Ցանկալի վարչապետեր – «Լուսանցք»-ի փոքրիկ սոցհարցումը… Նոր շարժու՞մ, թե՞ նոր կոալիցիա, իսկ գուցե նոր կառաարությու՞ն…

- Ցանկալի վարչապետեր – «Լուսանցք»-ի փոքրիկ սոցհարցումը

- Նոր շարժու՞մ, թե՞ նոր կոալիցիա, թե՞ նոր կառավարություն

Ցանկալի վարչապետեր

«Լուսանցք»-ի այս տարվա թիվ 13-ում (ապրիլի 12-18) խոսել էինք այն տասը գործոնների մասին, որոնք անպայման պետք է հաշվի առնվեն երկրի վարչապետ նշանակելիս: Գրել էինք նաեւ, թե մինչեւ նոր կառավարության ձեւավորումը, խմբագրությունը պատրաստ է ընդունել զանգեր՝ յուրօրինակ փոքրիկ սոցհարցման նկատառումով՝ հասկանալու համար, թե մեր երկրի քաղաքացիները ում կուզեն տեսնել գործադիր իշխանության ղեկավարի աթոռին: Խոստացել էինք ամփոփել զանգերը եւ տեղեկատվություն տրամադրել ընթերցողներին:

Զանգերն ամփոփեցինք: Ապրիլի 12-ի առավոտից սկսած մինչեւ 18-ը ներառյալ զանգեր, հաղորդագրություններ ստացանք ու էլփոստով նամակներ: Արդյունքները հենց «Լուսանցք»-ի հաջորդ՝ ապրիլի 19-25-ի համարում չարձանագրեցինք, քանզի հենց ապրիլի 19-ին նշանակվելու էր վարչապետը եւ այդ իսկ պատճառով չցանկացանք, որպեսզի թյուր տեսակետ ստեղծվի, թե մենք մինչ նշանակումը  կարծիք ենք թելադրում: Բացի այդ, ավելի հետաքրքիր կլիներ, եթե մենք պատկերը ներկայացնեինք արդեն նշանակումից հետո: Բայց այս ամբողջ գործընթացում կարեւոր էր մի բան. խմբագրություն դիմած քաղաքացիները ոչ միայն անուն էին առաջադրում, այլեւ անկեղծանում էին, թե ինչու հենց տվյալ անձին են համարում վարչապետի աթոռին արժանի:

Մենք կարծիքները չենք հրապարակի, միայն կանդրադառնանք զանգերի թվին եւ դրանցից, այսպես ասած, ցանկալի վարչապետերին բաժին հասած ձայներին՝ մեկնաբանությունը թողնելով ընթերցողներին: Ի դեպ, տեղեկացենք, որ պատկերը մեզ համար էլ էր անակնկալ:

Եվ այսպես՝ 7 օրում (մինչեւ ապրիլի 19-ը) խմբագրությունը ստացավ 137 «դիմում» (զանգ, հաղորդագրություն եւ էլփոստով «նամակ»):

137-ից ընդամենը 5 ձայն էր ներկայիս վարչապետի՝ Տիգրան Սարգսյանի օգտին:

7 ձայն ստացել էր ՀՀ 1-ին նախագահ Լեւոն Տեր-Պետրոսյանը:

8 ձայն ստացել էր նախկին վարչապետերից Արամ Սարգսյանը՝ Վազգեն Սարգսյանի եղբայրը:

11 հոգի վարչապետի պաշտոնին կցանկանային տեսնել գործող նախագահ Սերժ Սարգսյանին:

ՀՀ 2-րդ նախագահ Ռոբերտ Քոչարյանի օգտին ստացված  ձայների թիվը 13 էր:

9 մարդ կցանկանար վարչապետի պաշտոնին տեսնել Ստեփան Դեմիրճյանին՝ Կարեն Դեմիրճյանի տղային:

2 հոգի նախընտրել են Րաֆֆի Հովհաննիսյանին եւ 1-ակական մարդ՝ Հրանտ Բագրատյանին ու Վարդան Օսկանյանին:

19 ձայն էր ստացել գործարար Ռալֆ Յիրիկյանը («Վիվասել» ընկերություն) եւ 8 ձայն ստացել էր մեկ այլ գործարար՝ Գագիկ Ծառուկյանը:

26 ձայն եկել էր հօգուտ կադաստրի կոմիտեի նախկին ղեկավար, տրանսպորտի եւ կապի նախկին նախարար Մանուկ Վարդանյանի:

27 ձայն էլ եկել էր, այսպես ասենք, «նոր դեմք­ի» օգտին:

Սեփ. լրատվություն

Նոր շարժու՞մ, թե՞ նոր կոալիցիա, թե՞ նոր կառավարություն

Նախագահը ստորագրել է Տիգրան Սարգսյանին վարչապետ նշանակելու մասին հրամանագիրը՝ ղեկավարվելով ՀՀ Սահմանադրության 55-րդ հոդվածի 4-րդ կետով: Հրամանագիրն ուժի մեջ է մտել ստորագրման պահից:

Մի քիչ իշխանություն եւ մի քիչ ընդդիմություն «ապրելակերպը» որդեգրած ԲՀԿ ներկայացուցիչ, պատգամավոր Նաիրա Զոհրաբյանը սկսել է թվարկել, թե ինչի համար է վերանշանակվել վարչապետը՝ հատկապես ընդգծելով, որ այսպես իշխանությունները ուղերձ հղեցին հասարակությանը, որ իրենք գոհ են ստեղծված իրավիճակից ու փոփոխության կարիք չեն տեսնում: Իսկ ԲՀԿ-ական Վարդան Օսկանյանն իսկական ընդդիմադիրի կեցվածքով ասել է, թե մեր երկրում առկա խնդիրների հիմնական պատճառներից մեկը «քաղաքական մենաշնորհն է, քանի դեռ չենք ձերբազատվել մենաշնորհից, ոչ մի փոփոխություն էլ չի լինելո­ւ» եւ չի մոռացել հիշեցնել, որ քվեարկելով ԲՀԿ-ի օգտին՝ կտեսնենք փոփոխությունը…

Ամենաարագ արձագանքն ինչպես միշտ համացանցում է լինում եւ վարչապետի վերանշանակումը արագ ստացավ «…Յոլա տանելու վարչապետ» բնորոշումը: Կարծիքներ եղան. թե այնպիսի կուսակցություն, ինչպիսին ՀՀԿ-ն է, ուր ներքին վերահսկողական եւ հակակշռման մեխանիզմները բացակայում են, բացակայում է վարչապետի 2-րդ թեկնածուն, որպեսզի առաջադրվի, եւ ներքին քննարկումների ու քվեարկության արդյունքում որոշեն առավել արժանավորին: Եվ ահա մեկ մարդու պես քվեարկել են կողմ: Պարզվում է, գոհ են վարչապետից, եւ ՀՀԿ ԳՄ նիստից հետո ՀՀԿ մամուլի խոսնակ Էդուարդ Շարմազանովը հայտարարել է. «Տիգրան Սարգսյանի կառավարությունը կարողացել է լուծել հիմնական մարտահրավերները: 2012-ին նախագահը հստակ խնդիր էր դրել, որ տնտեսական աճը լինի ոչ պակաս, քան 7%, եւ բոլոր խնդիրներով հանդերձ՝ վարչապետին դա հաջողվեց: Այս անգամ եւս նախագահը խնդիր է դրել վարչապետի առջեւ, որ տնտեսական աճը 7%-ից պակաս չլինի»:

Տնտեսական աճը 7% է, որովհետեւ այդպիսի խնդիր է դրել նախագա՞հը: Եվ մարդկանց հետաքրքրում է, եթե Սերժ Սարգսյանը խնդիր դնի, որ տնտեսական աճը պետք է լինի 17%, վարչապետը այդպիսի արդյո՞ւնք ցույց կտա: Իհարկե, շատերն են համոզված, որ «7 թիվը նկարողը կարող է դիմացն էլ 1 ավելացնել», բայց որ ի՞նչ: Հայաստանում քաղաքացին մաշկի վրա չի զգում ո՜չ միանիշ, ո՜չ էլ երկնիշ թվերով տնտեսական աճը:

Մարդկանց մոտ թերեւս այն տեսակետն է իշխում, որ կառավարությունը տապալվել է, եւ միակ մեղավորը առաջիկա 5 տարիներին եւս շարունակելու է մնալ, ինչպես դեռ մնում է 2009թ. սկսած համաշխարհային ֆինանսատնտեսական ճգնաժամը:

Իհարկե, ի կատարումն Սահմանադրության պահանջների՝ նախագահը խորհրդակցություններ է անցկացրել ԱԺ պատգամավորական խմբակցությունների հետ՝ վարչապետի նշանակման նպատակով: Բայց ոչ բոլորն են հանդիպել: ՀԱԿ եւ «Ժառանգություն» խմբակցությունը մերժել են, իսկ ահա ՀՀԿ-ից բացի, հրավերն ընդունել են ՀՅԴ-ն, ԲՀԿ-ն եւ ՕԵԿ-ը խմբակցությունների ղեկավարները:

Ըստ որոշ տեղեկությունների, Սերժ Սարգսյանի հետ հանդիպել է նաեւ Գագիկ Ծառուկյանը եւ քննարկվել է վարչապետի նշանակման հարցը: Կարծիքներ կան, որ քննարկել է նաեւ Երեւանի քաղաքապետի ընտրություններից հետո նոր կազմավորվող կոալիցիայի կամ կառավարության կազմում բարգավաճականների հնարավոր մասնակցության հարցը:

ԲՀԿ-ի հետ միասին այս տարիներին վարչապետի փոփոխման համար պայքար էր մղում նաեւ Դաշնակցությունը, սակայն, կարծես մենակ մնալու խնդիր է ծագել: Չնայած ՀՅԴ անդամներից ոմանց խոսքով, ԲՀԿ-ի հետ առաջիկայում վարչապետի փոփոխության պահանջին կլծվեն: Շարժում է նախաձեռնվելու, որի «հզորությունից կախված, իսկ այդ ուժը կգործի հուժկու ճնշումով, պետք է սա այն վերածվի իշխանություններին անվստահություն հայտնելու հանրաքվեի եւ այդ ժամանակ բոլորն էլ կմիավորվեն»:

Բայց ԲՀԿ ղեկավարի՝ ՀՀ նախագահի հետ հանդիպելը (մինչ այդ խոսվում էր նաեւ Գագիկ Ծառուկյանի եւ Տիգրան Սարգսյանի հանդիպման մասին), հուշում է, թե դժվար «այդ շարժման ուժը կգործի հուժկու ճնշումո­վ»: Հատկապես, որ ԲՀԿ նախագահը շարունակում է հանդիպել նաեւ բարձրաստիճան պաշտոնյաների հետ, ինչը ԲՀԿ-ականները զուգահեռ համառորեն հերքում են: ՀԱԿ-ը եւս նախատեսել է նոր ընդդիմադիր շարժում սկսել, չնայած «Ժառանգությունը» դեռ հույս ունի պահպանել իր ընդդիմադիր առաջնությունը:

Ամեն դեպքում վարչապետ Տիգրան Սարգսյանը կարողացավ նաեւ համոզիչ երեւալ արեւմտյան եւ ռուսաստանյան քաղաքական ուղղությունների համար, ինչն էլ ներքաղաքական ասպարեզում նրան անմրցակից դարձրեց: Բայց լուրեր են պտտվում, թե նախագահ Սարգսյանը փոփոխության է ենթարկելու նաեւ նոր կառավարության կազմը:

Ի դեպ, բացի վարչապետից, իրենց պաշտոններում վերանշանակվել են միայն պաշտպանության եւ արտաքին գործերի նախարարներ Սեյրան Օհանյանն ու Էդվարդ Նալբանդյանը:

ԳոհարՎանեսյան

«Լուսանցք» թիվ 15 (278), 2013թ.

Կարդացեք «Լուսանցք»-ի PDF տարբերակները www.hayary.org -ի «Մամուլ» բաժնում

Այս գրառումը հրապարակվել է Հոդվածներ խորագրում։ Էջանշեք մշտական հղումը։