Խնդիրը նաեւ վստահության կորստի մեջ է – Հայության մի հատվածը Հայաստանի եւ Ռուսաստանի միացյալ ՀՕՊ համակարգի ստեղծումը չի վստահում «հայասպան պերմյակովների բանակին»… Արգելե՛լ հայադավ Աթեշյանի մուտքը Հայաստան…

Խոսելով Հայաստանի եւ Ռուսաստանի միջեւ հակաօդային պաշտպանության միավորված տարածաշրջանային համակարգ ստեղծելու համաձայնագրի մասին՝ ԲՀԿ խմբակցության անդամ Միքայել Մելքումյանը նշեց. «Հայաստանի հակաօդային պաշտպանության համակարգը մնում է, Կովկասյան տարածաշրջանում առաջանում է լրացուցիչ տեխնիկական բաղադրիչ, որը մենք չունեինք։ Այն ոչ ՀԱՊԿ-ի մեջ է, ոչ ԱՊՀ-ի հետ կապ ունի, միայն Հայաստանի ու Ռուսաստանի միջեւ է»: Ըստ պատգամավորի այս հանգամանքը չպետք է անտեսել, տեխնիկական բաղադրիչի լրացումը  բերում է ի օգուտ հայկական կողմի լրացուցիչ գործիքների կիրառման, տեսանելիության դաշտի ընդլայնման:

Մինչ այս, ՀԱՊԿ գլխավոր քարտուղար Նիկոլայ Բորդյուժան հայտարարել էր, որ Հայաստանի եւ Ռուսաստանի միացյալ ՀՕՊ համակարգի ստեղծումը երկու երկրների անվտանգության ապահովման հարցում չափազանց կարեւոր քայլ է: «ՌԴ եւ ՀՀ միացյալ ՀՕՊ համակարգի ստեղծման աշխատանքներն ընթանում են արդեն մի քանի տարի: Դա բավականին բարդ փաստաթուղթ է, որն անցնում է համաձայնեցման բոլոր փուլերը»,- նշել էր նա՝ հավելելով, որ փաստաթուղթն արդեն անցել է հիմնական ընթացակարգերը եւ ներկայումս ՀՀ օրենսդիր մարմնի կողմից քննարկման մակարդակում է:  

«ՀԱՊԿ շրջանակներում ընդունվել է տարածաշրջանային մակարդակով նման համակարգերի ստեղծման հայեցակարգ: Առկա են ռուս-բելառուսական, ռուս-ղազախական միացյալ ՀՕՊ համակարգերը, այժմ ստեղծվում  է ռուս-հայկական ՀՕՊ համակարգը: Սա առաջին փուլն է,- ասել է Նիկոլայ Բորդյուժան եւ հավելել,- գործընթացի 2-րդ փուլը ենթադրում է ՀԱՊԿ անդամ պետությունների ՀՕՊ համակարգերի միավորում «մեկ կանոնի եւ համակարգի ներքո», ինչը թույլ կտա ստեղծել կառույցի ողջ տարածքում ՀՕՊ ընդհանուր համակարգ»:

Իսկ ԱԺ շենքի դիմաց բողոքի ցույց էր, հավաքված քաղաքացիները դեմ են «Հայաստանի ու Ռուսաստանի միջեւ հակաօդային պաշտպանության միավորված համակարգ ստեղծելու» համաձայնագրի ընդունմանը: «Դավաճանության հերթական քայլը», «Չենք հանձնելու ոչ օդը, ոչ հողը», «ՀՕՊ-ի հանձնումը=Ստեփանակերտի ռմբակոծում», «Մենք չենք վստահում պերմյակովների բանակին, մենք վստահում ենք հայոց բանակին» ու այլ գրություններով ցուցանակներ են ԱԺ շենքի առաջ բարձրացրել ցուցարարները:

Համաձայանգրի դեմ բողոքի դուրս եկած ԱԻՄ առաջնորդ Պարույր Հայրիկյանը նշել է, որ նման համաձայանգրի քննարկումը նշանակում է, որ Հայաստանի իշխանությունները տեղի ունեցած իրադարձություններից եզրակացություններ անելու ընդունակ չեն: «Եթե չլինեին ապրիլյան դեպքերը, ապա կարելի էր մտածել, որ Հայաստանն այս համաձայնագրով կարող էր շահեկան վիճակում լինել: Բայց մենք գործ ունենք այնպիսի վիճակի հետ, որ Հայաստանին սպառնացող պետություն կա, որի հիմնական սնուցողն ու իրեն ռազմավարական դաշնակից համարողը Ռուսաստանն է: Եթե այդ ամենից հետո դու շարունակում ես Ռուսաստանի հետ ոչ միայն հարաբերություններ պահպանել, այլեւ հավատում ես նրա բարյացակամությունը, ուրեմն այդ հետեւանքները դու պետք է վայելես»,- ասել է Պարույր Հայրիկյանը:

Նշենք, որ ԱԺ արտահերթ նիստի օրակարգում համաձայնագիրն ընդգրկված չէր: ՀՕՊ համաձայնագրի քննարկումն ԱԺ-ում հետաձգվել է:

Արտակ Հայոցյան

* * *

Արգելել Աթեշյանի մուտքը Հայաստան

ԱԺ արտահերթ նիստի սկզբում ԲՀԿ խմբակցության ղեկավար Նաիրա Զոհրաբյանը հայտարարեց, որ իրեն Թուրքիայի հայ համայնքի ներկայացուցիչները պաշտոնական նամակ են ուղարկել ու պահանջել` արգելել Պոլսո պատրիարքական ընդհանուր փոխանորդ Արամ արքեպիսկոպոս Աթեշյանի մուտքը Հայաստան:

Նա հրապարակեց նամակը. «Որպես արեւմտահայ քաղաքացիներ, համայնքը դիմում է ՀՀ պատկան մարմիններին եւ Մայր Աթոռ Սուրբ Էջմիածնին` խնդրելով «զերծ ձգեն Աթեշյանի մասնակցությունը» Գերագույն հոգեւոր խորհրդի նիստերին, ով հակահայ հայտարարություններով Թուրքիայի եւ արեւմտահայության արժանապատվությունը վարկաբեկելով, Թուրքիայի կառավարության քարոզչական մեքենայի գործիքն է դարձել»:

Նամակի հեղինակները հորդորում են Աթեշյանին հավաքական ցանկացած հայտարարություն չանել հայության անունից, Աթեշյանին չեն համարում հոգեւոր առաջնորդ եւ նույնիսկ Սուրբ եկեղեցու արժանի հոգեւորական, որովհետեւ նա ընտրված չէ ժողովրդի քվեներով ու պաշտպանում է թուրքական պետության շահերը:

«Լուսանցք» թիվ 20 (410), 2016թ.

«Լուսանցք»-ի թողարկումները PDF ձեւաչափով կարող եք կարդալ www.hayary.org կայքի «Մամուլ» բաժնում, pressinfo.am պորտալում՝ հայկական եւ արտասահմանյան տպագիր մամուլի առցանց գրադարանում եւ pressa.ru-ում:

Այս գրառումը հրապարակվել է Հոդվածներ խորագրում։ Էջանշեք մշտական հղումը։