Սերժ Սարգսյանը պիտի կրկնի Վազգեն Սարգսյանին՝ շուռ տա երկիրը… Այսպես այլեւս չի՛ կարելի… – Հայ Արիական Միաբանության առաջնորդ Արմեն Ավետիսյան…

Հարցազրույցի 1-ին մաս – Սերժ Սարգսյանը պիտի կրկնի Վազգեն Սարգսյանին՝ շուռ տա երկիրը – Հայ Արիական Միաբանության առաջնորդ Արմեն Ավետիսյան…

«Ժամանակին շատ եմ մեղադրել նախագահներ Լեւոն-ՏերՊետրոսյանին, Ռոբերտ Քոչարյանին, Սերժ Սարգսյանին: Բայց մի պահ, երբ պատկերացնում ես քեզ նրանց փոխարեն նախագահի աթոռին նստած, հասկանում ես, թե ինչքան դժվար է, քո ամեն մի խոսքից կախված է քո երկրի ճակատագիրը»,- «Հրապարակ»-ի հետ զրույցում ասաց Հայ Արիական Միաբանության առաջնորդ Արմեն Ավետիսյանը:

Նա նաեւ նշեց, թե նախագահ Սերժ Սարգսյանի արտաքին քաղաքականության մեջ բավականին դրական բաներ է տեսնում: «Փոխլրացնող արտաքին քաղաքականությունը ես սկզբում լավ չէի պատկերացնում: Ու շատ դժվար է մեր նման փոքրատարածք երկրի համար նման քայլ անելը: Այսինքն՝ միջազգային ասպարեզում խաղալ եւ՛ Արեւմուտքի, եւ՛ Ռուսաստանի, եւ՛ երրորդ բեւեռ դառնալ ցանկացող Չինաստանի հետ: Դա շատ բարդ խաղ է, որն ստացվում է, եւ երեք ուղղություններն էլ, թեկուզ մեկը մյուսին դեմ լինելով, Հայաստանին ինչ-որ հարցում օգնում են: Դա նշանակում է, որ դու ճիշտ ես տանում խաղը»,- ասաց Արմեն Ավետիսյանը: Արտաքին հարաբերություններում, ըստ Հայ Արիական Միաբանության առաջնորդի, Սերժ Սարգսյանը գուցե հաջողում է, սակայն ներքին կյանքում՝ ոչ այնքան: «Ամեն անգամ նոր կառավարություն ձեւավորելիս հույս ես տածում, որ նոր դեմքեր կտեսնես, ոչ թե, շախմատային լեզվով ասած՝ փոխատեղումներ:

Կարդացեք նաեւ - (Հարցազրույցի 2-րդ մաս – Գլխավոր շտաբի պետին՝ Խաչատուրովին պիտի առաջին պատի տակ գնդակահարել, եթե… –  Հայ Արիական Միաբանության առաջնորդ Արմեն Ավետիսյան…)

…Եթե Սերժ Սարգսյանը փորձի կրկնել Վազգեն Սարգսյանին, որը վարչապետ դառնալուց հետո ասել էր՝ ինչ տարել՝ տարել եք, դրեք սեղանի վրա, ես ձեզ չեմ պատժում, բոլորս էլ կույս ու սուրբ չենք, եւ ով ինչ տարել է՝ դնում ենք գործի մեջ, երկրի բյուջեն ենք մեծացնում, հիմնարկներն ենք աշխատեցնում եւ շատ քիչ վարկեր ենք վերցնում: Այսինքն, էնքա՜ն էին տարել, որ կարելի էր դա անել: Հիմա ես էնքան կուզեմ, որ մինչեւ էս վարչական համակարգի փոփոխությունը Սերժ Սարգսյանը հայտարարի նման մի բան, նույնն էլ ինքն ասի՝ բոլորս էլ սուրբ ու կույս չենք, ու բերեք տարածն օգտագործենք երկրի համար: Ոչ թե օֆշորային գոտիներում բիզնեսներ դնենք: Ասի՝ մեր ժողովրդի փողերն են, բերեք մեր երկրում օգտագործենք էդ փողերը»:

«Իսկ մտավախություն չունե՞ք, որ Սերժ Սարգսյանի հետ գուցե լինի այն, ինչ եղավ Վազգեն Սարգսյանի հետ» մեր դիտարկմանն Արմեն Ավետիսյանն արձագանքեց. «Ոչ մի հայի չեմ ցանկանում նման միջազգային դաժանության արժանանա, թեկուզ տեղի լամուկների ձեռքերով: Բայց մի օր ետքայլը՝ դա պետք է արվի: Մեկը պիտի անի դա, ի վերջո, էսպես չի կարող շարունակվել: Մեկը, թեկուզ իր կյանքի գնով, պիտի որոշի ու անի էդ ամեն ինչը: Շուռ պիտի տա իսկապես, շորը ոնց են շուռ տալիս, այ, էդպես պիտի շուռ տա երկիրը, ու ասի՝ մաքուր էջից սկսում ենք, ինչ կերել ենք՝ վերադարձնում ենք, ժողովուրդ, ների՜ր մեզ, քեզ ենք տալիս, ծաղկացնում ենք երկիրը: Մի քիչ հեքիաթային բան եմ ասում, բայց իրականությունից կտրված չէ, կարելի է անել: Իսկ Վազգեն Սարգսյանը փորձում էր նման բան անել, եւ շատերը, հենց իր շրջապատից, ահաբեկվել էին, քանի որ գիտեին՝ Վազգենը որ ասել է, կանի: Նույնիսկ այսօրվա իշխանության (նաեւ՝ ընդդիմության) մեջ եղածները, որոնք կային նաեւ այն ժամանակ, ահաբեկված էին»։

Հեղինե Մանուկյան / Նյութի աղբյուրը` hraparak.am / 11:45 / 25 / Մայիս / 2016

http://www.hayary.org/wph/?p=5587Հայ ազգայնականի մտորումները (Արմեն Ավետիսյան, Հայ Արիական Միաբանության առաջնորդ) – Պատերազմը անխնա է, անխնա են նաեւ մեր բառակազմությունները, որ գալիս են մեր լեզվամտածողությունից…

Հարցազրույցի 2-րդ մաս – Գլխավոր շտաբի պետին՝ Խաչատուրովին պիտի առաջին պատի տակ գնդակահարել, եթե… –  Հայ Արիական Միաբանության առաջնորդ Արմեն Ավետիսյան

Գլխավոր շտաբի պետին՝ Խաչատուրովին պիտի առաջին պատի տակ գնդակահարել, եթե…

Հայ արիական միաբանության առաջնորդ Արմեն Ավետիսյանը ՀԱԲ-ի՝ Հայոց ազգային բանակի անդամ իր կամավորական ընկերների հետ քառօրյա պատերազմի ժամանակ մեկնել էր Արցախ: «Հանդիպել եմ երիտասարդ զինվորներին, փառավորված եմ, որովհետեւ այն, ինչ մտածում էինք մենք՝ կամավորականներս հոգեպես տալ, մենք ստացած ենք ետ եկել»,- մեզ հետ զրույցում ասաց Արմեն Ավետիսյանը, ով 1988-ից Հայ ազգային զարթոնքի եւ Արցախյան շարժման մասնակիցներից է: Ներկայացնում ենք մեր զրույցը նրա հետ:

- Սերժ Սարգսյանի հայտնի՝ 800 հեկտար տարածք կորցնելու մասին հայտարարությունն ինչի՞ մասին է վկայում: «Հայեր ու Արիներ, ազատագրե՜ք Սրբազան Լեռնաշխարհը» ազգայնական կոչով հանդես եկող Հայ արիականներն ինչպե՞ս են վերաբերում նման տարածքային կորստին:

– Ցանկացած կորուստ ցավով ենք ընդունում, մեզ համար չկա սանտիմետր, կիլոմետր հայրենի հող: Մեր հոգեւոր ոլորտում անգամ հայկական լեռնաշխարհն իր ամբողջական տեղն ունի: Հայը հայ լինելու համար պետք է հայկական լեռնաշխարհի ամբողջական բնությունից օգտվի, շփվի: Հայկական լեռնաշխարհը եթե ամբողջական չէ, հայի ներսը, գենետիկ բնույթը ամբողջական չէ: Բայց պատերազմը պարտադրում է նաեւ իր օրենքները: Հիմա այնպես չի, որ մենք ամբողջական Հայաստանում ենք, եւ ամեն մի կորուստ կորուստ է. Նախիջեւանն էլ է ինձ համար կորուստ, Ջավախքն էլ, Արծվաշենն էլ: Բայց կան մարտավարական խնդիրներ, եւ ես գիտեմ, որ մեր զորքի՝ այնտեղ մնալու դեպքում այդ պահին մեր կորուստներն ավելի մեծ էին լինելու: Կա մարտավարություն՝ ելքով նահանջ, ապա հարձակումով ետ վերցնել կորցրածը: Կարծում եմ՝ եղել է այդ տարբերակը: Եւ լինելով տեղում, եւ շփվելով տղաների հետ՝ ասեմ, որ ամենաշատ կորուստներ ունեցել ենք հենց առաջին օրը, տղաների մեծ մասը դիրքերը չեն զիջել, նահանջի հրամանը գուցե մի քիչ ուշացումով է շատ տեղերում եղել: Եւ փա՜ռք հերոս տղաներին, որ կյանքի գնով պահեցին սահմանը: Բայց ես այնքան ուրախ կլինեի, որ այդ նույն տղաները մի քանի օր հետո նորից մտնեին ու ետ վերցնեին կորցրածը, բայց իրենք լինեին… Մարտավարական խնդիրներ կան, եւ դա պետք չի սարքել մատի փաթաթան: Այստեղ մի ուրիշ խնդիր կա. ես մամուլից տեղեկացել եմ, որ երբ ԶՈՒ գլխավոր շտաբի պետ Յուրի Խաչատուրովը իր անձնական բիլիարդանոցում խաղալուց է եղել եւ նրան տեղեկացրել են տոտալ հարձակման մասին, նա ասել է, թե չի կարող նման բան լինել: Երբ նման հրապարակում եղավ, նա նույնիսկ չպատասխանեց, ինչն էլ ինձ դրդում է հավատալ մամուլին: Յուրի Խաչատուրովն էն մարդն է, ով կարող էր ցանկացած լրատվամիջոցի դատի տալ ու պատիվ պահանջել: Իսկապես, սա պատիվ պահանջելու բան է, երբ քեզ գալիս, ասում են, ամբողջ ռազմաճակատով պատերազմ է ու դու ասում ես՝ նման բան չի կարող լինել: Ու մի քանի անգամ են ասում: Զոհերի մեծ մասը եղել է չտեղեկացվածության պատճառով, այլապես բացառվում է, որ մենք մի քանի օրում 100-ից ավելի զոհ տայինք: Եւ տեղանքների թողնելը նույնպես չտեղեկացվածության պատճառով է, մեր դիրքերը միշտ ամուր են եղել, բայց այսպիսի լայնածավալ հարձակում իրոք ոչ մեկը չի սպասել:

- Այդ դեպքում, ինչո՞ւ Խաչատուրովը մինչեւ հիմա պաշտոնանկ չի արվել, ՊՆ-ում ավելի ցածր պաշտոններ զբաղեցնողները պաշտոնանկ արվեցին, իսկ նա՝ ոչ: Ռազմական հետախուզությունն, ըստ տարբեր աղբյուրների, պարբերաբար իրազեկել է ՀՀ ռազմական ղեկավարությանը հնարավոր հարձակման մասին դեռ 2014թ.-ին:

– Ես ընդգծում եմ, եթե ճիշտ է մամուլի այդ հրապարակումը, ուրեմն, իրոք Խաչատուրովը ջուր է լցրել Ադրբեջանի ջրաղացին: Գուցե նախագահը դեռ ուզում է ճշտել՝ իսկապե՞ս նման բան եղել է: Կան մարդիկ, ովքեր ի պաշտոնե ճիշտ չեն աշխատել այս քառօրյա պատերազմի ընթացքում: Ես ուրախ եմ, որ Պն-ում հրաժարականների շարքը շարունակվում է, որովհետեւ մեր բանակը երկրի ամենակայացած կառույցն է եւ միշտ պիտի պաշտպանված լինի: Անձը չի կարող նշանակություն ունենալ մեզ համար: Եթե ապացուցվի, որ իրոք Խաչատուրովը նման բան է ասել, հավատացեք, որ ես ձեզանից ավելի կտրուկ բան կասեմ, գնդակահարության (մահապատժի) մասին օրենքը պիտի փոխել եւ առաջին պատի տակ պիտի պարզապես գնդակահարել նրան: Որովհետեւ մեր երկիրը գտնվում է պատերազմական իրավիճակում, իսկ զինադադարը չի նշանակում պատերազմի ավարտ: Այո, դուք ճիշտ եք, ցանկացած տեղեկատվություն պետք է անմիջապես վերլուծվի, ճշգրտվի, առավել եւս երբ որ խոսվում է լայնածավալ եւ ամենատարբեր խոշոր զենքերով հարձակման մասին: Պարզապես չեմ ուզում հավատալ, որ նման բան կարող է լինել: Ես այնպիսի մարդ եմ, որ երբ իմ մասին ինչ-որ բան է ասվում, ես անպայման պիտի արագ արձագանքեմ: Եթե նրանք մեղավոր չեն ու չեն խոսում, շատ վատ է, եթե մեղավոր են ու շարունակում են պաշտոնավարել, նույնպես վատ է: Պարզապես իմանալով Սեյրան Օհանյանին եւ իմանալով Յուրի Խաչատուրովի անցած ուղու մասին՝ ուզում եմ դեռ չհավատալ, ես ինձ համոզում եմ, որ հրապարակումը ճիշտ չի:

- Երկու դեպքում էլ կարծես գործ ունենք դավաճանության հետ. առաջինը, որ Պն-ում իմացել են Ադրբեջանի՝ հարձակվելու մասին եւ պատշաճ չեն գնահատել հեռանկարը, եւ երկրորդ՝ իմացել են եւ բանակը չեն նախապատրաստել նման զարգացումներին: Ստացվում է, որ մեր զինվորները որոշ պաշտոնյաների անխոհեմության զո՞հը դարձան:

– Ստացվեց այնպես, որ մեր զինվորը կրկին բացատրեց, որ կարեւորն ինքն է: Եւ 18-19 տարեկան այդ տղաների առաջ խոնարհվելը ուղղակի քիչ է: Ես ինչու եմ բորբոքված այդ առումով, քանի որ ժամանակին՝ 1988-1994 թվականներին, երբ եղավ կամավորական շարժումը, մենք անցանք այդ ամենի միջով եւ մեզ թվում էր, թե դա անցած փուլ է: Ցավոք որոշ բաներ մնացել են եւ նախագահը, եթե սկսել է բանակի ինքնամաքրման գործը, ճիշտ կլինի մինչեւ վերջ գնա: Եւ գուցե ռազմի օրենքներով գնդակահարության օրենքն ունենք մենք. Ի վերջո, պատերազմի դաշտում դավաճան զինվորին տեղում են գնդակահարում:

- Ինչպե՞ս եք վերաբերվում այն ազատամարտիկներին, մասնավորապես Ժիրայր Սեֆիլյանին, ովքեր հայտարարում են, թե պատրաստ են ետ բերել կորցրած 800 հեկտարը: ՀՀԿ խմբակցության ղեկավար Վահրամ Բաղդասարյանն այդ 800 հեկտարը որակեց «անմշակ» հող, իսկ Սեֆիլյանին անվանեց «կամիկաձե»:

– Կամիկաձեն վատ բառ չէ,դա հայրենիքի համար զոհվողն է: Գուցե ասողը չի հասկանում բառի իմաստը (ծիծաղում է,- խմբ.): Միգուցե ձեր ասած մարդիկ քաղաքական, գաղափարական, կամ անձնական խնդիրնե՞ր ունեն միմյանց հետ, որը նույնպես շատ վատ երեւույթ է, քանի որ ազգային հարցերում անձնականը վերանում է: Ես դեմ եմ այն երեւույթին, երբ ընդդիմանում են կամավոր որեւէ մարդու: Ես էլ շատ շատերին չամ հավանում գաղափարապես: Բայց հիշեցնեմ, որ երբ 1990-ականներին սկսեցին առաջին մարտերը Նախիջեւանի եւ Արցախի ուղղությամբ, մի գյուղը ՀԱԲ-ի տղաներով էինք պահում, մյուսը՝ ԱԻՄ-ի, երրորդը՝ ՀՀՇ-ական երկրապահների: Մենք ամեն վայրկյան հասնում էինք իրար, գալիս էինք Երեւան, իրար ուտում ենք գաղափարապես, քաղաքական առումով, բայց երբ մարտի դաշտում էինք, հաց էինք կիսում, իրար փամփուշտ էինք տալիս: Եւ երբ որ քառօրյա պատերազմը գնում էր, ոչ ոք չէր խանգարում Ժիրայր Սեֆիլյանին տղաներին հավաքել ու մեկնել Արցախ: Եւ ոչ թե սպասեր, որ տարածքային կորուստ լիներ, նահանջեին, հետո նոր հայտարարություններ աներ: Մի հարց Ժիրայրին. եթե ինքը գնա ետ վերցնելու կորցրած տարածքը եւ այդպիսով նոր պատերազմ սկսվի, ոչ թե քառօրյա, այլ քառամսյա, ինքը պատրա՞ստ է, ի վիճակի՞ է ամբողջ պատերազմի դաշտը պահել, այդքան ֆինանսական, մարդկային եւ այլ ռեսուրսներ ունի՞: Ասելով հո չի՞: Ես էլ ուզում եմ Նախիջեւանը ետ բերեմ, Ջավախքը… Բայց վստահ եղեք, որ 800-ը, դեռ մի բան էլ ավել ետ է վերցվելու անպայման: Մամուլում արդեն հայտարարվում է, որ հենց Սերժ Սարգսյանի՝ Վիեննայից գալուց հետո մենք մոտավորապես այդքան տարածք Նախիջեւանի ուղղությամբ ենք վերցրել…

- Բայց այդ մասին այնքան հպանցիկ է խոսվում, որ նույնիսկ հավատդ չի գալիս, մտածում ես՝ քարոզչական հնարք է:

– Պետական մակարդակով գուցե չի հայտարարվում: Մի բան ասեմ, գուցե ծիծաղեք, երբ էս աշխարհում դու քեզ խեղճ, պարտված ես պահում, կորուսյալի կերպարով ներկայանում, դա ավելի է ընդունվում, բայց երբ դու ցույց ես տալիս, որ կարող ես ինքնուրույն քայլեր անել, դա չի ներվում: Տեսեք, Ռուսաստանը ոնց կատաղեց, երբ հայը սկսեց ինքնուրույն քայլեր անել՝ առանց իր կարծեցյալ մեծ եղբորը հարցնելու: Միգուցե Սերժ Սարգսյանը հասկացել է, որ ավելի լավ է միջազգային հանրությանը ցույց տալ, որ մենք անընդհատ կորուստնե՞ր ունենք, մեղք ենք եւ անընդհատ մեզ օգնե՞լ է պետք: Դա շատ վատ բան է, բայց ամեն մարդ չի կարող դա անել:

- Այսինքն, 800 հեկտարի կորուստը ռազմական բլե՞ֆ է:

– Ես կասեի՝ քաղաքական: Մենք ցույց ենք տալիս, որ 800 հեկտար կորցրել ենք: Ես իհարկե դեռ ենթադրում եմ, բայց քանի որ ռազմական գործին փոքրիշատե ծանոթ եմ, ես իմ կողմից վստահաբար կարող եմ ասել, որ Նախիջեւանի կողմից հողեր հաստատ վերցրել ենք որպես փոխհատուցում 800 հեկտարի դիմաց, եւ ասել, որ մի օր էլ այդ 800-ն ենք վերցնելու: Ես հետեւում եմ ադրբեջանական որոշ կայքերի, նրանց վայնասունը մի ուրիշ ձեւի է: Նրանք, չգիտես ինչի, բողոքում են նաեւ Իրանին, նաեւ Իրանի դեմ… Իրանը մեզ բարեկամ պետություն է, բայց վաղուց Նախիջեւանի վրա նրանք էլ աչք ունեն: Եւ երբ կարդում ես, որ Ադրբեջանը Արեւմուտքին (ԱՄՆ-Եվրոպա), Ռուսաստանին ու Թուրքիային է բողոքել, ապա՝ Իրանին, նշանակում է, ինչ-որ խնդիր կա: Ուղղակի, կա պատմական տրամաբանություն, եւ իրավիճակային տրամաբանություն, այլապես Իրանին բողոքելու որեւէ խնդիր Արցախի հարցում Ադրբեջանը չէր ունենա: Այսինքն՝ Իրանը պետք է անհանգստանա, որ Հայաստանը Նախիջեւանի վրա կոնկրետ գործողություններ է կատարում, իսկ Շահ Աբասից սկսած Իրանը Նախիջեւանը համարում է իրենը:

Հեղինե Մանուկյան Նյութի աղբյուրը ` hraparak.am

Այս գրառումը հրապարակվել է Հ.Ա.Մ., Հայտարարություններ, Հոդվածներ խորագրում։ Էջանշեք մշտական հղումը։