ԵՐԴՄԱՆ ՀԱՆԳԱՆԱԿ
Ես պիտի փայփայեմ և զորացնեմ այն եղբորս,
որ իր միտքը միացնում է իմ մտքին:
Հավատի տունը իմ մեջ պիտի կառուցեմ
ու կամքիս թիրախը պիտի հստակորեն սևեռեմ
և ոսկե շղթայումի օղակները մեկ առ մեկ
նվեր պիտի տամ ամեն հայի:
Օղակ առ օղակ ամրակապվելով՝
իմ ճամփան պիտի հարթեմ
և պիտի կործանեմ թշնամուս,
Աստծուն հայտնի բոլոր զենքերով:
Առավոտյան և երեկոյան աղոթքիս շաղախով
կամուրջներ պիտի կառուցեմ
և աշխարհը իմ ափի մեջ պիտի լինի:
Վրեժի պատգամը բոլոր հավատացյալների
օջախի մեջ անմարելի արթուն պիտի պահեմ:
Աշխարհի որ ծայրում էլ լինեմ,
Իմ ոգին և միտքը հայրենիքի համար պիտի պտուղ տա:
Իմ տասնորդը և ավելին պիտի գանձատուն հասցնեմ
և պիտի գերազանցեմ սեփական անձս՝ պարտքի համար:
Արդարատեր Պապերիս գործերով պիտի
ծառայեմ հավիտենությանը
և նրանց հավատարմությամբ պիտի
ամրապնդեմ ողնաշարս:
Իմ թափած արյան հրդեհները պիտի լուսավորեն
մեղսագործների դեմքերը դատաստանի առաջ:
Իմ զենքերից առավել բարբարոսի
զենքին պիտի տիրապետեմ:
Իմ խոսքը արդյունք պիտի լինի
և միայն իմ գործերը պիտի հիշեցնեն իմ գոյությունը:
Սեփական քայլերս պիտի դատեմ
և անմիտ բարությունս, անստույգ վստահությունս
պիտի պատժեմ:
Իմ մահից հետո էլ պիտի միշտ շարքում լինեմ
և իմ զորավարը մայրերի զուսպ ուրախությունը պիտի լինի:
Իմ ամեն օրվա մեջ ջերմացնող արևը
սրբությունները արթուն պահելը պիտի լինի:
Աստվածատուր օրենքներով պիտի հաստատվեմ
իմ Երկրում:
Սուրեն Գրիգորյան