Ադրբեջանի նավթա-գազային քաղաքականության հնարավորությունները վաղուց են ուռճացված, եւ այս մասին «Լուսանցք»-ը պարբերաբար գրել է: Միջազգային խոշոր ընկերությունները այս տարիների ընթացքում մեկը մյուսի հետեւից լքեցին Ադրբեջանը՝ հասկանալով, որ Բաքուն չունի այնքան պաշարներ, որ կարողանա մրցակցել Ռուսաստանի կամ Իրանի հետ: Միայն Ղազախստանի եւ Թուրքմենստանի հետ համատեղ ծրագրերով կարող է Ադրբեջանը նավթա-գազային այնպիսի քաղաքականություն վարել, որը դառնա այլընտրանք Ռուսաստանի նկատմամբ:
Բայց Կասպիցծովյան ավազանում Մոսկվան դեռ կարողանում է զսպել թյուրքական երկրների համատեղ հանդես գալու ձգտումները, անգամ Իրանը, որ պատրաստ էր թյուրքական TANAP-ի հետ համագործակցել՝ հրաժարվեց առայժմ: Իհարկե այստեղ նաեւ Արեւմուտքի դանդաղկոտությունը կար՝ կապված Իրանի միջուկային ծրագրի հնարավոր ծավալումների հետ:
Այսօր այս խնդրի շուրջ մի նոր աղմուկ կա, բայց բոլորովին այլ իմաստով: Ադրբեջանի նավթային հիմնադրամը կարող է նախատեսված ծախսերից ավելի քիչ դրամական մուտքեր ունենալ, ինչի մասին ասվում է ադրբեջանական Haqqin.az պորտալի հոդվածում: «Նման հիվանդության ախտանիշներն արդեն ի հայտ են գալիս. 2014թ. 8 ամսվա ընթացքում Ադրբեջանի պետական նավթային հիմնադրամ դրամական մուտքերը կազմել են 10,1 մլրդ ԱՄՆ դոլարից քիչ ավել, իսկ հիմնադրամի ընթացիկ ծախսերն 2014-ի տվյալներով ծրագրված են 13,5 մլրդ դոլարի սահմաններում: Հիմնադրամը կկարողանա՞ լուծել այս խնդիրը եւ ի՞նչ կլինի մյուս տարի: Արդյունքում մեր պաշտոնյաների այդքան անհեռատես քաղաքականությունը սպառնում է Ադրբեջանի նավթային հիմնադրամն առհասարակ ձեռնունայն թողնել»,- նշված է հոդվածում:
Հետաքրքիր է, որ Ադրբեջանի պետական նավթային հիմնադրամի բյուջե ընդհանուր 91,13 մլրդ մանաթ (մոտ 92 մլրդ 95 մլն եվրո) մուտքից մնացել է ընդամենը 29,26 մլրդ մանաթ (29 մլրդ 84 մլն եվրո) եւ պարզ մի հարց է ծագում՝ որտեղ են մնացյալ 60% մուտքերը: «Ադրբեջանի պետական նավթային հիմնադրամի ընդհանուր բյուջետային ծախսերը կազմել են 59,26 մլրդ մանաթ (մոտ 60 մլրդ 44 մլն եվրո), իսկ արտաբյուջետային ծախսերը՝ 2,61 մլրդ մանաթ (2 մլրդ 66 մլն եվրո): Բայց որտե՞ղ են ծախսել այդքանը, այստեղ էլ պատասխանը պարզ է. 2013թ. սկզբից մինչեւ 2014թ. հոկտեմբերի 1-ը հիմնադրամից պետբյուջե միասնական տրանսֆերտը կազմել է 53 մլրդ 834,7 մլն մանաթ (մոտ 54 մլրդ 911 մլն եվրո): Այսինքն՝ հիմնադրամ մուտքերի մոտ 2/3-րդը վատնվել է բյուջեի ճեղքվածքները կարկատելու համար, ինչն, ըստ հոդվածագրի, բացարձակապես չի խոսում մեր ֆիսկալային օրգանների արդյունավետ աշխատանքի մասին, գրեթե 5,4 մլրդ դոլար էլ ծախսվել է հարկադիր վերաբնակիչների սոցիալական խնդիրները լուծելու, ինչպեսեւ մի շարք լայնամասշտաբ նախագծերի ֆինանսավորման համար»: Ինչպես նշված է, անգամ Ադրբեջանի ֆինանսների նախարար Սամիր Շարիֆովը խոստովանել է, որ ներկայումս նավթային հիմնադրամում ծախսերի ամենախոշոր բաժինը պետբյուջեին ուղղված տրանսֆերտներն են: Այդ նյութական միջոցներն ուղղվում են տարբեր նախագծերի իրականացմանը, սակայն նախարարը խոստացել է, որ աստիճանաբար նման նախագծերի թիվը կնվազի: «Դժվար թե այդ խոստումն առաջիկայում կատարվի. առաջիկա 3-4 տարիներին հիմնադրամի ծախսերը մնալու են նույն բարձր աստիճանի վրա, որպեսզի ապահովեն պետբյուջե փոխանցումների կեսը՝ ֆինանսավորելով SOCAR-ին «Շահդենիզ-2» ու Հարավային գազային նախագծի իրականացման, ինչպես եւ նոր լողացող հորատման սարքավորման կառուցման համար: Իրավիճակը վատթարանում է նրանով, որ համաշխարհային շուկայում նավթի գինը կտրուկ ընկնում է, նվազում են PSA պայմանագրերի շրջանակներում արտահանումների ծավալները»,- նկատել է Haqqin.az -ը:
Ստացվում է 190 մլրդ դոլարի ներդրումն Ադրբեջանի տնտեսությունում որակական փոփոխությունների չբերեց, ինչը առավել կխորացնի Բաքվի նավթա-գազային խնդիրները, անգամ խոսում են, թե նավթի գնի անկման հետեւանքով սոցիալական ծախսերի կրճատումը կարող է Ադրբեջանում հանգեցնել ժողովրդական հուզումների:
Բաքվում անցկացված Էներգետիկայի կարգավորման տարածաշրջանային միության 13-րդ տարեկան համաժողովին իր ելույթում Ադրբեջանի էկոնոմիկայի եւ արդյունաբերության փոխնախարար Նիյազի Սաֆարովը հայտնել է, որ անկախության տարիների ընթացքում երկրի տնտեսության մեջ 190 մլրդ ԱՄՆ դոլարից ավելի ներդրում է կատարվել: «Ազադլիգ» թերթը հաղորդում է, որ այս առիթով հարց է ուղղել տնտեսագետ-փորձագետ Նաթիգ Ջաֆարլիին, քանի որ 190 մլրդ դոլար ներդրումը փոքր թիվ չէ, արդյո՞ք այն երեւում է Ադրբեջանի ենթակառուցվածքներում, այլ խոսքերով՝ երկիրը նման է «190 միլիարդանոց հայրենիքի», թե ոչ: Փորձագետն ասել է, որ այդ ներդրումների մեծ մասն ուղղվել է նավթագազային հատվածին, նաեւ փոփոխություններ եղել են միայն այն առումով, որ որոշ հնացած ենթակառուցվածքներ վերանորոգվել են: Բայց շեշտել է. «Դպրոցների շինարարության եւ վերանորոգման դիմաց բարձրագույն հաստատություններ ընդունելության անցողիկ միավորները բավականաչափ իջեցվել են: Քանակական փոփոխությունները որակականի չեն բերել: Նույնն է նաեւ առողջապահության բնագավառում: Մեր քաղաքացիներն ախտորոշման եւ բուժվելու համար դեռեւս շարունակում են հարեւան երկրներ մեկնել»:
Այդչափ մեծ ներդրումը որակական փոփոխությունների եւ զարգացման չհանգեցրեց, ուստի ադրբեջանական «առաջավոր զարգացման» հերթական ծրագիրը եւս ձախողվեց, միջազգային գործընկերներին մեկ անգամ եւս համոզելով ադրբեջանական կառավարման համակարգի ոչ արդյունավետ ու կոռումպացված լինելու առումով:
Ադրբեջանում նախագահական ընտրություններից 1 տարի անց, երբ վերընտրվեց Իլհամ Ալիեւը, Դեմոկրատական ուժերի ազգային խորհուրդ ընդդիմադիր խմբավորումը Բաքվում ցույց է անցկացրել՝ ի նշան բողոքի իշխանությունների՝ երկրում ակտիվիստների աննախադեպ կոշտ հետապնդումների դեմ, ովքեր պարբերաբար հաշվետվություն են պահանջում երկրի պետբյուջեի ֆինանսները մսխումը կանխելու նպատակով:
Human Rights Watch միջազգային հեղինակավոր իրավապաշտպան կազմակերպության տվյալներով՝ Եվրոպայի խորհրդի նախարարների կոմիտեում Ադրբեջանի նախագահության ժամանակահատվածում երկրի իշխանությունները կտրուկ ուժեղացրել են բռնաճնշումներն ակտիվիստների նկատմամբ՝ ձերբակալելով նրանցից առնվազն 9-ին քաղաքական նկրտումներից ելնելով: Ձերբակալությունների ալիքը հանգեցրել է ոչ միայն միջազգային իրավապաշտպան կազմակերպությունների (օրինակ՝ Human Rights Watch), այլեւ Եվրոպական խորհրդարանի եւ ԱՄՆ նախագահ Բարաք Օբամայի քննադատությանը: Միաժամանակ Ադրբեջանում ԱՄՆ նախկին դեսպան Ռիչարդ Կոզլարիչը կոչ է արել Միացյալ Նահանգների իշխանություններին պատժամիջոցներ սահմանել Ադրբեջանի նկատմամբ: Ընդդիմության ցույցից մի քանի օր անց նախագահ Ալիեւը համաներում է ստորագրել, սակայն հենց նույն օրը նա փոփոխություններ է մտցրել հ/կ-ների գործունեությանը վերաբերող օրենքի այն կետում, որը վերաբերում է արտասահմանյան դոնոր կազմակերպություններից գրանտային գումարներ ստանալուն: «Բռնաճնշումների նման պատկերը, որն ուղեկցվում է հազվադեպ զիջումներով, հարում է Իլհամ Ալիեւին այդ պաշտոնում նախորդող հոր՝ Հեյդար Ալիեւի կառավարման փուլին»,- գրում են ադրբեջանական լրատվամիջոցները:
Ըստ այդ նյութերի, Ադրբեջանը բախվում է մեկ այլ՝ առավել լուրջ սպառնալիքի, խոսքը նավթի գնի անկման մասին է: Այսպես, 2014-ի հոկտեմբերի 22-ի դրությամբ նավթի գինը կազմում է 86,58 ԱՄՆ դոլար: 2013-ին Ադրբեջանում արտահանման ընդհանուր ծավալների 84,44%-ը բաժին էր ընկնում հում նավթին: Եթե նավթի գներն անկում ապրեն՝ նվազելով մեկ բալերն 80 դոլարից, ապա Ադրբեջանի պետբյուջեում կարձանագրվի ծախսերի նվազում: Դա էլ, իր հերթին, կարող է առաջ բերել սոցիալական կարիքներին բաժին ընկնող ծախսերի նոր անկմանը: Այդ գործընթացն էլ ունակ է 2015-ին խորհրդարանական ընտրությունների ժամանակահատվածում հանկարծակի կամ դրսի օժանդակությամբ արթնացնել նոր ժողովրդական հուզումներ, ինչպես դա գրանցվել էր 2012-ի մարտին Ղուբայում եւ 2013-ի հունվարին լեզգիաբնակ Իսմայիլիի շրջանում:
Աստղինե Քարամյան
«Լուսանցք» թիվ 37 (342), 2014թ.
Կարդացեք «Լուսանցք»-ի PDF տարբերակները www.hayary.org-ի «Մամուլ» բաժնում