Աշխարհի մարզական հեւքից.- Մեր շախմատիստի հաղթանակը – Նա կմեկնի Բաքու՝ աշխարհի գավաթի խաղերին… Հայ ֆուտբոլիստը եւս կմեկնի Ադրբեջան… Հայաստանի հավաքականը լուրջ մրցակից է… Այցելե՛ք www.hayary.org… Կարդացե՛ք եւ բաժանորդագրվե՛ք «Լուսանցք»…

Լեւոն Արոնյանը՝ սուպերմրցաշարի հաղթող

Հայաստանի հավաքականի առաջատար շախմատիստ Լեւոն Արոնյանը նվաճեց ԱՄՆ-ի Սենթ Լուիս քաղաքում անցկացվող Sinquefield Cup շախմատային սուպերմրցաշարի հաղթողի տիտղոսը: Սեպտեմբերի 1-ին անցկացվող վերջին՝ 9-րդ փուլում հայ գրոսմայստերը սեւերով 31-րդ քայլում ոչ ոքի խաղաց բուլղարացի Վեսելին Տոպալովի հետ եւ, վաստակելով 6 միավոր, անհասանելի դարձավ մրցակիցների համար: 3-րդ անգամ անցկացվող սուպերմրցաշարում Լեւոն Արոնյանը 9 փուլերում տարավ 3 հաղթանակ ու 6 խաղ ավարտեց ոչ ոքի: Նա սեւերով հաղթեց Ուեսլի Սոյին եւ Հիկարու Նակամուրային եւ սպիտակներով առավելության հասավ ԱՄՆ-ն ներկայացնող իտալացի Ֆաբիանո Կարուանայի նկատմամբ, ով մրցաշարի նախորդ առաջնության հաղթողն էր:

… Եվ 11-րդը՝ ՖԻԴԵ-ի վարկանիշային աղյուսակում

Շախմատի միջազգային ֆեդերացիան սեպտեմբերի 1-ին հրապարակել է վարկանիշային դասակարգման նոր՝ թարմացված աղյուսակը: Լեւոն Արոնյանը զբաղեցրել է 11-րդ հորիզոնականը: Նրա վարկանիշը կազմում է 2765 միավոր: 1-ին հորիզոնականում շարունակում է մնալ աշխարհի չեմպիոն, նորվեգացի Մագնուս Կարլսենը:

Լավագույն եռյակում են՝ հնդիկ Վիշվանաթան Անանդը եւ բուլղարացի Վեսելին Տոպալովը: 100 լավագույն գրոստմայստերների ցանկում են նաեւ Գաբրիել Սարգսյանը եւ Սերեգեյ Մովսեսյանը, նրանք համապատասխանաբար զբաղեցնում են 61-րդ եւ 89-րդ տեղերը:

Կփորձեմ Բաքվում հանդես գալ ինչպես խաղաղություն բերող երաժիշտները

Սենթ Լուիսի սուպերմրցաշարի հաղթող Լեւոն Արոնյանը մեկնաբանել է առաջիկայում Բաքվում կայանալիք շախմատի Աշխարհի գավաթին իր մասնակցությունը: «Մեկ շաբաթից մեկնում եմ Բաքու, իսկ Աշխարհի գավաթից հետո կխաղամ արագ շախմատի Աշխարհի առաջնությունում, որը տեղի կունենա Բեռլինում: Ցավոք, շախմատիստների համար դժվար է երկրների միջեւ հակամարտություններ կարգավորելը: Բայց չէ՞ որ երաժիշտները, արվեստի տարբեր ճյուղերի ներկայացուցիչները գալիս են Ադրբեջան. մարդիկ, ովքեր բերում են խաղաղություն, եւ ես պատրաստվում եմ հետեւել նրանց օրինակին: Կփորձեմ ցույց տալ, որ ես հարգում եմ հարեւան երկրին, գործի դնել շախմատում իմ լավագույն կարողությունները եւ հաճույք պատճառել տեղի երկրպագուներին»,- chess-news.ru-ի հետ զրույցում նշել է հայազգի գրոսմայստերը:  Հայաստանն աշխարհի գավաթի խաղարկությունում ներկայացնելու են գրոսմայստերներ Լեւոն Արոնյանը, Գաբրիել Սարգսյանը, Հրանտ Մելքումյանը եւ Սամվել Տեր-Սահակյանը: 1-ին մրցափուլում միմյանց դեմ հանդիպելու են՝ Լեւոն Արոնյան–Միքայել Վիդենկելլեր, Գաբրիել Սարգսյան-Մատեուշ Բարտել, Հրանտ Մելքումյան-Գատա Կամսկի, Սամվել Տեր-Սահակյան-Նիկիտա Վիտյուգով: Մասնակիցների մեջ են նաեւ ԱՄՆ-ն ներկայացնող հայազգի գրոսմայստերներ Վարուժան Հակոբյանն ու Սամուել Սեւյանը:

Վարուժան Հակոբյանի մրցակիցը կլինի Չեխիայի ներկայացուցիչ Վիկտոր Լազիչկան, իսկ Սամուել Սեւյանինը՝ ադրբեջանցի Թեյմուր Ռաջաբովը: Աշխարհի գավաթի խաղարկությանը մասնակցում են 128 շախմատիստներ: Յուրաքանչյուր մրցամարտի ժամանակ կողմերը խաղալու են 2 խաղ՝ մեկական սպիտակ եւ սեւ գույներով: Հավասար՝ 1:1 հաշվի դեպքում, կանցկացվեն լրացուցիչ պարտիաներ, արդեն արագ եւ անհրաժեշտության դեպքում նաեւ կայծակնային խաղի կանոններով՝ մինչեւ կորոշվի հաղթողը: Պայքարն ընթանալու է նոկաուտ համակարգով՝ պարտվողը դուրս է մնալու հետագա պայքարից:

Հայ ֆուտբոլիստը եւս կմեկնի Ադրբեջան

Ադրբեջանի ԱԳ նախարարության մամուլի ծառայության ղեկավար Հիքմեթ Հաջիեւը մեկնաբանել է Դորտմունդի «Բորուսիայի» կազմում հայ կիսապաշտպան Հենրիխ Մխիթարյանի՝ Ադրբեջան այցելության հետ կապված իրավիճակը: «Ուրախալի է, որ Եվրոպայի լիգայի խմբային փուլում մեր երկիրը միանգամից 2 ակումբներ են ներկայացնում՝ «Ղարաբաղ»-ն ու «Գաբալա»-ն: Յուրաքանչյուր երկիր, որը հանդես է գալիս ՈՒԵՖԱ-ի հովանու տակ անցկացվող մրցաշարերում, պարտավորվում է կատարել ընդհանուր կանոնները և համաձայն դրանց է անցկացնում տնային խաղերը: Ֆուտբոլի յուրահատկությունը թիմային խաղի մեջ է: Այստեղ հիմք են ընդունվում ոչ թե անձերը, այլ թիմը: Ստացվում է՝ Ադրբեջան է այցելելու ոչ թե առանձին անձը, այլ թիմը՝ Դորտմունդի «Բորուսիա»-ն:

Մենք չենք քաղաքականացնում սպորտը եւ այն չենք օգտագործում քաղաքական նպատակներով: Իսկ ինչ վերաբերում է Ադրբեջանի ԱԳՆ-ի «սեւ ցուցակին», ապա այստեղ գործը դիտարկվում է մասնավոր կարգով»,- նախարարի խոսքերը մեջբերել են ադրբեջանական ԶԼՄ-ները: Ավելացնենք, որ «Գաբալա»-ն «Բորուսիա»-ին կհյուրընկալի հոկտեմբերի 10-ին:

Հայաստանի հավաքականը լուրջ մրցակից է…

«Հայաստանի հավաքականը, չնայած հեղինակավոր թիմերի թվին չի պատկանում, սակայն բավական լուրջ մրցակից է: Հայ ֆուտբոլիստները ֆիզիկապես լավ են պատրաստված եւ հստակ գիտեն իրենց պարտականությունները: Սակայն այս խաղում մեզ անպայման հաղթանակ է հարկավոր, որպեսզի թիմը հետագայում վստահություն ձեռք բերի», – Եվրո-2016-ի ընտրական փուլի Սերբիա – Հայաստան ֆուտբոլային հանդիպումից առաջ կազմակերպված մամուլի ասուլիսում ասել է դաշտի տերերի հավաքականի գլխավոր մարզիչ Ռադովան Չուրչիչը:

Թիմի ավագ Բրանիսլավ Իվանովիչը, մեկնաբանելով առաջիկա խաղը, նշել է, որ այն կարեւոր նշանակություն ունի հենց իրենց՝ ֆուտբոլիստների համար:

«Մեր ֆուտբոլիստները կարծես կորցրել են վստահությունն իրենց ուժերի նկատմամբ: Այն վերագտնելու համար մեզ անհապաղ հարկավոր է հաղթանակ տոնել: Միայն այդպես կարող ենք կրկին բարձրացնել Սերբիայի հավաքականի իմիջն աշխարհում» – ասել է Լոնդոնի «Չելսիի» պաշտպանը:

Նշենք, որ Եվրո-2016-ի ընտրական փուլի Սերբիա – Հայաստան խաղը տեղի կունենա սեպտեմբերի 4-ին, Նովի Սադում:

Հ.Գ. – Ցավոք, մեր հավաքականը այս անգամ էլ չխուսափեց պարտությունից, եւ հավասար խաղի պայմաններում պարտվեց 0:2 հաշվով:

Էդգար Ստեփանյանը աշխարհի փոխչեմպիոն

Աստանայում կայացավ հեծանվավազքի աշխարհի երիտասարդական առաջնությունը (տրեկ), որին մասնակցում էին 32 երկրների հեծանվորդներ: Հայաստանը ներկայացնում էին Եվրոպայի այս տարվա չեմպիոն Էդգար Ստեփանյանն ու Պավել Ստեփանյանը, մեր պատվիրակության կազմում են նաեւ հավաքականի գլխավոր մարզիչ Արմեն Գյոզալյանը, Արսեն Բորյանը (մեխանիկ), Արթուր Ղազարյանը (բժիշկ-մերսող):

25 կմ (100 շրջան) խմբակային հեծանվավազքի մրցումները. Էդգար Ստեփանյանը գերազանց է հանդես եկել ու նվաճել է արծաթե մեդալ՝ արժանանալով աշխարհի փոխչեմպիոնի կոչումը :Մեր հեծանվորդները մասնակցել են նաեւ մի քանի այլ մրցումների:

* * *

Հայ Արիական Միաբանության պաշտոնական կայքը տրամադրում է գովազդային վահանակի տեղ:

Ցանկացողները կարող են զանգահարել հետեւյալ հեռախոսահամարով՝ (0.10) 52-38-75, կամ գրել redaction@hayary.org եւ hayaryan@gmail.com էլ.հասցեներով:

Ի դեպ, ՀԱՄ կայքը google-ի ռեյտինգային համակարգում ստացել է 6 բալ, որը բավականին բարձր ցուցանիշ է:

Կայքը եռալեզու է եւ ունի այցելուներ շուրջ 150 երկրից:

Այնպես որ, տեղադրե՛ք Ձեր գովազդը եւ մի՛շտ մնացեք Ձեր բարձունքին մե՛ր օգնությամբ:

www.hayary.org-ի համակարգող

* * *

«Լուսանցք»-ի բաժանորդագրության համար դիմել`

«Պրես Ստեն­դ»՝     54-41-99                 «Բլից մեդի­ա»՝ 52-53-01

«Հայփոստ»՝           51-45-01                «Հայմամուլ»՝   58-94-12

«Պրես Ատտաշ­ե»՝ 32-03-74                 «Լուսանցք»՝     52-38-75

* * *

1 տարվա բաժանորդագրության գինը՝ 4800 դրամ

6 ամսվա բաժանորդագրության գինը՝ 2400 դրամ

3 ամսվա բաժանորդագրության գինը՝ 1200 դրամ

1 ամսվա բաժանորդագրության գինը՝ 400 դրամ

- «Լուսանցք»-ը աշխատանքի է հրավիրում շրջիկ լրագրավաճառի եւ գովազդային գործակալի՝ շահավետ պայմաններով: Դրանց ծանոթանալու համար այցելել խմբագրություն:

- «Լուսանցք»-ում կատարում են մեքենագրական եւ խմբագրական աշխատանքներ:

«Լուսանցք» թիվ 29 (375), 2015թ.

Կարդացեք «Լուսանցք»-ի PDF տարբերակները www.hayary.org-ի «Մամուլ» բաժնում

Այս գրառումը հրապարակվել է Հոդվածներ խորագրում։ Էջանշեք մշտական հղումը։