նրա ընտանիքը, խիստ անհավանական է համարել նրա կողմից որեւէ հանցավոր գործունեություն, եւ ընդհանրապես համարում է անընդունելի, եթե քրգործերի քողի տակ քաղաքական հետապնդում է իրականացվում. «Իհարկե, ես գործը մեկնաբանել հիմա չեմ կարող, մանրամասներին ծանոթ չեմ, բայց կարծում եմ, որ անթույլատրելի է քաղաքական հետապնդում իրականացնելու որեւէ փորձ ճանաչված քաղաքական դեմքի նկատմամբ՝ քրեական մեղադրանքների քողի տակ»:
«Իշխանությունները ուզում են դաշտը ամայացնեն, որպեսզի այն ազատ լինի՝ իշխանությունները ոչնչի առաջ չեն կանգնում եւ գնում են նման քայլերի: Ես այլ մեկնաբանություն իսկապես չեմ կարող տալ,- ասել է Օսկանյանը,- քաղաքական պայքարը պատկերացնում եմ քաղաքական հարթության մեջ, այս ամենը՝ սպառնալիքներ եւ այլն, իմ ոճը չի, բայց, եթե իշխանությունները սա են ընտրել, ես սրան էլ եմ պատրաստ»:
Հետաքրքիր է, որ Վ. Օսկանյանն անգամ պատրաստ է հալածանքների ենթարկվել, ինչը զարմանալի, բայց հասկանալի պոռթկում է՝ ՀՀ նախագահի հերթական ընտրություններից առաջ: Իսկ Գ. Ծառուկյանը նույնիսկ մինչեւ խորհրդարանական ընտրություններ էր հայտարարել, թե պատրաստ է կորցնել ամեն ինչ՝ հանուն արդարության: Սա ոչ միայն զարմանալի է, այլեւ՝ արկածախնդրություն:
Անգամ եթե ԲՀԿ-ական գործիչները ճիշտ են ասում, ապա այս հարցը ձգձգել պետք չէ եւ իշխանություններին դիմել եւս հարկավոր չէ, պարզապես կարող են հրաժարվել այն ամենից, ինչը ձեռք են բերել տարիներ շարունակ տարբեր իշխանությունների մեջ բարգավաճելով ու ժողովրդին գռփելով: Ո՞վ է խանգարում, ո՞վ չգիտի այս իրականությունը:
Նույնը նախկին ու ներկա լիքը իշխանավորների է վերաբերում՝ ազատվեք այն բեռից, որը «տանջում» է ձեր «խիղճը», ժողովրդից թալանածը վերադարձրեք, եւ քաղհալածյալի ու ընչազուրկ դառնալու խոստումների կարիքը չի լինի այլեւս: Իսկ գուցե պարզապես ամեն մի մեծահարուստ հրապարակավ ներկայացնի՝ ինչպես է ձեռքբերել իր առաջին միլիոնը… Վստահ ենք՝ այսօրվա՝ ամեն ինչ կորցնելու պատրաստ համարձակներն անգամ չեն տա այդ պարզաբանումը:
Իսկ ԱԱԾ լրատվական կենտրոնից տեղեկացրել են, որ քրեական գործով նախաքննություն է իրականացվում՝ ԱՄՆ-ում գրանցված «Պոլիմեր Մատերիալս» եւ «Հանթսման Ինթերնեյշնլ» կորպորացիաներին պատկանող, ՀՀ-ում հիմնադրված «Հանթսման Բիլդինգ Փրոդաքթս» ՍՊԸ 100% բաժնեմասը շուրջ 2 մլն. ԱՄՆ դոլարով փաստացի վաճառելու, սակայն գործարքը ոչ ճիշտ պայմանագրային ձեւակերպումների արդյունքում հարկային մարմնին չներկայացնելու, դրանից հնարավոր առաջացող հարկային պարտավորությունները չկատարելու, ամերիկյան կողմի ցանկությամբ ՀՀ-ում թողնված եւ բացառապես բարեգործության համար նախատեսված այդ գումարից մոտ 1 մլն. 135 հազ. ԱՄՆ դոլարը իրականում բարեգործական նպատակներին չուղղելու, չօգտագործելու, այդ գումարը «Սիվիլիթաս» հիմնադրամի հիմնադիր եւ նախագահ Վարդան Օսկանյանի ու նույն հիմնադրամի հոգաբարձուների խորհրդի անդամ Տիգրան Կարապետյանի անվամբ:
«Սիվիլիթաս» հիմնադրամի դեմ հարուցված փողերի լվացման մեղադրանքով քրեական գործով եւ Վարդան Օսկանյանին ԱԱԾ կանչելու առթիվ փորձեր եղան իմանալ նաեւ նախկին նախագահ Ռոբերտ Քոչարյանի տեսակետը: Չէ որ նախկին ԱԳ նախարարը նախկին նախագահի թիմի հավատարիմ ներկայացուցիչ է (եղել, եթե հիմա անգամ այդպես չէ) եւ նրա հիմնադրամի դեմ գործ հարուցելը ոմանք անգամ դիտում են որպես ոտնձգություն Ռոբերտ Քոչարյանի դեմ, ում մամուլի խոսնակ Վիկտոր Սողոմոնյանը հայտնել է, թե «Քոչարյանն այս պահին Հայաստանում չէ եւ նրա հետ չի քննարկել այդ հարցը»:
Հիշեցնենք, որ Քոչարյանի եւ Ծառուկյանի անունների հետ Օսկանյանի անունը եւս շրջանառվում է նախագահի հավանական թեկնածուների շարքում: Եվ սա կարող է նաեւ զայրացրած լինել հենց 2-րդ նախագահին, ով գործող նախագահից առաջ դեռ կցանկանա «կարգի հրավիրել» իր ԲՀԿ-ական ենթականերին: Եթե այդպես է, ապա ԲՀԿ նախագահը եւս «չմարսելու» բաներ կունենա:
Վարչապետ Տիգրան Սարգսյանը բացառում է քաղաքական ենթատեքստն այս առումով: Նա «Ազատություն» ռադիոկայանին ասել է. «Ընդհանրապես, պետք է պարզվեն որոշ հանգամանքներ: Եվ ՀՀ ցանկացած քաղաքացի համագործակցում է մեր ազգային անվտանգության կառույցների հետ, որպեսզի, եթե կան տեղեկատվություններ, որոնք անհրաժեշտ է ստուգել, որպեսզի ստուգենք եւ վստահ լինենք, որ որեւիցե ռիսկեր այդտեղ չկան: Մեկ այլ երեւույթ էլ կա. երբ հասարակության մեջ պետությունը փորձում է ինչ-ինչ գործառույթներ իրականացնել՝ բացահայտելու այս կամ այն տեղեկատվության տակ թաքնված երեւույթները, միանգամից առաջ է մղվում այն հանգամանքը, որ սա քաղաքական ենթատեքստ ունի: Նման բան չկա»:
Ամեն դեպքում, եթե այլեւս ընդդիմադիր Օսկանյանը եւ Ծառուկյանը ապօրինի գործունեություն են ծավալել, ինչը դեռ կպարզի նախաքննությունը, ապա դա հաստատ նոր չի նկատելի դարձել պատկան մարմինների աչքին ու նոր չի հայտնաբերվել, ուրեմն՝ էն գլխից հայտնի է եղել…
Եվ սա նույնպես լուրջ մտորելու տեղիք է տալիս: Այսօր, անգամ առանց խոշորացույցի զննելով մեր գործարարների ու պաշտոնյաների «ներքին գործերը», հաստատ էլի հետաքրքիր բացահայտումների ականատես կլինենք, ու այդ դեպքում ՀՀ պետբյուջեն էլ շատ արագ տարածաշրջանում ամենամեծը կդառնար… Բայց դե ժամանակը գիտի եւ պահը:
Նարե Մշեցյան
Հ.Գ. – Մի դիտարկում անենք. «Լուսանցք»-ը պարբերաբար գրում էր, որ մեր ԱԱԾ-ն իսկապես ազգային լուրջ խնդիրները թողած զբաղվում է 50-100 դոլար կաշառք վերցնողներին ձերբակալելով: Օսկանյանի դեպքը «մեծ ձկների» շարքից է, բայց այս դեպքում էլ ԱԱԾ-ի գործելաոճն է անհասկանալի:
Այս կառույցի լրատվական ծառայությունը խոսել է հնարավոր հարկային պարտավորություններից: Ի՞նչ է՝ բա՞րդ էր դիմել պետեկամուտների կոմիտե՝ պարզելու համար, թե հարկային պարտավորություններ առաջացրե՞լ էին «Սիվիլիթաս»-ին փոխանցումները, թե՞ ոչ:
Ստացվում է ԱԱԾ-ն շտապողականությու՞ն է ցուցաբերել: Մյուս կողմից՝ եթե չեմ սխալվում, տնտեսագիտական դասագրքային ճշմարտությունների համաձայն, փողերի լվացման մասին խոսք է լինում, երբ փողերը կեղտոտ են: Իսկ փողերը կեղտոտ են լինում, երբ փոխանցողը հայտնի չէ, ինչն Օսկանյանի դեպքում՝ ըստ նրա իսկ տեղեկատվության, բացառվում է:
Հարգելով լրագրության էթիկան, քանի դեռ քննություն է ընթանում, վերջնական եզրակացություն չենք անի: Փոխարենը՝ մեր դիտարկումները մեզ շատ բան են հուշում:
Հա, մի բան էլ Օսկանյանին հիշեցնենք. երբ ԱԱԾ-ի ուղտը այս կամ այն գործչի դռանն էր չոքում, նա լուռ էր: Միշտ:
Այդ հիմա է խոսում հետապնդումներից, երբ սեփական մաշկին է զգում: Բայց իր վիճակը լավ է, որովհետեւ լրատվության սեփական միջոցներ, դրսի ու ներսի հովանավորներ ունի եւ արգելափակված էլ չէ:
Մի տարբերակ էլ կա. Օսկանյանը քաղաքական տեխնոլոգիաներին լավ է տիրապետում, եւ եթե հասցրել է ԱԱԾ-ում իր՝ դրսից թելադրված թեւն ունենալ, ապա… շատ լավ է կազմակերպվել նրա PR-ը:
«Լուսանցք» թիվ 22 (243), 2012թ.
Կարդացեք «Լուսանցք»-ի PDF տարբերակները www.hayary.org -ի «Մամուլ» բաժնում www.pressinfo.am -ի «Բեռնում» բաժնում



