«Բողոքող կողմը» միայն ընտրակաշառք բաժանողներն են – Շառլ Ազնավուրի հայտարարությունը մոտ է իրականությանը… Հետընտրական որեւէ ընդվզում չի նախատեսվում, ընտրակաշառք վերցրած ընտրողներն էլ փաստորեն ընտրել են՝ ում ցանկացել են, եւ այստեղ էլ չկա «բողոքող կողմ»…

«Ես երբեք չեմ խոսում քաղաքականությունից, չնայած քաղաքականությամբ զբաղվող շատ ընկերներ ունեմ, բայց ես նրանց հետ խոսում եմ երաժշտության, արվեստի մասին ու ստեղծագործական այլ հարցերի մասին: Մենք ունենում ենք բավարար նյութ ընտրությունների մասին չխոսելու համար»,- այսպես է արձագանքել ֆրանսիահայ աշխարհահռչակ շանսոնյե Շառլ Ազնավուրը Հայաստանում խորհրդարանական ընտրությունների վերաբերյալ հարցին, որը տվել են նրան լրագրողները՝ ապրիլի 5-ին Մոսկվայում համերգից առաջ:

Համերգին, շուրջ 2 ժամ առանց դադարի Շառլ Ազնավուրն անսամբլի ուղեկցությամբ, որի կազմում է նաեւ նրա դուստր Կատյան, կատարել է նոր երգեր եւ հին ստեղծագործություններ: Համերգի վերջում հանելով կոստյումը՝ երգել է ռուսերեն եւ ծափահարությունների ներքո պարել «Գնչուհին» երգի տակ: «Հավերժ սեր» երգը ռուսերեն լեզվով հռչակավոր երգիչը երգել է Կրեմլի մեծ դահլիճում՝ երկու օր առաջ կայացած համերգի ժամանակ: ՏԱՍՍ-ի հաղորդմամբ, երգիչը սեր է խոստովանել ռուսական երաժշտությանը եւ հատկապես Ալեքսանդր Վերտինսկու ռոմանսներին, որոնք սիրել է լսել Ազնավուրի հայրը: «Իմ հայրը շատ լավ խոսում էր ռուսերեն, նաեւ վրացերեն, հայերեն: Մեր տանը միշտ հնչում էր երաժշտություն, Վերտինսկին այն երգիչն էր, ում ես այդ տարիներին շատ էի լսում»,- բեմից ասել է Շառլ Ազնավուրը:

Դառնալով ընտրական թեմային՝ նշենք, որ աշխարահռչակ հայորդին հավաստել է, որ «ով էլ լինի իմ ժողովրդի ընտրյալը, ես ընդունում եմ: Եթե ժողովուրդն է ընտրել նրան, ապա նա իմ նախագահն է: Ես անկեղծ կլինեմ, չեմ սիրում այն մարդկանց, ովքեր գնում են ուրիշ երկիր եւ քննադատում են իրենց երկրի քաղաքականությունը: Այդ պատճառով ինձ համար ամեն ինչ գերազանց է»,- ասել է նա:  

Փաստորեն, Շառլ Ազնավուրի հայտարարությունը կարծես մոտ է իրականությանը: Հետընտրական որեւէ ընդվզում չի նախատեսվում, իսկ ընտրակաշառք վերցրած ընտրողներն էլ փաստորեն ընտրել են՝ ում ցանկացել են եւ այստեղ էլ չկա «բողոքող կողմ»: Թերեւս բողոքողներ են հայտնվել կաշառատուների շրջանում, ովքեր բաժանել են ընտրակաշառք, բայց համապատասխան ընտրաձայներ չեն ստացել: Իսկ այս տեսակը հաստատ հանահավաքների չի դիմի:

«Ընտրակաշառքի համար սահմանված արժեքը եղել է 5-10 հազար դրամը, բայց եղել են թեկնածուներ, որ խոստացել են 15,  բայց 5 հազարը ընտրությունից հետո վճարելու նախապայմանով:  Նրանք, ովքեր նորմալ հեռախոսով նկարած ներկայացրել են նկարները, որտեղ հստակ երեւացել է այն, ինչ պետք է երեւար, իրենց գումարները ստացել են: Չի տրվել նրանց, ովքեր կասկածելի կամ միեւնույն նկարած նկարն են ներկայացրել: Օրինակ՝ եթե նկարը խավար է եղել, նրանց 5000 չի տրվել»,- այսպես է մեկնաբանել այդ իրավիճակը ՀՀԿ-ի Շիրակի շտաբի ղեկավար  Սամվել Նիկոյանը:

Հարցին՝ թե լսե՞լ եք, որ ՀՀԿ-ի թեկնածուները  ընտրություններից հետո հրաժարվում են  տալ  խոստացված ընտրակաշառքը, Սամվել Նիկոյանը պատասխանել է. «Ես լսել եմ բոլորի վերաբերյալ, պետք չէ սեւեռվել միայն մի ուղղությամբ»:

Շատերն էին սպասում, որ գոնե ՕՐՕ դաշինքը դուրս կգա պայքարի: Հատկապես, որ մինչ ընտրական գործընթացները կալանավորվել է նաեւ նրանց գործընկեր, Արցախի ՊԲ նախկին հրամանատար Սամվել Բաբայանը:

Սակայն, ՕՐՕ-ն նահանջեց փողոցային պայքարից: Գուցե դրան նպաստեց նաեւ այն արդյունքը, որը պարզապես խայտառակ պիտի որակել: Դաշինքի խոսնակ Արեգնազ Մանուկյանն ասել է, որ այս առիթով պարզաբանում չունի, եղել է քննարկում, որից հետո՝ հաղորդագրություն. «Հայտարարության տեքստում ամեն ինչ ասված է»։

Շատերն արձանագրեցին, որ ընտրությունների արդյունքները հատկապես «աղմկոտ ապտակ» եղան անձամբ Լեւոն Տեր-Պետրոսյանի, ոչ այնքան ՀԱԿ-ի, ինչպեսեւ՝ նախկին նախարարներ Սեյրան Օհանյանի, Րաֆֆի Հովհաննիսյանի եւ Վարդան Օսկանյանի համար, ովքեր ցայսօր շոկի մեջ են:…

Միայն ընտրություններից 2 օր անց լուրեր եղան, թե ՀԱԿ-ն ուզում է չեղյալ հայտարարել ընտրությունների արդյունքը: Բայց դեռ բողոքարկման մասին տեղեկություն չկա:  Մնացյալն էլ ընդունել են իրենց պարտությունը, եւ ոչ «Ազատ դեմոկրատներ»-ը, ոչ Կոմկուսը, ոչ էլ առաջին անգամ ընտրություններում դատարկաձեռն մնացած (վերջապե՜ս) ՕԵԿ-ՀՎԿ-ն:

Գոհար Վանեսյան

«Լուսանցք» թիվ 13 (446), 2017թ.

«Լուսանցք»-ի թողարկումները PDF ձեւաչափով կարող եք կարդալ http://www.hayary.org/wph/ կայքի «Մամուլ» բաժնում – http://www.hayary.org/wph/?cat=21, / http://pressinfo.am/ պորտալում՝ հայկական եւ արտասահմանյան տպագիր մամուլի առցանց գրադարանում եւ pressa.ru-ում – http://pressa.ru/ru/catalog/newspapers/categories/gazetyi/blizhnego-zarubezhya/#/: