Ժամանակն է վերջ տալ կեղծիքներին

Եթե «Խոջալուն» ցեղասպանություն է, ապա միայն՝ ինքնացեղասպանություն

Վերջերս ադրբեջանական զինվորականների կողմից հաճախակիացել են սահմանային խախտումները եւ կրակոցները ԼՂՀ պաշտպանական դիրքերի վրա: Այս «նախապատերազմական» գործողություններին զուգահեռ ադրբեջանական կողմը նորից սկսել է արծարծել, այսպես կոչված, Խոջալուի ցեղասպանության թեման:

ԼՂՀ ԱԳՆ տեղեկատվական վարչությունը հիշեցնում է, որ 1992թ. փետրվարի 25-26-ը արցախյան կողմը ռազմական գործողութուն է սկսել Խոջալու բնակավայրի կրակակետերի վերացման եւ նույն ավանի մոտ գտնվող միակ օդանավակայանի ապաշրջափակման նպատակով: 1991թ. հենց այդտեղից են ԼՂ բնակավայրերը ենթարկվել ադրբեջանական ՕՄՕՆ-ականների հարձակումներին, գնդակոծվել «Ալազան», «Կրիստալ» եւ համազարկային կրակի «Գրադ» ռեակտիվ կայանքներից: Խոջալուի կրակակետերի վնասազերծումը ԼՂՀ բնակչության համար եղել է կենսական անհրաժեշտություն:

Խոջալուի կրակակետերը ճնշելու գործողության նախապատրաստման մասին հակառակորդը տեղեկացված է եղել 2 ամիս առաջ, ինչը հաստատել են նաեւ Ադրբեջանի պաշտոնատար անձիք, մասնավորապես, նախագահ Այազ Մութալիբովը: Բայց Ադրբեջանի իշխանությունները ոչինչ չեն ձեռնարկել խաղաղ բնակչությանը մարտական գործողություների գոտուց դուրս բերելու համար:

Ավելին, խաղաղ քաղաքացիների շարասյունները գնդակահարվել են Աղդամի շրջանի սահմանային մատույցներում, որն ավելի ուշ նույնպես հաստատել է Ադրբեջանի նախագահը՝ այդ հանցավոր գործողությունը կապելով իրեն իշխանությունից հեռացնելու եւ պատասխանատվությունը իր վրա բարդելու ընդդիմության փորձերի հետ:

Տարածքը, որտեղ հետագայում բազմաթիվ սպանվածների դիակներով կադրեր են նկարահանվել, գտնվել է Աղդամից՝ 3 կմ, Խոջալուից՝ 11 կմ հեռավորության վրա: Ընդհուպ մինչեւ 1993թ.՝ Աղդամի անկումը, տվյալ տարածքը ամբողջովին վերահսկվում էր Ադրբեջանի ժողովրդական ճակատի կողմից, ինչը բացառում էր արցախյան բանակի ստորաբաժանումների մուտքն այդտեղ:

Գաղտնի են պահվում այդ ռազմական գործողության որոշ մանրամասներ, ինչն ակտիվորեն շահարկվում է պաշտոնական Բաքվի կողմից՝ իր քաղաքական նպատակներին հասնելու համար:

Կարծում ենք՝ վաղուց ժամանակն է համապատասխան հակափաստարկները ներկայացնել միջազգային կառույցներին՝ ադրբեջանական կեղծիքներին վերջ դնելու նպատակով: Եվ առահասարակ՝ տեղեկատվական պատերազմ սկսելու համար:

Արման Դավթյան

Կհաղթանակի՞ արդարությունը

Անկարայում Իսրայելի դեսպան Գաբի Լեվին կանչվել է Թուրքիայի ԱԳՆ, որտեղ նրան բողոքի նոտա են հղել: Առիթը իսրայելական բանակի ցամաքային զորքերի հրամանատար Ավի Միզրախիի՝ վերջերս արված հայտարարությունն է, որում նա Թուրքիայի վարչապետ Էրդողանին կոչ է արել «ուշադրությամբ ուսումնասիրել սեփական պատմությունը», նոր միայն քննադատել Իսրայելին՝ Գազայում ռազմական հանցագործություններ կատարելու համար: Մասնավորապես, իսրայելցի զինվորականը նկատի է ունեցել Օսմանյան Թուրքիայի կողմից 1,5 մլն հայերի ցեղասպանության մասին փաստը:

Կկարողանա՞նք մենք՝ հայերս, օգտագործել այս հարմար պահը:

Գոհար Վանեսյան

«Լուսանցք» թիվ 6 (92), 2009թ.


Այս գրառումը հրապարակվել է Հ.Ա.Մ., Հոդվածներ խորագրում։ Էջանշեք մշտական հղումը։