Էլէներգիայի սպառման եւ վճարումների հետ կապված ստվերը արդեն առկա է… Միջազգային տնտեսական ոչ մի կանոն մեզ մոտ չի գործում, բայց ինչու՞ ենք հանկարծ կրում միջազգային տնտեսական պատերազմի ազդեցությունը…..

Տնտեսական պատերազմի հայկական ստվերը

Վարչապետ Հովիկ Աբրահամյանը վստահ է, որ ««Հայաստանի էլեկտրական ցանցեր» ընկերության սեփականատերերի փոփոխության արդյունքում կորուստները կհասցվեն նվազագույնի, կվերանա, ինչպես ասում են, թալանը, եթե եղել է այդպիսի բան»: Նա ասել է, որ իշխանությունները խնդրել են գործարար Սամվել Կարապետյանին՝ գնալ այս քայլին՝ գնել ՀԷՑ-ը:

«Ես համոզված եմ, որ այն քայլը, որ ինքը համաձայնվեց կառավարության հետ հավասար պայմաններում մինչեւ եկող տարվա օգոստոսի 1-ը սուբսիդավորենք 604 հազար ընտանիքների, իսկ մենք ունենք 766 հազար բաժանորդներ, դա մեծ քայլ էր: Մոտ 7-8 մլրդ. դրամ փող կլինի տարվա կտրվածքով, որ մենք կվճարենք մեր հասարակությանը: Ինչ-որ տեղ սոցիալական խնդիրները կմեղմենք»,- հավելել է կառավարության ղեկավարը:

Սակայն կառավարության որոշումը որոշակի սողանք է ստեղծել: Եթե այդ որոշումը միայն մի կերպ գոյատեւողների համար է կայացվել, ապա նորմալ է: Ոչ մի գոյատեւող չի սպառի 250կվտ-ից ավելի էլէներգիա եւ «կտեղավորվի» կառավարության բարեհոգության սահմաններում: Բայց հատկապես ձմռանը մեր բնակչության մեծ մասը կսպառի 250կվտ-ից ավելի էլէներգիա, եւ հասկանալի է՝ ինչ կլինի: Կամ՝ որոշումը պիտի վերանայել, որ բնակչությունը թանկ կվճարի միայն 250կվտ-ից ավել սպառածի համար՝ ոչ թե ավելի դեպքում՝ ամբողջի համար: Կամ, ինչպես ժողովուրդն է ասում, էլեկտրիկների գործը կծաղկի՝ կուզեն մի քիչ հավելագրում կանեն, կուզեն՝ ոչ: Եվ այսպես կնստենք ստվերի վրա կամ տակ…  Իսկ ստվերի մասին վարչապետն ասել է, որ այս կիսամյակի ընթացքում ստվերի դեմ պայքարի արդյունքում արդեն իսկ 20 մլրդ դրամ լրացուցիչ եկամուտ է ուղղվել երկրի պետական բյուջե: Եթե դիտարկենք վերոնշյալ էլեկտրիկների տարբերակով, ապա կարող ենք ենթադրել, թե ինչքա՜նն էլ այլ տեղ է ուղղվել…

«Ինձ ֆինանսների նախարարը զեկուցել է, որ կիսամյակի ընթացքում 20 մլրդ. դրամ արդեն այդ ոլորտից մենք ունենք լրացուցիչ եկամուտներ՝ ստվերից: Դա շարունակական պրոցես է, եւ մենք շարունակելու ենք պայքարել, եւ ես կարծում եմ, որ մենք հաջողություն կունենանք»:

Չեմ կարող չասել, որ միայն էլէներգիայի սպառման եւ վճարումների հետ կապված ստվերը արդեն առկա է, մնում է տեսնել կամ՝ չնկատել: Եթե մեր բնակչության զգալի մասը, ասենք՝ 80-90 տոկոսը «տեղավորվի» 250 կվտ-ից ցածր վճարումների ցուցակում, ապա կամ ստվերն է այդ ընթացքում կերել «կերվելիքը», կամ մեր բնակչությունը հիմնականում ձմեռն անցկացնում է սոված-ծարավ ու կիսասառած վիճակում:

Իսկ մեկնաբանելով այսօրինակ եւ այլ հնչող քննադատությունները, թե տնտեսական քաղաքականությունը ձախողված է, վարչապետը հորդորեց չշտապել: «Ես չեմ կարծում, որ որեւէ բան ձախողվել է, մեր ծրագիրը փորձելու ենք իրականացնել: Իհարկե, աշխարհում ընթացող տնտեսական պատերազմն իր բացասական ազդեցությունն է ունենալու Հայաստանի վրա, բայց մենք, մեր թիմը՝ նախագահի գլխավորությամբ, ամեն ինչ անելու ենք, որ հաղթահարենք սա»,- ԱԺ-ում կառավարության հետ հարց ու պատասխանից հետո ճեպազրույցում հայտարարել է նա:

Ըստ մեր վարչապետի՝ որեւէ մի կառավարության ղեկավար իրավունք չունի որեւէ ծրագրի շուրջ ունենալով հիասթափություն, անվստահություն, փորձի այդ ծրագիրն իրականացնել: Ինչը նշանակում է մի բան՝ մենք ունենք անսխալական եւ ամեն ինչը հաշվարկած կառավարություն, եւ սողանքներին ուշադրություն դարձնելու կարիք չկա:

Մնում է մի հարց՝ միջազգային տնտեսական ոչ մի կանոն իրականում մեզ մոտ չի գործում, այդ ինչու՞ հանկարծ կրում ենք միջազգային տնտեսական պատերազմի ազդեցությունը:

Անի Մարության

«Լուսանցք» թիվ 34 (380), 2015թ.

«Լուսանցք»- ի թողարկումները PDF ձեւաչափով կարող եք կարդալ www.hayary.org կայքի «Մամուլ» բաժնում, pressinfo.am պորտալում՝ հայկական եւ արտասահմանյան տպագիր մամուլի առցանց գրադարանում եւ pressa.ru-ում:

Այս գրառումը հրապարակվել է Հոդվածներ խորագրում։ Էջանշեք մշտական հղումը։