Հորդոր … եւ խուճապի չմատնվելու – Խոզի գրիպ կոչվածն արդյո՞ք մոլեգնում է Երեւանում: Պատկան մարմինը, համենայնդեպս, հորդորում է խուճապի չմատնվել, բայցեւ՝ զգոն լինել…

Խոզի գրիպ կոչվածն արդյո՞ք մոլեգնում է Երեւանում: Պատկան մարմինը, համենայնդեպս, հորդորում է խուճապի չմատնվել, բայցեւ՝ զգոն լինել:

Առողջապահության նախարարությունը հաղորդագրություն էր տարածել, որում մասնավորապես նշվում էր, թե սուր շնչառական վարակների ակտիվացման ողջ ընթացքում ՀՀ առողջապահության նախարարությունը բնակչությանը հորդորում է խուճապի չմատնվել, բայց եւ զգոն լինել ու հիվանդության առաջին իսկ ախտանշանների դեպքում դիմել բժշկի։ «Քանի որ սեզոնային գործոնով պայմանավորված ակտիվացումը համընկավ եղանակային պայմանների կտրուկ վատացմանը, ինչպես նաեւ տոնական օրերի ակտիվ շփումներին, Առողջապահության նախարարությունն ու համակարգն աշխատեցին արտակարգ ռեժիմով։ Աշխատանքներն առ այսօր տարվում են երկու ուղղությամբ՝ կանխարգելիչ եւ բուժական։ Պետք է ասել, որ նախարարությանը հաջողվեց բարձրացնել մարդկանց զգոնությունը, ինչի վկայությունն է դիմելիության մեծացումը։ Անտարակույս, դրանով է պայմանավորված հանրապետությունում նկատվող իրավիճակի կայունացման եւ դեպքերի նվազման միտումը»:

Նախարարությունը նկատում է, որ այսօր նման իրավիճակ է ոչ միայն Հայաստանում, այլեւ հարեւան եւ եվրոպական մի շարք երկրներում։ «Ոմանք, այդ թվում՝ մենք, ընտրել են ժողովրդի նկատմամբ ազնիվ մոտեցման, իրական իրավիճակը ներկայացնելու եւ զգոնությունը բարձրացնելով արդյունքներ ապահովելու ճանապարհը։ Ոմանք էլ՝ թաքցնելով իրական պատկերը եւ չբարձրաձայնելով մահվան դեպքերի մասին՝ մեծաթիվ զոհերի գնով իրենց բնակչությանը դատապարտել են ուշ դիմելիության»։

Նախարարությունը չի լռում նաեւ ծանր դեպքերի առկայության մասին։ Հաղորդագրությունում նշվում է. «Հենց երեկ տեղեկացվել է, որ 81 հիվանդ բուժում է ստանում վերակենդանացման բաժանմունքներում, իսկ 14-ին միացված է արհեստական շնչառության սարք։ Բոլոր այս հիվանդները կամ ժամանակին չեն դիմել բժշկին կամ ունեն քրոնիկ որեւէ հիվանդություն։ Նրանց բուժման ընթացքը մեր գլխավոր եւ առաջատար մասնագետների, անձամբ նախարարի ամենօրյա ուշադրության կենտրոնում է։ Ամենօրյա այցերի, բուժման տակտիկայի վերլուծությունների շնորհիվ շատ դեպքերում կյանքեր են փրկվում։ Սակայն միշտ չէ, որ գիշեր ու զօր արված քրտնաջան աշխատանքը տալիս է ցանկալի արդյունքը։ Եվ, առհասարակ, միշտ էլ լինում են ծանր ու ծայրահեղ ծանր հիվանդներ, որոնց ոչ բոլորին է հաջողվում փրկել։ Այսպիսին է հիվանդանոցային առօրյան։  Նման իրավիճակներում անչափ կարեւորվում է ողջ հանրության համախմբվածությունն ու զսպվածությունը։ Նախարարությունը նաեւ ԶԼՄ-ների հետ համագործակցության եւ համատեղ աշխատանքի շնորհիվ է տոնական օրերին բարձրացրել բնակչության զգոնությունը եւ իրականացրել լայնածավալ կանխարգելիչ միջոցառումներ: Միաժամանակ լրագրողներին մշտապես հորդորում ենք թեմային անդրադառնալիս հղում կատարել միայն պաշտոնական աղբյուրին եւ չտարածել հանրության շրջանում անհարկի խուճապի մթնոլորտ: Ցավոք, մեր ոչ բոլոր լրագրողներն ու լրատվամիջոցներն են նման կերպ վարվում։

Կան դեպքեր, երբ տուրք տալով սենսացիոն լուրեր հրապարակելու գայթակղությանը, թեմային առնչվող նյութերը հրապարակվում են ահասարսուռ, խուճապ առաջացնող մեծադիր վերնագրերով։ Երբեմն նույնիսկ չճշտված ապատեղեկատվություն է հրապարակվում։ Նշենք, որ «Սուրբ Աստվածամայր» բժշկական կենտրոնում սիսիանցի 2-ամյա տղան, ում միացված է արհեստական շնչառական սարք, բուժվում է «մենինգոէնցեֆալիտ» ախտորոշումով։ Քանի որ այս իրավիճակում գրիպի H1N1 ենթատեսակի լաբորատոր հետազոտություն իրականացվում է վերակենդանացման բաժանմունքներում բոլոր բուժվողների շրջանում, հետեւաբար նմուշառում է կատարվել նաեւ նշված հիվանդից։ Պաշտոնապես հայտարարում ենք, որ նրա մոտ H1N1 չի հայտնաբերվել:

Եվս մեկ անգամ կոչ ենք անում լրագրողներին՝ թեմային անդրադառնալիս հղում կատարել միայն պաշտոնական աղբյուրին եւ հանրության շրջանում անհարկի խուճապի մթնոլորտ չստեղծել:

Այսօր (հունվարի 13-ին,-խմբ.) արձանագրվել է մահվան 2 դեպք։ 60-ամյա եւ 41-ամյա տղամարդիկ բուժօգնության են դիմել հիվանդությունն ի հայտ գալուց մեկ շաբաթ անց՝ ծանր վիճակում։ Մասնագետների տասնօրյա ջանքերն արդյունք չեն տվել»:

* * *

Երեւանի քաղաքապետարանից տեղեկանում ենք, որ քաղաքապետ Տարոն Մարգարյանի հանձնարարությամբ տոնական օրերին քաղաքապետարանի ենթակայության բոլոր պոլիկլինիկաներում եւ բժշկական հաստատություններում սահմանված է եղել հատուկ հերթապահություն: Բուժհաստատություններ դիմած բոլոր 2545 քաղաքացիներին ցուցաբերվել է համապատասխան բժշկական օգնություն եւ տրամադրվել է խորհրդատվություն:

Այս, ինչպես նաեւ վերջին օրերին նկատվող սուր շնչառական հիվանդություններով պայմանավորված բժշկական հաստատություններ դիմած քաղաքացիների վիճակագրության մասին զեկուցվել է քաղաքապետարանում տեղի ունեցած այս տարվա աշխատանքային առաջին խորհրդակցության ընթացքում: Աշխատակազմի առողջապահության վարչության պետը մասնավորապես զեկուցել է, որ մյուս տարիների նույն ժամանակահատվածի համեմատ բուժհաստատություններ դիմած քաղաքացիների թիվն, ըստ էության, փոփոխություն չի կրել: Նշվել է նաեւ, որ այն սեզոնային բնույթ է կրում եւ ամեն տարի կրկնվում է:

Քաղաքապետ Տարոն Մարգարյանը հանձնարարել է ոլորտի աշխատանքները պահել ամենօրյա հսկողության տակ:

«Լուսանցք» թիվ 1 (391), 2016թ.

«Լուսանցք»- ի թողարկումները PDF ձեւաչափով կարող եք կարդալ www.hayary.org կայքի «Մամուլ» բաժնում, pressinfo.am պորտալում՝ հայկական եւ արտասահմանյան տպագիր մամուլի առցանց գրադարանում եւ pressa.ru-ում:

Այս գրառումը հրապարակվել է Հոդվածներ խորագրում։ Էջանշեք մշտական հղումը։