Այո, Երեւանը բոլորիս տունն է, բայց ոչ սեփական «կլուբը» – Երեւանի քաղաքապետարանը հանրային պահանջները բավարարելու նպատակով օպերատորներին թույլ է տվել Երեւանի սեփականությունը հանդիսացող հենասյուներից օգտվել, բայց դա չի նշանակում, որ ով ինչպես կամենա պիտի տնօրինի հենասյուները… Շատ դեպքերում ծրագրերի ընթացքը դանդաղ է, կատարվող աշխատանքներն էլ ձգձգվում են՝ անհարկի անհարմարություններ պատճառելով քաղաքացիներին…

Վերջին մեկ շաբաթում քաղաքապետարանը որոշ քայլեր ձեռնարկեց, որոնց մասին «Լուսանցք»-ն էլ խոսել էր: Դրանք առաջին հայացքից կարող էին ընդհանրապես խնդիր չթվալ, բայց խնդիր էին դարձել մեր մայրաքաղաքի համար: Ավելի ստույգ՝ դրանք բոլորիս համար խնդիր դարձրել էին հեռահաղորդակցության ծառայություններ մատուցող օպերատորները, «Վեոլիա ջուրը»: Բավարար էր միայն տեսնել, ասենք, թե Երեւանի արտաքին լուսավորության եւ էլեկտրատրանսպորտային հենասյուների վրա ինչպես էին օպտիկամանրաթելային մալուխներ տեղադրել օպերատորները: Իսկ «Վեոլիա ջրի» թողած փոսերի մասին էլ չենք խոսում:

Ինչեւէ, կա քաղաքային տնտեսություն եւ կան այդ տնտեսության պահանջները: Ու դրանք պետք է խստորեն կատարվեն, չկատարելու պարագայում էլ պետք է պատժվեն, քանզի խոսքը Երեւանի եւ ոչ թե այդ ընկերությւնների «գեղի կլուբի» մասին է: Օպերատորները հաստատ իրենց տանը մալուխներն այդպես անփույթ չէին քաշի, իսկ ջրամատակարարման բարելավման ծրագրերի պատասխանատուները հաստատ իրենց տան բակերում փոսերն օրերով բաց կամ հողալցված չէին թողնի: Մտածել, որ նրանք դա կանեն սրտացավությունից կամ Երեւանի հանդեպ սիրուց ելնելով, ճիշտ չի լինի, բայց որ իմանան պատասխանատվության են ենթարկվելու, ամեն ինչ իր տեղը կընկնի:  

Այսպիսով, հոկտեմբրի վերջին Երեւանի քաղաքապետ Տարոն Մարգարյանի հանձնարարությամբ քաղաքապետի առաջին տեղակալ Կամո Արեյանը մայրաքաղաքում հեռահաղորդակցության ծառայություններ մատուցող օպերատորների ներկայացուցիչների եւ ոլորտի պատասխանատուների հետ շրջայց է կատարել, որի ընթացքում ուսումնասիրվել են Երեւանի արտաքին լուսավորության եւ էլեկտրատրանսպորտային հենասյուների վրա տվյալ ընկերությունների կողմից տեղակայված օպտիկամանրաթելային մալուխների համապատասխանությունը անվտանգության եւ տեխնիկական պայմանների պահանջներին: Արձանագրելով ծառայություն մատուցող օպերատորների անփույթ եւ ոչ հետեւողական աշխատանքի հետեւանքով առաջացած բազմաթիվ թերությունները՝ քաղաքապետի առաջին տեղակալի հանձնարարությամբ մալուխների մի մասը հենց տեղում ապամոնտաժվել է:

«Եթե Երեւանի քաղաքապետարանը հանրային պահանջները բավարարելու նպատակով օպերատորներին թույլ է տվել Երեւանի սեփականությունը հանդիսացող հենասյուների վրա մալուխներ տեղակայել, դա չի նշանակում, որ ով ինչպես կամենա, այնպես էլ պետք է տնօրինի այդ հենասյուները՝ բացահայտ տհաճ եւ անընդունելի, թափթփված տեսարան ստեղծելով: Տեխնիկական հստակ պահանջներ կան դրված, որոնք օպերատորները պարտավոր են պահպանել: Բայց, ինչպես տեսնում ենք, ոմանք կամ զլացել կամ էլ ուղղակի անտեսել են հստակ պահանջները, ինչը, բնականաբար, անհետեւանք չի կարող մնալ: Հաշվի առնելով նաեւ մեր համաքաղաքացիների շահերը, մենք այսօր ձեռնպահ մնացինք այս բոլոր մալուխներն ապամոնտաժելուց՝ պայմանով, որ առավելագույն կարճ ժամկետում կարգի բերեն ամեն ինչ, այլապես կարժանանան ապամոնտաժվածների բախտին»,- ինչպես տեղեկանում ենք Երեւանի քաղաքապետարանից, ընդգծել էր Կամո Արեյանը:

Հեռահաղորդակցության ծառայություններ մատուցող օպերատորների ներկայացուցիչները վստահեցրել են, որ կարճ ժամանակում մայրաքաղաքի հենասյուների վրա տեղակայված իրենց մալուխները կբերեն պատշաճ տեսքի եւ կհամապատասխանեցվեն անվտանգության ու տեխնիկական պայմանների բոլոր պահանջներին: Ինչպես ասում են՝ տեսնենք-տեսնենք: Մեզ էլ մնում է հիմա էլ հենասյուներին նայելով քայլել:

Գանք «Վեոլիա ջրին»: Քաղաքապետ Տարոն Մարգարյանի հանձնարարությամբ ընդլայնված խորհրդակցություն էր հրավիրվել, որի ժամանակ էլ քննարկվել է մայրաքաղաքի ջրամատակարարման բարելավմանն ուղղված ջրային տնտեսության պետական կոմիտեի ԾԻԳ-ի եւ «Վեոլիա ջուր» ընկերության աշխատանքների ընթացքը: Խորհրդակցությանը մասնակցել են նույն ԾԻԳ-ի ղեկավարները, «Վեոլիա ջրի» «Արեւելք» եւ «Արեւմուտք» տարածաշրջանային կառույցների տնօրենները, Երեւանի քաղաքապետարանի աշխատակազմի կոմունալ տնտեսության վարչության պետը, աշխատակիցները, կապալառու եւ շինարարական կազմակերպությունների ղեկավարներն ու տեխնիկական հսկիչները:

Անդրադառնալով իրականացվող ծրագրերի ընթացքին՝ քաղաքապետարանը բոլորի ուշադրությունը հրավիրել է այն հանգամանքին, որ շատ դեպքերում ծրագրերի ընթացքը դանդաղ է, կատարվող աշխատանքներն էլ ձգձգվում են՝ անհարկի անհարմարություններ պատճառելով քաղաքացիներին:

«Բոլորս էլ գիտակցում ենք, որ այս աշխատանքներն անհրաժեշտ եւ սպասված են, բայց քանդել փողոցներն ու ամիսներով չվերականգնել կամ կիսատ-պռատ, ընդամենը հողով ծածկել ու երկար ժամանակ թողնել այդ վիճակում, ուղղակի աններելի է,-ասել է Կ. Արեյանը: – Բոլոր աշխատանքների համար սահմանվում է հստակ ժամկետ եւ որեւէ մեկին իրավունք չի տրված դրանք խախտել եւ անհարկի անհարմարություններ պատճառել մեր համաքաղաքացիներին: Վերցրեք այնքան ծավալ, որքանը որ կարող եք պատշաճ ավարտին հասցնել, ոչ թե աջ ու ձախ քանդեք եւ փորձեք արդարանալ, որ ծավալները մեծ են եւ, դրանով պայմանավորված, չեք հասցնում: Սա երբեք ընդունելի արդարացում չի կարող լինել: Եվ, ընդհանրապես, եթե ամենօրյա խիստ հսկողություն սահմանեք ու անձամբ հետեւեք իրականացվող աշխատանքների ընթացքին, համոզված եմ, որ նման պատկեր չենք ունենա: Դիմացը ձմեռ է, եւ բոլորիդ նախազգուշացնում եմ, որ արագ ավարտեք ասֆալտբետոնյա ծածկերի վերականգնման աշխատանքները, որ ձմռանը չունենանք քանդված ու չվերականգնված որեւէ փողոց»:

Խորհրդակցության ընթացքում մասնավորապես շինարարական կազմակերպությունների ներկայացուցիչներին խստորեն նախազգուշացվել է, որ խախտումներ թույլ տվողների նկատմամբ կկիրառվեն օրենսդրությամբ սահմանված վարչական պատասխանատվության միջոցներ:

Այնպես որ, հենասյուներին նայելով Երեւանում շրջելուց բացի, պիտի փոսերն էլ հաշվենք: Իսկ ինչու ոչ: Սա հենց այն է՝ ինչ ասում ենք՝ Երեւանը սիրո քաղաք է: Իսկ սիրո քաղաքին սիրով են վերաբերում:

Անի Մարության

* * *

Երեւանի քաղաքապետարանի ենթակայության դպրոցներում, նախադպրոցական, մշակութային եւ առողջապահական հաստատություններում ավարտվել են ջեռուցման համակարգերի փորձարկումները, եւ ապահովված է դրանց անխափան շահագործումը:

Երեւանի քաղաքապետ Տարոն Մարգարյանը պատասխանատուներին հանձնարարել է վարչական շրջանների համապատասխան կառույցների հետ համատեղ հսկողություն սահմանել ու բացառել պոլիէթիլենային ծածկերով սահմանազատված սրճարանների ու տաղավարների գործունեությունը: Միաժամանակ հանձնարարվել է նաեւ խստորեն հետեւել, որ բացօթյա սրճարանների սեփականատերերը կամ վարձակալներն աշխատանքները կազմակերպեն բացառապես իրենց հատկացված տարածքներում:

«Լուսանցք» թիվ 39 (472), 2017թ.

«Լուսանցք»-ի թողարկումները PDF ձեւաչափով կարող եք կարդալ http://www.hayary.org/wph/ կայքի «Մամուլ» բաժնում – http://www.hayary.org/wph/?cat=21, / http://pressinfo.am/ պորտալում՝ հայկական եւ արտասահմանյան տպագիր մամուլի առցանց գրադարանում եւ pressa.ru-ում – http://pressa.ru/ru/catalog/newspapers/categories/gazetyi/blizhnego-zarubezhya/#/: