Հանուն կայուն Կովկասի

Մինչեւ Թբիլիսի…

Ռուս քաղաքական գործիչ եւ գործարար Անդրեյ Լուգովոյը հայտարարել էր, որ եթե ինքը լիներ ՌԴ նախագահ Դմիտրի Մեդվեդեւի փոխարեն, ապա կհրամայեր ոչնչացնել Վրաստանի նախագահ Միխայիլ Սահակաշվիլուն. «Ով լուրջ վնաս է հասցնում ռուսական պետությանը, պետք է ոչնչացվի»: Նրա կարծիքով, այդ ձեւով է մտածում «յուրաքանչյուր նորմալ ռուս» եւ դեռ «Վլադիմիր Պուտինի երկրորդ ժամկետի սկզբից սկսած տարբեր ուժեր Արեւմուտքում ձգտել են անվանարկել Ռուսաստանն ու անձամբ Պուտինին՝ աջակցելով մեր փախուստի մեջ գտնվող օլիգարխներին»:

ՌԴ-ում հիմա շատերն են Ա. Լուգովոյի պես մտածում: Նկատի ունենալով Վրաստանը, նա կարծում է, որ «այդ երկիրը հասկացել է, որ մեզ հետ կատակ անել չի կարելի»: Բայց դրանով չի բավարարվում եւ նշում է՝ «պետք էր տանկերը հասցնել մինչեւ Թբիլիսի, այնտեղ նշանակել մեր ներկայացուցչին ու կախել Սահակաշվիլուն, ինչպես ամերիկացիները կախեցին Սադամ Հուսեյնին»: Ա. Լուգովոյը Անգլիայում թունավորումից մահացած լրտես Ալեքսանդր Լիտվինենկոյի գործով հիմնական դերակատարներից մեկն է, եւ բրիտանական հետաքննությունը նրան գլխավոր կասկածյալ է համարում այդ գործում, չնայած Ա. Լուգովոյը կտրականապես մերժում է մեղադրանքը:


Մինչեւ Բաքու…

Ադրբեջանը մի քանի անգամ ավելացրել է իր ռազմական բյուջեն եւ խախտում է սպառազինությունների սահմանափակման վերաբերյալ միջազգային համաձայնագրերը: Սակայն, եվրաքեռիները սա չեն նկատում:

«Հելսինկիում մենք եւս մեկ անգամ միջազգային հանրության եւ ԱԳ նախարարների ուշադրությունը հրավիրեցինք այս խնդրի վրա, որ պահանջվում է ավելի լուրջ մոտեցում: Նման քաղաքականությունը կարող է բերել անկանխատեսելի հետեւանքների», – ասել է ՀՀ ԱԳ նախարար Էդուարդ Նալբանդյանը:

Նա միաժամանակ ընդգծել է, որ Բաքվի կողմից պաշտպանության ոլորտի ծախսերի ավելացումը խոսում է ոչ թե այդ երկրի խաղաղ մտադրությունների, այլ պատերազմի հնարավորության մասին:

Մենք կարծում ենք, որ այս մասին անընդհատ ահազանգել պետք չէ:

Պարզապես անհրաժեշտ է լավ նախապատրաստվել դեպքերի նման ծավալմանը եւ Ադրբեջանի կողմից պատերազմ սկսելու դեպքում կատարել այն, ինչը չարվեց 1990-1994թթ. ժամանակահատվածում՝ հասնել Բաքու՝ վերջ տալով Կովկասի անկայուն իրավիճակին…

Արման Դավթյան

«Լուսանցք» թիվ 47 (86)


Այս գրառումը հրապարակվել է Հ.Ա.Մ., Հոդվածներ խորագրում։ Էջանշեք մշտական հղումը։