ԵՏՄ օրենքները.- Մեկին հազար ձի ու ջորի, մեկին ոչ ուլ մի, ոչ մաքի… Գոնե այս անգամ… Փնտրել ես, գտել ես ո՞չ – Ասում են թուրքական որեւէ ընկերության շինարարության թույլտվություն չի տրվել…

Մեկին հազար ձի ու ջորի, մեկին ոչ ուլ մի, ոչ մաքի

Կառավարությունը երեկ հավանություն տվեց «Հայաստանի Հանրապետության՝ «Եվրասիական տնտեսական միության մասին» 2014թ. մայիսի 29-ի պայմանագրին միանալու մասին» պայմանագրի նախագծին:

Ինչպես սահմանում է «Հայաստանի Հանրապետության՝ «Եվրասիական տնտեսական միության մասին» 2014թ. մայիսի 29-ի պայմանագրին միանալու մասին» պայմանագրի փաստաթղթի 1-ին հոդվածը« այս պայմանագրի ուժի մեջ մտնելու պահից Հայաստանը դառնում է Եվրասիական տնտեսական միության անդամ:

Այս պայմանագրում ուշագրավ մի կետ կար, ըստ որի 2015-2025թթ. ժամանակահատվածում թույլատրվում է մեր երկրի տարածքում արտադրական վերամշակման համար 1701 13 եւ 1701 14 ԵԱՏՄ ԱՏԳ ԱԱ ենթակետով՝ եղեգնի շաքարի հումքի (հում շաքար) ներմուծումը՝ ազատելով ներմուծման մաքսատուրքերի գանձումներից:

ՀՀ տարածքում արտադրական վերամշակման համար շաքարի հումքի ներմուծման պայման է ներմուծվող շաքարի հումքի նպատակային օգտագործման մասին ՀՀ իրավասու մարմնի կողմից հաստատման առկայությունը՝ շաքար վերամշակող ձեռնարկությունների ապահովման համար:

ՀՀ-ն տեղեկացնում է ԵՏ հանձնաժողովին արտադրական վերամշակման համար շաքարի հումքի ներմուծման տարեկան ծավալների մասին՝ շաքարի օգտագործման եւ գալիք ժամանակահատվածի համար ձեւավորվող արտադրության մնացորդի համապատասխան: ՀՀ-ն նաեւ երաշխավորում է« որ արտադրական վերամշակման համար ներմուծվող շաքարի հումքը« ինչպես նաեւ դրույքաչափային արտոնությունների կիրառմամբ ներմուծվող շաքարի հումքից պատրաստված սպիտակ շաքարը« չեն փոխադրվի Բելառուս, Ղազախստան եւ Ռուսաստան:

Պայմանագրի ուժի մեջ մտնելու ժամկետից 2 տարվա ընթացքում թույլատրվում է սպիտակ շաքարի ներմուծումը՝ ԵԱՏՄ ԱՏԳ ԱԱ 1701 99 100 1 եւ 1701 99 100 9 ենթակետերով« մաքսային արժեքի 10 տոկոսի  չափով եւ ոչ ավել քան տարեկան 4000 տոննա ծավալով ներմուծման մաքսատուրքի վճարմամբ:

Սպիտակ շաքարի ներմուծման պայման է ՀՀ-ի լիազորված մարմնի կողմից ներմուծման համար տրված թույլտվությունը:

Աստղինե Քարամյան

Գոնե այս անգամ

Գործադիրը երեկ որոշեց, որ Գյումրու քաղաքապետի կողմից 2008թ. նոյեմբերի 1-ի դրությամբ հաստատված՝ երկրաշարժի հետեւանքով անօթեւան մնացածների խնդիրները կլուծվեն բնակարանների գնման վկայագրերի (ԲԳՎ) միջոցով՝ բնակարան ձեռք բերելու համար ֆինանսական աջակցության տրամադրմամբ: Վկայագրերի տրամադրման գործընթացը Շիրակի մարզպետին վերապահվեց: Այդ նպատակով մարզպետարանին կհատկացվի 1 մլրդ 500 մլն դրամ:

Քաղաքաշինության նախարարը վստահեցրեց, որ ծրագիրն իրատեսական է, եւ 2015թ. արդեն մենք Գյումրիում անօթեւան ընտանիքներ չենք ունենա:

Իսկ 2016թ. վերջին ընդհանրապես կարող ենք վերջակետ դնել աղետի գոտու նմանատիպ խնդրին:

Փնտրել ես, գտել ես ո՞չ

Երեկ քաղաքաշինության նախարար Նարեկ Սարգսյանին հարցրի, թե իրականությանը համապատասխանու՞մ են այն լուրերը, որ Երեւանում թուրքական մի ինչ-որ ընկերություն բնակելի շենք է կառուցում:

Ի պատասխան նախարարը նկատեց, թե այդ մասին տեղեկացել է մամուլից եւ անմիջապես հանձնարարել է ստուգել տեղեկատվությունը: «Մենք դիմել ենք Երեւանի քաղաքապետարանին՝ որպես մայրաքաղաքի տարածքում շինթույլտվություններ տրամադրող մարմնի, եւ պարզվել է, որ թուրքական որեւէ ընկերության շինարարության թույլտվություն չի տրվել: Նույն պատասխանը ստացանք մարզպետարաններից: Հետեւաբար, Հայաստանում Թուրքիայից կառուցապատողներ չկան»:

Սեփ. լրատվություն

- – – – – – – – – – – – – – – – – – – – – – – – – – – – – – – – – – – – – – – – – – – – – – – – – – – -

Գժվե՛լ ենք. Երեւանում թու՞րքն է տուն կառուցում – «300 հազար մարդ սպասում է մեր տներին»,- ասում է թուրքը: Իսկ այդ տները մինչեւ վերջ կանգուն կմնա՞ն 300.000 հայի համար…

Թուրքական շինարարական ընկերությունը Հայաստանի մայրաքաղաք Երեւանում բնակելի շենք է կառուցում:

Այսպիսի հայտարարություն է արել Համաշխարհային բանկի հետ համատեղ Աֆրիկայում խոշոր շինարարական նախագծեր իրականացրած թուրքական «Օզթյուրքլեր հոլդինգ»-ի գործադիր խորհրդի նախագահ Յուսուֆ Օզթյուրքը:

Նա նշել է, որ հետագայում նախատեսում է շինարարական ոլորտում ընդլայնել իր գործունեությունը Հայաստանում (թուրքական «Սաբահ» պարբերականի հղումով):

«Ներկա պահին Երեւանում սկսել ենք բնակելի շենքի շինարարություն: Առաջին թուրքերն ենք, որ աշխատում ենք այստեղ: Երկիրը փոքր է, բայց աներեւակայելի հնարավորություններ կան: Փորձում ենք հիմնել հանրային բնակարանային կառավարման համակարգ: Ստացված եկամուտը պիտի ներդնենք նախագծի մեջ:

Առաջին փուլի համար նախատեսված է 5000 տուն, բայց ընդհանուր առմամբ մոտ 300 հազար մարդ է սպասում մեր տներին»,- ասել է Յուսուֆ Օզթյուրքը:

ՀՀ քաղաքաշինության նախարարությունից լրատվամիջոցներին հայտնել են, որ նման անունով որեւէ կազմակերպություն Երեւանում որեւէ ծրագիր չի իրականացնում: Սակայն վերջնական պատասխան խոստացել են տրամադրել ավելի ուշ՝ քաղաքապետարանի համապատասխան բաժնի հետ հարցը պարզելուց հետո:

«300 հազար մարդ սպասում է մեր տներին»,- ասում է թուրքը: Իսկ այդ տները մինչեւ վերջ կանգուն կմնա՞ն 300 հազար հայի համար:

Արդյո՞ք շարունակելու ենք դասեր չքաղել մեր պատմությունից՝ հավատալով, որ թուրքը շինարար է նաեւ հայի ապագայի համար… Մի՞թե այս աշխարհում ամենաարդարն ու ամենաիմաստունը հենց թուրք շինարարներն են: Եթե ամենաէժանն են, ապա դա էլ ի՛ր գինն ունի՝ այդ տները երկար կյանք չեն կարող ունենալ…

Անի Մարության

«Լուսանցք» թիվ 31 (336), 2014թ.

Կարդացեք «Լուսանցք»-ի PDF տարբերակները www.hayary.org-ի «Մամուլ» բաժնում

Այս գրառումը հրապարակվել է Հոդվածներ խորագրում։ Էջանշեք մշտական հղումը։