Մասոնները բացահայտ քայլե՞ր են անում

Խոսքն առայժմ հայաստանցի մասոնների մասին չէ, ովքեր հոկտեմբերի 9-ին «աներեւութաբար» մասնակցեցին ֆրանսիական «Մեծ Արեւելք» մասոնական օթյակի գաղտնի ժողովին, որն անց է կացվել «Մարիոթ Արմենիա» հյուրանոցում: Այս հյուրանոցը վաղուց է վերածվել նման ուժերի հավաքատեղիի: Հոկտեմբերի 10-ի ժողովը կարծես թե մի քիչ «թափանցիկ» է եղել, որին հիմնականում մասնակցել են սփյուռքահայեր, առավելապես՝ ֆրանսահայեր, մասնակցել են նաեւ այլազգիներ:

Ժողովները երկարատեւ են եղել՝ առավոտից մինչ երեկո, անց են կացվել «Աշոտ Երկաթ» եւ «Լեւոն Կիլիկացի» սրահներում, մասոնական ծիսակարգին համապատասխան՝ խորհրդանիշերով, հագուկապով եւ այլն:

Հայաստանում ֆրանսիական ու ամերիկյան մասոնական օթյակներն արդեն գործում են գրեթե կիսագաղտնի եւ աշխուժանում են հատկապես մեր երկրի համար բախտորոշ ժամանակներում: Նման աշխուժացում նկատվել էր նաեւ ՀՀ ԱԺ ընտրություններից առաջ, եւ ահա ՀՀ նախագահի ընտրությունից ամիսներ առաջ նման հավաքը նույնպես պատահական չէ:

Հիշեցնենք, որ նման օթյակներին ժամանակին տեղ են տվել ոչ միայն այսպես կոչված ժողովրդավարական երկրների ղեկավարները, այլեւ՝ Նապոլեոնը, Մուսոլինին, Հիտլերը եւ Ստալինը… սակայն, հետո սրանց դեմ կատաղի պայքար են մղել՝ երկիրը միջազգային սարդոստայնից դուրս բերելու, անկախ ապրելու համար…

Հայկ Թորգոմյան