«Քարերի սիմֆոնիա». ով ոչնչացնի, ում գլխին ջարդեն

ՀՀ բնապահպանության նախարարության աշխատակազմի բնապահպանական պետական տեսչության Կոտայքի տարածքային բաժնի պետ Մ. Վանոյանը ընթացիկ տարվա հոկտեմբերի 22-ին ՀԱՄ ԳԽ–ին պատասխանել էր. «Հայտնում ենք, որ Գառնի գյուղի Ազատ գետի կիրճում «Քարերի սիմֆոնիա» կոչվող քարաժայռերից քարերի պոկման եւ անօրինական տեղափոխման հետ կապված տեղեկացնում ենք, որ նախարարության տեսչական համակարգը անմիջապես արձագանքել է ահազանգին եւ 11.10.07թ., ժամը 16:30-ի սահմաններում հայտնաբերել է, որ Կոտայքի մարզի Ջրվեժ գյուղի բնակիչ Ռազմիկ Սիմոնյանը իր անձնական ավտոմեքենայով նշված տարածքից տեղափոխում է բազմակողմ բնական քարեր: Կազմվել է համապատասխան արձանագրություն, եւ նյութերը տրամադրվել են Կոտայքի ոստիկանության բաժին՝ գործին հետագա ընթացք տալու համար: Միաժամանակ համապատասխան գրությամբ փաստի վերաբերյալ տեղեկացվել է Կոտայքի մարզի Գառնի գյուղի գյուղապետը: Համապատասխան հսկողություն չիրականացնելու համար իրականացվել է վարչական վարույթ՝ բացառելու նմանօրինակ իրավախախտումները նշված տարածքում»:

Հիմա՝ քանի որ բնության հուշարձան «քարերի սիմֆոնիան» ոչ բնապահպանության եւ ոչ էլ մշակույթի նախարարության հսկողության ներքո չէ, ուրեմն տեղական ինքնակառավարման մարմինների մասին օրենքի համապատասխան, «քարերի սիմֆոնիա»-ի համար պատասխանատու է այն ՏԻՄ-ը, որի վարչական տարածքում է գտնվում այս հուշարձանը: Ուրեմն՝ վարչական վարույթն իրականացվել է Գառնիի գյուղապետի՝ Աշոտ Վարդանյանի նկատմամբ: Տուգանքի չափը ճշտել չհաջողվեց. գյուղապետը շա~տ զբաղված մարդ է, տեղում չի նստում: Այնքան զբաղված, որ բջջային հեռախոսի զանգերին էլ չի պատասխանում… Լավ, ի՞նչ է ստացվում: Ստացվում է, որ պատժվեց Ջրվեժ գյուղի բնակիչը, որ տեղափոխել է քարերը: Անկեղծ ասած միանգամից կանխել եմ ուզում. քարերը կտրողներին էլ գուցե պետք չէ ձեռք տալ. նրանցից մեկի հետ խոսել եմ, ասաց՝ օրավարձով աշխատող բանվոր եմ: Նաեւ՝ դժվար չէր պարզել, թե Գառնում քարերն ում սեփական շինությունն են սպասարկում ու պարզելուց հետո էլ քանդել այդ շինությունը՝ հենց շինության տիրոջ հաշվին: Մնացյալը դատախազության գործն է ու պատժի չափն ու ձեւը մենք չէ, որ պիտի որոշենք: Մամուլում անուններ հայտնվեցին՝ ազգային պատկերասրահի տնօրեն Փարավոն Միրզոյանի եւ փոխվարչապետ Հովիկ Աբրահամյանի: Վերջիններս հերքեցին ու՝ վերջ: Թե այս խմորը դեռ ինչքան ջուր կվերցնի, պարզ չէ: Ու հերքումն էլ ճիշտ է թե սխալ… մեր գործը չէ մեղադրական ներկայացնելը, դրա համար համապատասխան մարմիններ կան: Մեր գործը փաստն արձանագրել է ու որոշակի հարցադրումներ անելը: