Իրանում բողոքի ցույցեր են, նաեւ ցույցեր՝ այդ բողոքների դեմ – Ինքնաբուխ բողոքի ցույցերը հազվադեպ երեւույթ են Իրանում, սակայն իշխանությունները հայտարարել են, որ քաղաքական իրավիճակը սրում են օտարերկրյա գործակալները եւ հակահեղափոխական տարրերը…

Իրանի արեւմտյան Քերմանշահ եւ Րեշտա քաղաքներում հազարավոր մարդիկ բողոքի ցույցի են դուրս եկել իշխանությունների դեմ: Ցույցեր են անցկացվել նաեւ Շիրազում, Իսպահանում, Համադանում: Ամենամարդաշատ հանրահավաքն անցկացվել է Մեշհադում, որտեղ ձերբակալվել է մի քանի տասնյակ ցուցարար:

Բողոքի ցույց է սկսվել ձվի թանկացման դեմ: Իրանի որոշ քաղաքներում պարենային մի շարք ապրանքներ վերջին օրերին թանկացել են մինչեւ 40%-ով, իսկ հավի ձվերը մեկ շաբաթվա ընթացքում թանկացել են 2 անգամ: Այնուհետեւ ցույցերը տարածվել են ու ձեռք բերել քաղաքական երանգ: Ցուցարարները պահանջել են ազատ արձակել քաղբանտարկյալներին:

Ցուցարարները վանկարկել են. «Ժողովուրդը ապրում է աղքատության մեջ, իսկ հոգեւորականներն իրենց աստվածների տեղն են դրել»: Իսկ Մեշհադում վանկարկել են քաղաքական կարգախոսներ, ինչպես՝ «Ո՛չ Գազան, ո՛չ Լիբանանը, իմ կյանքն Իրա՛նն է», քննադատելով Իրանի արտաքին քաղաքականությունը, որը ձգտում է ազդեցություն ծավալել Մերձավոր Արեւելքում:  

Ինքնաբուխ բողոքի ցույցերը հազվադեպ երեւույթ են Իրանում, սակայն իշխանությունները հայտարարել են, որ քաղաքական իրավիճակը սրում են օտարերկրյա գործակալները եւ հակահեղափոխական տարրերը, խոստացել է ճնշել չարտոնված հանրահավաքները: ԱՄՆ-ն արդեն դատապարտել է ցուցարարների ձերբակալությունները եւ կոչ արել աշխարհի երկրներին աջակցել Իրանի ժողովրդին: ՄԱԿ-ի Անվտանգության խորհուրդը հրատապ նիստ է հրավիրել՝ կապված Իրանում տեղի ունեցող իրադարձությունների հետ: Նիստի ժամանակ քննարկվել է իրավիճակը Մերձավոր Արեւելքում: Նիստը կայացել է Վաշինգտոնի առաջարկով: Իրանի հարցով նիստի անցկացմանը դեմ է արտահայտվել Մոսկվան:

Թեհրանի արվարձանային քաղաքներում անցկացվել են խաղաղ ցույց-հավաքներ՝ ի նշան վերջին ցույցերի դատապարտման եւ ի աջակցություն կառավարության: Ցույցերն անցկացվել են ուրբաթօրյա աղոթքներից հետո՝ Թեհրանում, ապա արվարձանային մի շարք քաղաքներում:

Մասնակիցներն իրենց հավատարմությունն են հայտնել երկրի կառավարությանը, ինչպեսեւ դատապարտել են բողոքի վերջին ցույցերն ու անկարգությունները, որոնք, ըստ նրանց՝ երկրի թշնամիների սադրանքի հետեւանք էին:

Կարեն Բալյան

«Լուսանցք» թիվ 1 (479), 2018թ.

«Լուսանցք»-ի թողարկումները PDF ձեւաչափով կարող եք կարդալ http://www.hayary.org/wph/ կայքի «Մամուլ» բաժնում - http://www.hayary.org/wph/?cat=21,http://pressinfo.am/ պորտալում՝ հայկական եւ արտասահմանյան տպագիր մամուլի առցանց գրադարանում եւ pressa.ru-ում - http://pressa.ru/ru/catalog/newspapers/categories/gazetyi/blizhnego-zarubezhya/#/:

Այս գրառումը հրապարակվել է Հոդվածներ խորագրում։ Էջանշեք մշտական հղումը։