Monthly Archives: April 2014

Սահմանադրությունն ամենակարեւոր փաստաթուղթն է պետության համար, որը կանոնակարգում է պետական համակարգի ինչպես ներքին, այնպես էլ արտաքին ոլորտները: Հայաստանի նախագահ Սերժ Սարգսյանը համաձայնել է «Սահմանադրական բարեփոխումներ» կոչված փաստաթղթի հայեցակարգի հետ, որը նրան  օրերս ներկայացրեց Հայաստանի Սահմանադրական դատարանի նախագահ Գագիկ Հարությունյանը: Հանրության շրջանում առավել աշխույժ քննարկման առարկա դարձավ հատկապես Հայաստանի կառավարման համակարգին վերաբերվող սահմանադրական փոփոխությունների թեման:

Գործող Սահմանադրությամբ Հայաստանի կառավարման համակարգը նախագահական է, որտեղ կարգավորված են նախագահ-խորհրդարան, նախագահ-կառավարություն, խորհրդարան-կառավարություն փոխհարաբերությունները, տարանջատված են օրենսդիր, գործադիր եւ դատական համակարգերը: Երաշխավորված է նաեւ դատա-իրավական իշխանության հակակշռող դերն իշխանության այլ ճյուղերի նկատմամբ, սակայն ինչպես այլ սահմանադրական երաշխավորումներ, այս մեկը եւս չի գործում ամբողջ հնարավորությամբ ու հզորությամբ: Հիմնականում հենց սա էլ առաջացնում է անվստահությունը Սահմանադրության եւ, առհասարակ, օրենքների ու պետական համակարգի հանդեպ:

Ոմանք էլ կարծում են, թե գործող նախագահն «անցնում է գրոհի», քանի որ միայն խորհրդարանական, թե վարչապետական կառավարման ժամանակ նա հնարավորություն կստանա կրկին դառնալ երկրի ղեկավար: Սահմանադրության նոր նախագիծը, որի հիմանական իմաստը Հայաստանի պետական կառավարման համակարգը խորհրդարանական դարձնելն է, շատերի կարծիքով՝ ճիշտ ընտրված է հենց այդ նպատակի համար: Այս տեսակետի կողմնակիցները հայտնել են, թե «Սահմանադրական բարեփոխումով Սերժ Սարգսյանն իր համար վարչապետի ամուր աթոռ է նախապատրաստում, քանի որ, ըստ նոր նախագծի, 2018թ. հետո վարչապետը միանձնյա լինելու է երկրի կառավարության՝ գործադիր մարմնի ձեւավորողը եւ պատասխանատուն, իսկ խորհրդարանին էլ վերապահված է դակիչի դերակատարություն»: Այն հանգամանքը, որ նախագծում ՀՀ նախագահն ընտրվում է Ազգային Ժողովի կողմից 7 տարի ժամկետով, արդեն որոշիչ չի համարվում, քանի որ, ըստ այդ վերլուծաբանների, «այդ նախագահը կդառնա ապագա վարչապետի կամակատարը»: Երկրի նախագահն ընտրվում է 7 տարով եւ այդ ընթացքում չի ունեալու ուղղակի ազդեցություն երկրի քաղաքական խնդիրների լուծման գործում: Իսկ 5 տարով ընտրված վարչապետը այդ նախագահի օժանդակությամբ հաստատ կկարողանա մի հնգամյակ էլ աշխատել որպես վարչապետ… Նաեւ հաշվարկներ են արվում, թե այս սահմանադրական փոփախությունները հենց այդ հնարավորություններն են ստեղծում՝ 2018թ. նախագահի ընտրությունից հետո, ամենաքիչը 2 հնգամյակ աշխատել որպես վարչապետ:

Սահմանադրական բարեփոխումների հայեցակարգի նախագծում առաջարկվում են այլ փոփոխություններ եւս, սակայն մարդկանց հուզում է պետական կառավարման համակարգի փոփոխությունը եւ իշխանափոխության հերթափոխի հստակ ձեւակերպումը, դրա իրական ու գործուն երաշխիքները: Հիշեցնենք, որ նախագահ Սերժ Սարգսյանը Սահմանադրական բարեփոխումների մասնագիտական հանձնաժողովի անդամների հետ հանդիպմանը հայտարարեց, որ եթե խորհրդարանական համակարգն ընդունվի, ապա ինքը վարչապետ չի աշխատի:

Continue reading →

ՀՀԿ ԳՄ անդամները միաձայն ՀՀ 13-րդ վարչապետ ընտրեցին ԱԺ նախագահ Հովիկ Աբրահամյանին: Հուսանք, այդ թիվը դրական ազդեցություն կունենա նոր վարչապետի հետագա գործունեության վրա: Այդ նիստը վարող ՀՀ նախագահ Սերժ Սարգսյանը եւ ներկա կուսակիցները այսպիսի որոշման հանգեցին միաձայն: Նոր վարչապետն արդեն երեկ վարել է կառավարության նիստը:

13-րդ վարչապետի հրամանագիրը երկրի նախագահը ստորագրել է ապրիլի 13-ին: Սահմանադրության պահանջով, նոր վարչապետը 20-օրյա ժամկետում կներկայացնի նոր կառավարության կազմը, այնուհետեւ նոր կառավարությունը ծրագիր կներկայացնի ԱԺ՝ հաստատման:

Խորհրդարանի նախկին նախագահ Հովիկ Աբահամյանը ԱԺ կանոնակարգ օրենքի 12-րդ հոդվածի համաձայն այլ պաշտոնի անցնելու կապակցությամբ հրաժարականի մասին դիմումը ներկայացրել է ԱԺ նիստում՝ ընթացակարգի պահանջների համաձայն: Նրան փոխարինելու առումով եւս անուններ են հնչում, հասկանալի է՝ միայն ՀՀԿ-ական թեկնածուների: Նշվում է ԱԺ նախկին նախագահ Սամվել Նիկոյանի, ՀՀԿ պատգամավոր Կարեն Կարապետյանի անունները: «Իմ պաշտոնը ինձ լրիվ բավարարում է»,- ասել է Սամվել Նիկոյանը՝ պատասխանելով այն հարցին, թե արդյոք հավանական համարում է իր թեկնածությունը ԱԺ նախագահի պաշտոնում։ Մամուլն էլ ՀՀԿ խմբակցության ղեկավար Գալուստ Սահակյանին է վերապահում Ազգային ժողովի նոր նախագահի աթոռը, չնայած նա հայտնել է, թե ինքը ավելի շատ հավանում է իր պաշտոնը:

Պաշտոնների բաշխում ՀՀԿ-ում արդեն ընթանում է, եւ ԱԺ ՀՀԿ խմբակցության անդամ Դավիթ Հարությունյանը փորձել է վերադառնալ արդարադատության նախարարի պաշտոնին, բայց… հայտարարել է, թե հետաքրքրված չէ այդ պաշտոնով: Եվ խոսք կա, որ գուցե նա նշանակվի վարչապետի աշխատակազմի ղեկավար: ԿԳ նախարար Արմեն Աշոտյանը հայտնել է, որ կգնա այնտեղ, որտեղ կուղարկի կուսակցությունը: Իսկ կուսակցությունը հնարավոր է նրան դեսպան նշանակի որեւէ եվրոպական երկրում: ՀՀԿ խմբակցության քարտուղար Հովհաննես Սահակյանը չի հերքել, որ իրեն վերապահված է կառավարություն գնացող Դավիթ Հարությունյանի խորհրդարանական աթոռը:

Continue reading →

«Վարչապետը 6 տարի պաշտոնավարեց, իր հոժար կամքով հրաժարական տվեց»,- Տիգրան Սարգսյանի մասին ասել է ԱԺ ՀՀԿ խմբակցության ղեկավար Գալուստ Սահակյանը՝ պարզաբանելով, որ Հանրապետականը ինքնանպատակ չի առաջնորդվում: Իսկ արդյո՞ք կառավարության պատասխանատուն մինչեւ «իր հոժար կամքով» հրաժարականի դիմում գրելը պատասխան չպիտի տար երկրի տնտեսությունը նման անմխիթար վիճակի բերելու համար (շատերն են հարցնում): Մի՞թե դա ինքնանպատակ կլիներ:

Բայց ՀՀԿ-ական պատգամավորն այդ տեսակետին համաձայն չէ. «Վարչապետը դրական ազդեցություն է ունեցել Հայաստանի տնտեսության վրա եւ նոր վարչապետը պիտի շարունակի այն ծրագրերը, որոնք արդեն կան: Ոչ թե փոխելու, այլ շարունակելու է»:

Այս դեպքում տրամաբանական հարց է ծագում՝ իսկ եթե ամեն բան լավ էր, նախկին վարչապետն էլ դրական էր ազդում տնտեսության վրա, ապա ինչու՞ գրեց հրաժարականի դիմումը, ինչու՞ են տասնյակ հազարավոր մարդիկ, տասնյակ ոլորտների ներկայացուցիչներ դուրս եկել փողոց եւ  պահանջներ ներկայացնում կառավարությանը:

Իսկ եթե «գնացողի հետեւից միայն լավն են խոսում» տարբերակն է այս դեպքում, ապա, եթե այդ տարբերակն անգամ քաղաքական կատեգորիա է, հաստատ բարոյական ու արդարացի տարբերակ չէ: Հիտլերին նորից չհիշենք, թե ինչեր խոսեցին գնալուց հետո…

ԱԺ նախագահ Հովիկ Աբրահամյանի անունը ի սկզբանե արծարծվում էր, նա հարմար թեկնածու էր նաեւ Ռոբերտ Քոչարյանի համար: Իսկ երբ Հովիկ Աբրահամյանն ու Գագիկ Ծառուկյանը հանդիպեցին խորհրդարանում ու միասին գնացին նախագահական՝ Սերժ Սարգսյանի մոտ, արդեն կասկած չկար, թե ով է լինելու նոր վարչապետը:

Որոշ վերլուծաբանների կարծիքով՝ Հովիկ Աբրահամյանին վարչապետ նշանակելով՝ իշխանությունը թուլացրեց ոչ իշխանական ուժերի պայքարը, քանի որ ԲՀԿ-ն գոնե նույն եռանդով չի շարունակի հակակառավարական քարոզչությունը։

Continue reading →

Երբեւէ պաշտպանված կլինի՞ նորմալ մարդը մեր երկրում

«Հասարակություն առանց բռնության» հ/կ-ն, մի շվեդական կազմակերպության ֆինանսական աջակցությամբ, նոր քայլեր է նախաձեռնում, որպեսզի գենդերային բաղադրիչը ներառվի հայաստանյան դպրոցների «Հասարակագիտություն» առարկայի մեջ: Կարծես քիչ էր պարտադիր կուտակայինի արդեն ծեծված «բաղադրիչը», այժմ էլ փորձ է արվում գենդերայինը պարտադրել:

Հիշյալ կազմակերպության ղեկավարությունը եւ անդամները հրավիրված հավաքի ժամանակ դահլիճ չէին թողնում ոչ միայն այդ նախաձեռնության դեմ բողոքող եւ «Ո՛չ հակաընտանեկան քարոզչությանը» կարգախոսով հանդես եկողներին, այլեւ տարբեր զլմ-ների լրագրողների:

Հետաքրքիր է, եթե օտարի փողերով այստեղ քննարկումներ են կազմակերպվում, ապա ո՞ւմ հետ են քննարկում, եթե հակառակ կարծիքները լսելն արգելվում է: Թե՞ օտարների պատվերը կատարելու եւ դրամաշնորհները դրամաշորթության վերածելու մղումն ավելի զորավոր է օտարամոլների համար:

Ինչեւէ, այդ հ/կ-ի գործադիր տնօրեն Աննա Նիկողոսյանը աղմկալից եւ անդուր արգելանքներից հետո ստիպված հայտարարություն արեց, թե միջոցառման անվանումն է՝ Գենդերային բաղադրիչի ներդրումը «Հասարակագիտություն» առարկայի մեջ, իսկ լրագրողների մուտքն արգելելը բացատրեց այսպես. «Դա փակ կլոր սեղան է»: Եթե կլոր սեղան է, ապա ինչու՞ է փակ, նման բան երբեք չի եղել: Նշանակում է սեղանը այնքան էլ կլոր չէր, իսկ թե եվրասեղանները ինչ ձեւ ու չափ ունեն, դա պետք է հարցնել կամ այս անհեթեթությունը ֆինանսավորող շվեդական կողմից կամ որեւէ եվրագենդերապաշտ կազմակերպությունից:

Անգամ այն պարզ բացատրությունը, որ եթե այս անհայտ ձեւի սեղանը կազմակերպվել է, որ մեր հասարակությունը հասկանա, թե ինչի մասին է խոսքը, ապա գոնե լուսաբանելու եկած լրագրողների համար արգելք չպետք է տեղծվի, նույնպես մնաց անմեկնելի:

«Հասարակություն առանց բռնության» հ/կ-ն բռնությամբ արգելեց ցանկացողների մուտքը հավաքատեղի: Սա իսկը եվրոպական երկակի ստանդարտների քաղաքականությունն է, երբ իրենց հանդեպ չի կարելի բռնություն թույլ տալ, բայց իրենք դրա իրավունքը վերապահում են իրենց:

Continue reading →

Հասցրեցին անել ու նոր հեռացան

Կառավարությունը մինչեւ հրաժարականի ներկայացնելը, միասնական դիրքորոշում է հայտնել «Կուտակային կենսաթոշակների մասին» ՀՀ օրենքի շուրջ Սահմանադրական դատարանի կայացրած որոշման վերաբերյալ: Այդ դիրքորոշման մեջ ասված է, որ ապրիլի 2-ի որոշումից հետո ստեղծվել է մի իրավիճակ, երբ այդ որոշմամբ հակասահմանադրրական ճանաչված դրույթների գործել-չգործելու, ինչպես նաեւ այդ որոշման եզրափակիչ մասի տարբեր կետերի հակասության վերաբերյալ տարաբնույթ, իրարամերժ մեկնաբանություններ, պարզաբանումներ ու բացատրություններ են ներկայացնում հանրությանը ինչպես ՍԴ դիմած պատգամավորները, այնպես էլ՝ իրավաբանները, քաղաքական ու հասարակական գործիչներն ու լրագրողները: «Պարզ է, որ նման արձագանքները համարժեք են տարբեր ուժերի եւ անհատների սուբյեկտիվ շահերով թելադրված նպատակներին, ինչը քաղաքական տեսանկյունից միանգամայն բնական երեւույթ է: Այդուհանդերձ, քաղաքական ու անձնական նպատակներով իրավունքի ընկալման շփոթ առաջացմնելը անընդունելի է եւ ՀՀ կառավարությունը հարկ է համարում հատուկ նշել, որ ՍԴ որոշումների, հատկապես այս որոշման մեկնաբանությունները պետք է հիմնվեն բացառապես Սահմանադրության, Սահմանադրական դատարանի մասին օրենքի եւ նույն որոշման դրույթների վրա»,- նշել են նախկին կառավարության անդամները:

Նշվել է նաեւ, որ ՍԴ-ն Սահմանադրությանը հակասող եւ անվավեր է ճանաչել օրենքի 8 իրավադրույթներ, իսկ 7 դրույթներ ճանաչել է Սահմանադրությանը համապատասխանող որոշման մեջ արտահայտված իրավական դիրքորոշումների շրջնակներում: Միեւնույն ժամանակ՝ համաձայն որոշման եզրափակիչ մասի 7-րդ կետի՝ «իրավական անվտանգությունը չխաթարելու նկատառումներով հակասահմանադրական ճանաչված բոլոր իրավանորմերի ուժը կորցնելու վերջնաժամկետ է սահմանվել ս.թ. սեպտեմբերի 30-ը, ինչը նշանակում է, որ այդ դրույթները մինչեւ սեպտեմբերի 30-ը պահպանում եմ իրենց իրավաբանական ուժը՝ գործում են, իսկ որոշմամբ սահմանված վերահաշվարկման պահանջը վերաբերում է մինչեւ սեպտեմբերի 30-ը կատարված ու կատարվելիք կուտակային վճարներին»:

Ի թիվս այլ պարզաբանումների, այդ միասնական դիրքորոշման մեջ նշվել է, որ «ՍԴ-ի որոշումից միանշանակ հետեւում է, որ մինչեւ սեպտեմբերի 30-ը ամբողջությամբ շարունակում է գործել օրենքի 5-րդ հոդվածը, ինչը նշանակում է, որ այդ ժամկետում պարտադիր կուտակային բաղադրիչին պարտադիր կարգով մասնակցում են 1974թ. հունվարի 1-ին եւ դրանից հետո ծնված վարձու աշխատողները, նոտարները, անհատ ձեռնարկատերերը: Բացի այդ, համաձայն օրենքի 7-րդ հոդվածի 1-ին մասի, նրանք պարտավոր են կատարել համապատասխան ամսեկան կուտակային վճար: Այս պահանջը նույնպես գործում է մինչեւ սեպտեմբերի 30-ը»: Փաստորեն, մինչեւ սեպտեմբերի 30-ը ամբողջությամբ գործում է նաեւ օրենքի 76-րդ հոդվածը:

Արդեն մեր կյանքից հեռացած կառավարությունը կարծես հրահանգել է նոր կառավարությանը հետամուտ լինել այս հարցին եւ կոչ է արել բոլոր շահագրգիռ կողմերին մասնակցել «Կուտակային կենսաթոշակների մասին օրենքում փոփոխություններ եւ լրացումներ կատարելու վերաբերյալ օրինագծի մշակմանը, որոնց միջոցով օրենքը կհամապատասխանեցվի սահմանադրական դատարանի որոշման պահանջներին»:

Continue reading →

Տոն է՝ Մայր Բնության գունագեղության ու ծաղկունքի – Հայ արիները կնշեն Զատիկը եւ Աստվածամայր Անահիտի Հրաշագործության տոնը

ՀԱՄ լրատվական կենտրոնից տեղեկացրեցին, որ ապրիլի 20-ին Հայ Արիական Միաբանության եւ Հայ Ազգայնականների Համախմբման անդամները Մեծամորի (Մեծամոր – Մեծ Մոր – Աստվածամոր – Մայր Անահիտի) պատմական տարածքում կնշեն ավանդական Զատիկի տոնը: Ապրիլի 20-ին Գարնանային օրահավասարն է՝ Լուսնի լրման օրվա կիզակետը:

ՀԱՄ Հոգեւոր հանձնախմբի քրմերն ու քրմի թեկնածուները կկատարեն ծիսական արարողություն եւ կփառաբանեն Մայր Անահիտին, ով իր Աստվածային գործառույթով ապահովում է բնության գունագեղությունն ու ծաղկունքը: Մայր Անահիտը նաեւ բերքատվության ու ամենայն բերրիության, պտղաբերության եւ մայրանալու Աստվածուհին է, եւ հայ արիներն ու ազգայնականները Աստվածամորն են դիմելու՝ բազմազավակ ու բարգավաճ ընտանիքներ ունենալու ակնկալությամբ:

Զատիկի տոնը արիական հայերը նշում են նաեւ որպես Մայր Անահիտի Հրաշագործության տոն:

Հայ արիներն ու ազգայնականները ծիսական արարողությունից ու փառաբանումներից հետո կրակ կվառեն եւ կրակի շուրջը կպարեն, ձոներգեր կասեն ի փառս Աստվածամայր Անահիտի, Հայ Աստվածների ու Տիեզերքի Արարչի: Այնուհետեւ երկնային արեւի երկրային խորհրդանիշ կրակի վրայից թռչելուվ՝ երազանքներ կպահեն, գույնզգույն ներկված ձվերով ձվախաղ կկազմակերպեն:

Զատիկը գարնան գունագեղության հաստատումն է արձանագրում, երբ գույները զատվում են միմյանցից ու ցուցադրում բնաշխարհի շքեղությունը: Հայ արիները դա գինեձոների են արժանացնում՝ նաե՛ւ վասն ազգի բարգավաճման ու ծաղկունքի:

Այդ օրը հայ արիներն ու ազգայնականները մեկ անգամ եւս հիշեցնում են Հայաստանի իշխանություններին՝ Անահիտ Աստվածուհու պղնձաձույլ արձաններից մեկի գլուխն ու ձեռքի մի մասը Անգլիայի մայրաքաղաք Լոնդոնի Բրիտանական թանգարանից Հայաստան տեղափոխելու անհրաժեշտության մասին:

Հասկանալի է, որ դա անգամ պետական մակարդակով բարդ խնդիր է, բայց պետք է այդ գործընթացն սկսել, որպեսզի նաեւ լուծումներ առաջարկվեն: Պետք է հետեւողականություն դրսեւորվի այն առումով եւս, որ հուշարձանի մասունքներն այդ թանգարանում դադարեն համարվել պարսկական կամ հունական:

Եզդիական համայնքն էլ նշեց Տաուսի Մալակը

ՀՀ եզդիների համայնքը, որ շարունակում է մնալ իր ավանդական արեւապաշտական հավատին, ապրիլի 16-ին նշեց եզդիների Նոր տարին՝ Տաուսի Մալակը:

Continue reading →

Սկիզբը՝ թիվ 39-42-ում (2013թ.) եւ թիվ 1-12-ում

Տավուշի մարզի զգալի հատվածը նախկինում եղել է Մեծ Հայքի Ուտիք եւ Գուգարք նահանգների մի մասը: Մարզն անունը ժառանգել է Ուտիք նահանգի Տավուշ գավառից: Տավուշն աչքի է ընկնում հարուստ բնությամբ, կենդանական աշխարհով, վանքային համալիրներով, խաչքարերով, բերդերով, կամուրջներով, դամբարաններով…

Պահակասար – Լեզգիների ներխուժման ժամանակ մարդիկ հերթով պահակ են կանգնել այստեղ: Թշնամու երեւալուն պես նրանք իմաց են տվել գյուղացիներին, եւ սրանք զինված գնացել են սարը: Մի գիշեր էլ լեզգիները թաքուն սպանել են պահակին: Դրանից հետո սարի անունը դրել են Պահակասար:

Ամուրիների սար – Կողբ գյուղի մոտ է: Լեզգիների հարձակման ժամանակ, երբ գյուղ լուր են բերում, թե թշնամին գալիս է, տասնութ ամուրի քաջ տղաներ զենքով դուրս են գալիս այնտեղ, դիրք մտնում, կտրում լեզգիների առաջը, մինչեւ ետեւից հասնում է օգնական ուժը: Ազատելով գյուղը թշնամիներից՝ տասնութ կտրիճներն էլ զոհվում են կատաղի կռվում: Դրանից հետո այդ սարը, ի հիշատակ ամուրի քաջերի, կոչվում է Ամուրիների սար:

Մանյակի ձոր – Աչաջուր գյուղից արեւելք է: Պատմում են, որ Աչաջուր գյուղից մի անգրագետ հողագործ ամուսնանում է Մանյակ անունով մի քաղաքացի կրթված կնոջ հետ: Մանյակը գյուղում դպրոց է բացում, երեխաներին տառաճանաչություն սովորեցնում, ներկայացումներ կազմակերպում: Չար մարդիկ ամուսնու առաջ բամբասում են Մանյակին, թե նա անբարոյական է, դրա համար էլ բոլորը, մանավանդ տղամարդիկ, միշտ սիրալիր ժպտում են նրան: Խանդից կուրացած ամուսինը, հերանց տանելու պատրվակով, Մանյակին հեռացնում է գյուղից եւ սպանում ձորում: Այդ օրվանից էլ ձորը կոչվում է Մանյակի ձոր:

Խռովկանի ձոր – Կոթի գյուղի հանդամասում է: Ասում են, թե մի մարդ մի աղջիկ է ունենում: Որ փեսացուն ուզում է՝‘չի տալիս: «Ինչ ունի, որ տամ»,- ասում է ու հաշվում ունեցվածքը: Մի անգամ էլ ուրիշ գյուղից մի տղա է գալիս խնամախոսության: Նստում են, զրուցում: Աղջկա հայրն ուզում է խոսքամիջից իմանալ, թե ինչ ունի-չունի փեսացուն: Սա էլ թե.

Continue reading →

Սկիզբը՝ թիվ 12-ում

Տեքստիլի եւ տրիկոտաժի ոլորտում եւ՛ բարձրագույն եւ՛ նախնական ու միջին մասնագիտական կրթություն կա: Թեեւ ոլորտի նախնական ու միջին մասնագիտական կրթության մասով վերջին մի քանի տարիներին շոշափելի փոփոխություններ են եղել, բայց կրթության եւ արտադրության միջեւ կապը անբավարար է: Նաեւ արտադրողների հետ է համագործակցության մակարդակը թույլ: Դասախոսական կազմի շրջանում էլ վերապատրաստումների եւ մասնագիտական շփումներն են անբավարար:

Հարկային ու մաքսային դաշտի առումով վիճակը հետեւյալն է. տեքստիլի եւ տրիկոտաժի ոլորտի հումքի (թել եւ գործվածք) ներմուծումը հիմնականում ազատված է մաքսատուրքից: Մաքսատուրքի 10% դրույքաչափ է կիրառվում պատրաստի տեքստիլ եւ տրիկոտաժե արտադրանքի Հայաստան ներմուծման վրա, իսկ դրանց արտահանումն ազատված է մաքսատուրքից: Բնագավառում կիրառվում է տնտեսության մեջ շահութահարկի ստանդարտ 20% դրույքաչափ: Շահութահարկի վճարումից ազատված է ձեռագործ գորգերի իրացումը: Ներմուծման եւ տեղական շուկայում ոլորտի արտադրանքի վաճառքի վրա սահմանված է ԱԱՀ ստանդարտ դրույքաչափ՝ 20%: Իսկ ներմուծվող կարի մեքենաները (ներառյալ դրանց կահույքը եւ ասեղները) ազատված չեն սահմանի վրա ԱԱՀ-ի գանձումից: Կարի ծառայություն մատուցող՝ արտերկրյա ընկերությունների պատվերներ արտադրող տեղական ընկերությունները հումք եւ մեքենա սարքավորումներ ներմուծելիս, օգտվում են «ժամանակավոր ներմուծում» մաքսային ռեժիմից:

Ոլորտի մասնակիցները վիճահարույց հարցեր են առաջ քաշում. դեռ 2011թ. Հայաստան ներմուծված գործվածքային հումքի վրա սահմանվել է ԱԱՀ գանձում սահմանի վրա, որից այն մինչ այդ ազատված է եղել: Հաշվի առնելով այն հանգամանքը, որ հումքը գալիս է մեծածավալ քանակով՝ բեռնատար մեքենայով/կոնտեյներով, իսկ դրա գործածումը արտադրության մեջ եւ վերջնական արտադրանքի իրացումը միանգամից տեղի չի ունենում, ըստ մի շարք արտադրողների՝ ԱԱՀ ամբողջ գումարի միանվագ գանձումը շրջանառու միջոցների նկատելի խնդիրներ է ստեղծում:

Մեկ այլ վիճահարույց խնդիր է այն, որ Հայաստանի եւ Թուրքիայի միջեւ միջպետական պաշտոնական կապերի բացակայությունը հաճախ խնդիրներ է ստեղծում Թուրքիայից հումքի ներմուծման պարագայում՝ կապված հումքի ծագման եւ որակի հետ: Սա, իր հերթին, հավելյալ կարեւորություն է ստանում, հաշվի առնելով այն փաստը, որ Հայաստանի ոլորտի հումքի մեծ մասն է գալիս  Թուրքիայից:

Այս ամենով հանդերձ մենք ոլորտի համաշխարհային մրցակից երկրների հանդեպ որոշակի ծախքային առավելություններ ունենք: Եվ այդ առավելությունը թե՛ աշխատուժի վարձատրության, թե՛ էլեկտրաէներգիայի ծախսի եւ թե՛ արտահանման որոշ երկրների գանձած մաքսատուրքի առումով է:

Continue reading →

Հայկական խոհանոց – (Ներկայացնում է «Արվասար» ռեստորանի (Ամիրյան 27) տնօրեն Ռուզաննա Նահապետյանը, հեռ` 531-027, 531-028) – (ռեստորանն ընդունում է կոլեկտիվ հայտեր)

– Աշտիշատի հաց

– Բաղադրությունը – Հացի խմոր – 150 գ, պանիր – 100 գ, հորթի միս – 100 գ, ապխտած միս (կամ՝ բաստուրմա) – 100 գ, տաքդեղ – 100 գ, աղ:

– Պատրաստման եղանակը – 100 գ խմորը օղակաձեւ բացել, վրան լցնել կտրտած պանիրը, հորթի միսը, ապխտած միսը, տաքդեղը, աղ՝ ըստ ճաշակի: Մնացած խմորն էլ՝ 50 գ-ն էլ բացել եւ թասակի ձեւով դնել այս զանգվածին՝ փակելով այն:

Սա դնել ջեռոցը եւ եփել 3000-ի տակ՝ 20 րոպե: Անու՛շ լինի:

* * *

Աշխարհի մարզական հեւքից – Հայկական մարզաշխարհ

Ֆուտբոլի Հայաստանի ազգային առաջնությունը

Հայաստանի բարձրագույն խմբի առաջնության 21-րդ փուլից հետո մրցաշարի առաջատար Երեւանի «Արարատ»-ը 1:0 հաշվով հաղթեց Երեւանի «Փյունիկ»-ին եւ ավելի ամրապնդեց իր դերքերը: Դրան նպաստեցին Երեւանի «Բանանց»-ի ու Գյումրիի «Շիրակ»-ի միավորների կորուստը: Երեւանյան թիմը ոչ-ոքի՝ 2:2 խաղաց Մարտունու «Ալաշկերտ»-ի հետ, իսկ Գյումրիի ֆուտբոլիստները 1:1 ավարտեցին հանդիպումը Երեւանի «Միկա»-ի հետ: Մայրաքաղաքի մեկ այլ թիմ՝ «Ուլիս»-ը, որը 6 խաղ անընդմեջ ոչ միայն պարտություններ էր կրում, այլեւ չէր կարողանում գրավել մրցակիցների դարպասը, 2 գնդակի առավելությամբ Կապանում հաղթեց տեղի «Գանձասար»-ին: Մրցաշարային աղյուսակն այսպիսի տեսք ունի.

Խ   Հ    Ո   Պ   ԽԳ-ԲԳ  Մ

1. «Արարատ»     21  12   6   3     25-10   42

2. «Բանանց»      21   9    8   4     27-16    35

3. «Շիրակ»          21   9    7   5     33-23   34

4. «Միկա»           21   7  10   4     22-20    31

5. «Փյունիկ»        21   7    6   8     34-26   27

6. «Գանձասար» 21   5    9   7     27-24   24

7. «Ալաշկերտ»   21   4    4  13    24-57   16

8. «Ուլիս»            21   4   4   13    14-30   16

Continue reading →

Հեղինակ՝ «Լուսանցք» շաբաթաթերթ (Հայաստան, գլխավոր խմբագիր՝ Արմենուհի Մելքոնյան – http://www.hayary.org/wph/?p=2223 

1. Կգա՞ ազգակրոն վարչապետը – Հայ արիականները եւ ազգայնականները ակնկալում են աներեւակայելի քայլ՝ ազգային արժեհամակարգի հետեւորդ վարչապետի նշանակում…

2. Անսպասելի՞, թե՞ հասունացած հրաժարական – Նոր վարչապետի պաշտոնի համար թեժ պայքար է ծավալվել. Նախագահը էական փոփոխություններ է խոստացել…

3. Ազգային համաձայնության մեկնակետը – Վարչապետի հրաժարականը առաջ է բերել նոր քաղաքական իրավիճակ, բայց ասպարեզում անկայուն ու անմիաբան հներն են…

4. Կապրի՞, թե՞ կպառակտվի ընդդիմությունը – Անբնական է, բայց մեր կառավարիչները մեզ դնում են այնպիսի վիճակում, որ գոյատեւելու համար էլ ենք մաքառում…

5. Չկա՛ գաղափարական պայքար.- Եվ աթոռակռիվն է քաղաքականության մղիչը – Քաղաքական դաշտում որեւէ նոր բան դեռ չի եղել: Ամեն ինչ նույնն է…

6. Քայլ, որին չեն սպասել ո՛չ ներսում, ո՛չ դրսում… Վերջին հարվածը՝ «գենդերին» եւ անբարոյականությանը… Տրանսպորտի սակագինը կթանկանա՞…

7. Այլընտրանքը՝ Ազգային Սահմանադրություն – Առաջնայինն ու ամենակարեւորը այն է, որ մեր պետությունը պետք է ունենա կենտրոնաձիգ եւ ուժեղ կառավարում…

8. Ի պատասխան Կենտրոնական բանկի պատասխանին. – «Յունիբանկ»-ի վարկային ճամպրուկը շահումով լոտո էլ մնաց – Իսկ ԿԲ-ն էլ բանկային ոլորտի վերահսկողը չէ…

9. Ցավոտ կետեր – «Made in Armenia»-ն կարո՞ղ է նախանձ շարժել – Իսկ առայժմ իտալական ներքնաշորեր ենք կարում… Բնագավառի զարգացմանը խոչընդոտում են վիճակահարույց որոշ հարցեր…

10. Մեր ավանդապատումները շարքից – Լոռու մարզ… Ի՞նչ կա Հայաստանի պետական գանձարանում… Հայ ընտանիքների քայքայման պատճառը…

11. Քեսաբ.- երբ ենք զգալու ողջ ճշմարտությունը թուրքի մասին… Ներքին թուրքը՝ մեզ ցեղասպանելու գործիք… Թուրքական «զրո խնդիր հարեւանների հետ» հայեցակարգի «իրական բովանդակությունը»…

12. Ֆիզիկական արատը տգեղության չափանիշ չէ… Հայկական խոհանոց – Տարեդարձի ուտեստ… Աշխարհի մարզական հեւքից… Տեղադրե՛ք ձեր գովազդը՝ www.hayary.org-ում… Կարդացե՛ք եւ բաժաբորդագրվե՛ք «Լուսանցք»…

Հայությունն այսօր ապրում է իր հերթական ճակատագրական պատմափուլը, երբ ներազգային ու միջազգային հիմնախնդիրները ակնհայտ զուգակցված են ու իրական լուծման կարիք ունեն: Առանցքային հարցերի բոլոր ժամանակավոր լուծումները վերածվում են քաղաքական բումերանգի, քանզի հարմարեցվում են այս կամ այն գերուժի շահերին: Իսկ կան անհետաձգելի խնդիրներ, որոնց արագ ու արդյունավետ լուծում չտալը կարող է վտանգել Հայաստանի ու հայության պաշտպանվածությունն ու անվտանգությունը:

Հայ Արիական Միաբանության եւ Հայ Ազգայնականների Համախմբման ղեկավարների համատեղ նիստում քննարկվել են ներքին ու արտաքին այն հիմնախնդիրները, որոնք օր առաջ պետք է դառնան ոչ միայն մեր պետության ներքին օրակարգային հարցեր, այլեւ մտնեն միջազգային օրակարգ:

Համատեղ նիստում քննարկվել է նաեւ ազգային արժեհամակարգի հետեւորդ վարչապետ ունենալու անհրաժեշտությունը: Հասկանալի է, որ դա արտաքին լուրջ հակազդեցության կարժանանա, քանի որ համաշխարհային մամլիչի՝ աշխարհի գաղտնի կառավարության աչքերն ամենուր են, հատկապես՝ Կովկաս-Հայկական Լեռնաշխարհ-Մերձավոր Արեւելք տարածաշրջանում, որտեղից միշտ են սկսվել աշխարհակարգի որոշակի փոփոխությունները, համաշխարհային վերաձեւումները, սակայն պիտի կտրուկ քայլեր անել Հայկական Ազգային Պետության ձեւավորմանն ուղղված:

Մենք պարտավոր ենք ոչ միայն փոխլրացնող քաղաքականությամբ հնարավորինս պահպանել չեզոքությունը երկբեւեռ աշխարհում, որն ավելի ակնհայտ կգործի ուկրաինական իրադարձություններից եւ Ղրիմի՝ Ռուսաստանին վերամիավորվելուց հետո, այլեւ այդ փոխլրացնող քաղաքականությունում պետք է գործնականում ներառենք հայկական շահերը:

Ռազմավարական գործընկեր, քաղաքական դաշնակից, սոցիալ-տնտեսական, լեզվա-կրթա-մշակութային, բարոյա-խրատական աջակից, բարեկամ կամ հարեւան, թե այլ ձեւակերպմամբ քաղաքական տեսությունները չպետք է միակողմանի լինեն այլեւս:

Continue reading →

Վարչապետ Տիգրան Սարգսյանի հրաժարականն անսպասելի էր ոչ թե հրաժարականի չսպասված լինելու առումով, այլ՝ որպես հանկարծակի քայլ, ինչը թերեւս միայն նախագահ Սերժ Սարգսյանը կարող է բացատրել: Բայց նախագահը չի մանրամասնել: Ավելին՝ ԱԺ փոխնախագահ եւ ՀՀԿ մամլո խոսնակ Էդուարդ Շարմազանովը հայտնեց, թե ավելի քան 1 ամիս է, ինչ հրաժարականի դիմումը ներկայացվել է երկրի ղեկավարին, պարզապես նախագահը խնդրել է վարչապետին սպասել, մինչեւ Մաքսային միության եւ կենսաթոշակային պարտադիր կուտակային համակարգի դատավարական հարցերը որոշակի հստակեցումների հասնեն: Սակայն հրաժարականի մասին տեղեկատվության հաստատումից հետո, այդ անսպասելիությունը ակնհայտ երեւում էր բոլորի մոտ, թե՛ պետական, թե՛ քաղաքական, թե՛ հանրային ոլորտներում: Անգամ վարչապետի համար է դա անսպասելի եղել, քանի որ նա շատ հանգիստ վարել է կառավարության նիստը եւ նույն հանդարտությամբ ժամանել ՀՀԿ ԳՄ նիստին:

«Լուսանցք»-ը գրել է, թե հայտնի էր, որ նախագահը դեռ իր նախորդ պաշտոնավարման ընթացքում է ցանկացել փոխել վարչապետին, նաեւ այս պաշտոնավարման ժամանակ, ինչին ընդդիմացել են միջազգային կառույցները, մասնավորապես համաշխարհային բանկը, որն ի սկզբանե հովանավորել է Տիգրան Սարգսյանի նշանակումը: Ամեն դեպքում՝ հանրային բողոքները դարձել էին բազմաբնույթ եւ հրաժարականի քաղաքական պահանջը հասունացած էր: Եվ, ըստ երեւույթին, ՀՀ նախագահը կարողացել է դրսի շահագրգիռ կողմերին ապացուցել, որ վարչապետն իրեն սպառել է ու բնակչության մեծամասնությունը չի վստահում կառավարությանը:

Ու վարչապետը ներկայացրեց իր հրաժարականը, ինչը բավարարվել է նախագահի կողմից: Տիգրան Սարգսյանն իր ֆեյսբուքյան էջի միջոցով դիմել է ՀՀ քաղաքացիներին. «Դեռեւս փետրվար ամսին ես հանրապետության նախագահ Սերժ Սարգսյանին դիմեցի խնդրանքով՝ ընդունել իմ հրաժարականը: Որոշումս հասունացած էր եւ խորը գիտակցված: Պայմանավորվեցինք դիմումի ներկայացման պահը հետաձգել մի շարք կարեւոր պետական միջոցառումների ու ՀՀԿ տնտեսական համաժողովի անցկացման անհրաժեշտությունից ելնելով: Իմ շնորհակալությունն եմ հայտնում բոլոր այն մարդկանց, ում հետ աշխատել եմ, եւ առաջին հերթին երկրի նախագահին՝ վարչապետի բարձր պաշտոնն ինձ վստահելու համար: Նոր կառավարությանը մաղթում եմ հայրենանվեր ու արդյունավետ աշխատանք»:

ՀՀ Սահմանադրության 55-րդ հոդվածը սահմանում է կառավարության հրաժարականը, որի համաձայն, ՀՀ նախագահն ընդունում է կառավարության հրաժարականը նորընտիր Ազգային ժողովի առաջին նիստի, ՀՀ նախագահի կողմից իր պաշտոնն ստանձնելու, կառավարությանն անվստահություն հայտնվելու, կառավարության ծրագրին հավանություն չտալու, վարչապետի կողմից հրաժարական ներկայացվելու կամ վարչապետի պաշտոնը թափուր մնալու օրը: Նախագահի կողմից կառավարության հրաժարականի ընդունումից հետո կառավարության անդամները շարունակում են իրենց պարտականությունների կատարումը՝ որպես պաշտոնակատարներ, մինչեւ նոր կառավարության կազմավորումը: Նույն հոդվածով սահմանվում է նաեւ վարչապետի նշանակման կարգը. խորհրդարանում պատգամավորական տեղերի բաշխման եւ պատգամավորական խմբակցությունների հետ խորհրդակցությունների հիման վրա վարչապետ է նշանակում պատգամավորների մեծամասնության վստահությունը վայելող անձին, իսկ եթե դա հնարավոր չէ, ապա առավել թվով պատգամավորների վստահությունը վայելող անձին: Նախագահը վարչապետ է նշանակում կառավարության հրաժարականի ընդունումից հետո՝ 10-օրյա ժամկետում: Կառավարությունը կազմավորվում է վարչապետի նշանակումից հետո՝ 20-օրյա ժամկետում:

Continue reading →

ՀՀԿ ԳՄ երեկվա նիստից հետո որոշվեց, որ նոր վարչապետի անունը հայտնի կդառնա երկուշաբթի միայն: Թեեւ ամեն ինչ տանում էր նրան, որ վարչապետ է լինելու Հովիկ Աբրահամյանը: Համենայնդեպս, ԱԺ ՀՀԿ խմբակցության ղեկավար Գալուստ Սահակյանի թեթեւ ձեռամբ այլեւս կասկած չէր մնացել: Ինչ-որ բա՞ն փոխվեց այն բանից հետո, երբ երկրի ղեկավարին հանդիպեցին ԲՀԿ-ի, ՀՅԴ-ի եւ ՕԵԿ-ի ղեկավարները: Հազիվ թե: Կամ՝ գուցե Հովիկ Աբրահամյանին մրցակի՞ց  է հայտնվել՝ «գազի» Կարենը՝ նույնինքը՝ նախկին «Հայռուսգազարդ» -ի նախկին տնօրեն Կարեն Կարապետյանը: Տարբերակները բազմաթիվ են, չնայած գլուխկոտրուկի կարիք չկա, մի քանի օրից ամեն ինչ պարզ կլինի: Խնդիրն այլ է՝ նոր վարչապետը կշարունակի՞ նախկինի ծրագրերը, թե՞ առաջ կքաշի այլ՝ ՀՀ-ում աշխատող ծրագրեր:

Չի բացառվում, որ ՀՅԴ-ն եւ ԲՀԿ-ն «թունդ» ընդդիմադիր դիրքերից վերադառնան իշխանական դաշինք, որին քննադատում էին նաեւ համատեղ գործած մեղքերի համար: Նոր կառավարությունն էլ գուցե ավելի բազմաշերտ լինի, անգամ նախկին իշխանավորներից, որ ներկա ընդդիմադիրներ են, ոմանք կարող են պաշտոններ ստանալ: Այս ամենը չի բացառվում, եթե երկրի նախագահը վարչապետի՝ բոլորին հարմար թեկնածուն առաջադրի: Հակաիշխանական քառյակը այս դեպքում ուղիղ 2 կես կլինի, քանի որ, ըստ արտահայտած դիրքորոշումների, բացառվել է, որ ՀԱԿ-ն ու «Ժառանգություն»-ը իշխանության մաս կազմեն:

Ապրիլի 18-19-ը ՀՅԴ-ն ծրագրել է Գերագույն ժողով անցկացնել եւ ՀՅԴ ԳՄ փոխներկայացուցիչ Արսեն Համբարձումյանը հաստատել է այն փաստը, որ քննարկվելու են կազմակերպչական, քաղաքական, կուսակցական հարցեր: Սովորաբար այդ ժողովներն ընթանում են փակ-գաղտնի ռեժիմով: Հավանական է, որ փոփոխություններ կատարվեն ՀՅԴ ղեկավար կազմում։ Երեկ ՀՅԴ ներկա ղեկավար կազմը պիտի հանդիպեր Սերժ Սարգսյանի հետ, որպեսզի քննարկեր նոր վարչապետի ու ազգային համաձայնության կառավարության հարցը։ ՀՅԴ-ն թերեւս դեմ չէ մաս կազմել ազգային համաձայնության կառավարությանը, եթե այն ձեւավորվի, բայց ԲՀԿ-ն է մտորումների մեջ։ Եթե ԲՀԿ-ի հետ համաձայնություն ձեռք չբերվի, ՀՅԴ-ն գուցե ստիպված լինի հրաժարվել իր մտադրությունից: Բայց նկատի ունենալով այն հանգամանքը, որ ԲՀԿ-ական գործարարները մի քանի օր է ինչ ուրախության մեջ են, երեւի թե արդեն իշխանամետ լինելու որոշումը արծարծվել է:

ԲՀԿ-ի մշտական քննադատությունն այն մասով էր, որ նախկին կառավարությունը տապալել է տնտեսությունն ու սոցիալական ծանր իրավիճակի հանգեցրել, եւ միակ ճիշտ տարբերակը համարում էր կառավարության հեռանալը: Հակաիշխանական քառյակի գործունեության հիմքում եւս ազգային համաձայնության կառավարություն ձեւավորելու խնդիրն էր դրված (որոշակի տարաձայնություններով հանդերձ), ուստի վարչապետի հրաժարականը առաջ է բերել նոր քաղաքական իրավիճակ, երբ կա՛մ պետք է գնալ ազգային համաձայնության կառավարության ստեղծմանը, կա՛մ՝ մնալ ընդդիմադիր եւ նորից զբաղվել անհասկանալի գործունեությամբ:

Continue reading →

Ընդդիմադիր քառյակի վերջին հանդիպումը, ըստ ՀԱԿ խմբակցության ղեկավար Լեւոն Զուրաբյանի, հավաստել է, որ իրենց գործը կշարունակվի ու «կընդունվեն այնպիսի որոշումներ, որոնք չեն հուսահատեցնի մեր ժողովրդին»: «Համաձայնության դաշտը փորձում ենք լայնացնել եւ  շարունակել»,- ասել է նա: Իսկ այն հարցին, թե պատգամավորը կարո՞ղ է բացառել, որ քառյակը չի գնա իշխանության հետ կոալիցիա կազմելուն, ինչը հորդորել էր նաեւ 1-ին նախագահ Լեւոն Տեր-Պետրոսյանը, ՀԱԿ-ի ներկայացուցիչը պատասխանեց, որ ոչ մեկի անունից չի ցանկանում խոսել, բայց վստահ է, որ ամեն ինչ կարվի, որպեսզի ժողովուրդը հուսախաբ չլինի:

Ջանքեր է գործադրում ՀԱԿ-ը միասնական մարտավարության ստեղծման համար, քանի որ հակառակ դեպքում՝ քառյակը կլուծարվի։ Քառյակն ունեցել է տարբեր մարտավարություններ ՀՀ-ում փոփոխությունների կամ իշխանափոխության վերաբերյալ, բայց հիմա կանգնած են մի իրավիճակի առաջ, երբ մարտավարությունը պիտի միասնական դարձնել:

Իսկ Ազատության հրապարակում «Ժառանգության» առաջնորդ Րաֆֆի Հովհաննիսյանը հայտարարեց, թե քառյակ չկա, ոչ էլ եռյակ, կա ներխորհրդարանական ուժերի համագործակցություն. «Մեր երկիրն արտահերթ իրավիճակում է: Միշտ ողջունել եմ խորհրդարանի ներսում 4 խմբակցությունների համագործակցությունը, բայց քանի դեռ չեն հանդիպել այդ ուժերի եւ քաղաքացիական հատվածի ղեկավարները, չի կարելի խոսել գլոբալ համագործակցության կամ քառյակի մասին»: Նա կարծում է, որ համագործակցությունը կշարունակվի, բայց արդեն հասունացել է պահը, «թե ով է պատրաստ իր հետ հանդիպելու ժողովրդին՝ որոշելու համար, թե ինչպես են հանելու ապրիլ ամիսը, ժողովուրդը ստանալու՞ է միասնական հրապարակն ու իրեն պատկանող իշխանությունը»: Մեկ անգամ էլ ընդգծեց, որ «պատրաստ է հանդիպել Գագիկ Ծառուկյանի, Լեւոն Տեր-Պետրոսյանի, Հրանտ Մարգարյանի, ինչպես նաեւ արտախորհրդարանական ուժերի ներկայացուցիչների հետ»:

«Ժառանգություն»-ը կարծում է, որ ժողովրդին այլեւս չի հետաքրքրում, թե այս կամ այն գործիչն առանձին ինչ է ասում, եթե կա ձեւաչափ, եթե ժողովուրդն ակնկալիք ունի քաղաքական ուժերից միասին կանգնելու, ապա այդպես էլ պետք է արվի:

ԲՀԿ-ի օրակարգում այս պահին կոալիցիայի մաս կազմելու հարց չկա. այս մասին ասել է ԲՀԿ-ական պատգամավոր Ստեփան Մարգարյանը, ինչ վերաբերում է այն հարցին, թե Լեւոն Տեր-Պետրոսյանն իր մի հարցազրույցում հորդորել է քաղաքական ուժերին զերծ մնալ քաղաքական «խաղերի մեջ մտնելուց», պատգամավորը նշել է, որ «ԲՀԿ-ն ոչ մեկի հետ խաղերի մեջ չի եղել ու չի էլ մտնի»:

ԲՀԿ-ին մինչեւ հիմա ոչ ոք չի դիմել կոալիցիոն կառավարություն մտնելու հարցով, այնտեղ տեղյակ չեն, արդյո՞ք իշխող կուսակցությունը մտադիր է կոալիցիոն կառավարություն ձեւավորել: Առայժմ հայտնի չէ, թե որը կլինի ԲՀԿ-ի վերաբերմունքը, եթե Սերժ Սարգսյանը համաձայնվի կյանքի կոչել այդպիսի ծրագրեր։

Continue reading →

ԱԺ ԲՀԿ պատգամավոր Մարտուն Գրիգորյանը անդրադառնալով նոր կառավարության ձեւավորմանը՝ ասել է, որ եթե ԲՀԿ-ն նորից մտնի կոալիցիա, ապա «չի նմանվելու ոչ մի կուսակցության (նկատի ունի ՕԵԿ-ին), առավել եւս՝ ոչ մի կուսակցության կցորդ չի կարող դառնալ»: Ըստ պատգամավորի, իրենք դեմ են միանձնյա, առանձին մի թեւի որոշմամբ թելադրվող աշխատանքին, կողմնակից են թիմային աշխատանքին, եւ «եթե իշխող կուսակցությունը պատրաստ է միանձնյա որոշումներ չկայացնել, երկրի առաջ ծառացած խնդիրները թիմային կառավարումով առաջ տանել, էստեղ դեմ կանգնելը, չուզելը արդեն ինքնանպատակ է դառնում, ուղղակի կապրիզի պես մի բան»: Այլ ԲՀԿ-ականներ նույնպես կարծում են, որ ընդդիմադիր կեցվածք ունենալը պետք է ինքնանպատակ չլինի, պիտի պայմանավորված լինի ծրագրերով, ինչն էլ պատրաստ են իրականացնել քաղաքական կոալիցիայի կազմում:

ՀՀ նախագահի հետ առաջիկա հանդիպման ժամանակ ԲՀԿ-ականները ներկայացնելու են իրենց մոտեցումները. ասել է ԲՀԿ խմբակցության մեկ այլ պատգամավոր Միքայել Մելքումյանը: «Պետք է լինի կուրսի, ծրագրային փոփոխություն եւ ոչ թե զուտ անձերի փոփոխություն, ինչը մեզ համար ընդունելի չէ։ Մեր օրակարգն ուժի մեջ է, որն արտահայտվում է նաեւ քառյակի հետ ամենօրյա մեր մոտեցումները ճշտելով, գործունեությամբ»,- նշել է պատգամավորը:

ՀՅԴ-ում ավելի բուռն է քննարկվում կոալիցիա վերադառնալու հարցը, անգամ խոսում են, որ այդ դեպքում ՀՅԴ-ն առնվազն 2 նախարարական պորտֆել կստանա: Նախընտրելի է համարվում գյուղատնտեսության նախարարի պաշտոնը։ Ավելին, մտադիր են հետագա բանակցությունների ժամանակ քննարկման առարկա դարձնել ՀՅԴ Բյուրոյի անդամ Դավիթ Լոքյանին փոխվարչապետի պաշտոնում նշանակելու հարցը, եթե, իհարկե, բանակցությունները ցանկալի հունով ընթանան։

ՕԵԿ-ը քաղխորհրդի նիստ էր հրավիրելու երեկ եւ քննարկվելու էր նոր ձեւավորվելիք կառավարությունում պատասխանատվություն ստանձնելու խնդիրը, ՕԵԿ նախարարների մնալ-չմնալու հարցը: Կուսակցության ղեկավար Արթուր Բաղդասարյանն այս պահին մտադրություն չունի նախարարների կազմը փոխել, բայց չի բացառվում, որ նոր հարցեր առաջանան: Հատկապես, որ խոսակցություններ կան, որ նա ցանկանում է ընդհանրապես հրաժարվել «նախարարական կորպուսից», քանի որ դրանք «եկամտաբեր չեն»: Նշենք, որ մերթ ընդ մերթ վիճաբանություններ են լինում ՕԵԿ նախարարների ու ղեկավարի միջեւ, սակայն հետո կարողանում են հարթել:

Continue reading →