Հայոց Ազգային Բանակ (ՀԱԲ) ռազմական կազմավորման 18-ամյակը

Սույն թվի ապրիլի 24-ին լրացավ Հայոց Ազգային Բանակ (ՀԱԲ) ռազմական կազմավորման 18-ամյակը: Այս առիթով շնորհավորում ենք բոլոր հաբականներին, ովքեր առաջիններն էին կամավորական հզոր բանակ ստեղծողներից, և նույնիսկ ՀԱԲ-ի լուծարումից հետո, այլ կամավորական ջոկատներում պայքարեցին հանուն մեր սահմանների պաշտպանության և Արցախի ազատագրման: Մասնակցեցին նաև հայոց կանոնավոր բանակի ստեղծմանը:
Հավերժ փառք ՀԱԲ-ի նահատակ մարտիկներին և կազմավորման հանգուցյալ գլխավոր հրամանատար Ռազմիկ Վասիլյանին:

ՀԱԲ-ի հազարապետ, «Կոտայք» գնդի հրամանատար
ՀԱՄ առաջնորդ Արմեն Ավետիսյան

ՀԱԲ


ՀԱՅՈՑ ԱԶԳԱՅԻՆ ԲԱՆԱԿԻ
/ՀԱԲ-ի/ Ծրագիր.

                                  
ՀԱՅ ԱԶԳԸ ԿԱՆԳՆԱԾ Է ԵՐՐՈՐԴ ՀԱՆՐԱՊԵՏՈՒԹՅԱՆ ՇԵՄԻՆ:
Արդի Հայաստանում չկան դասակարգեր, դասակարգային խավեր և շերտավորումներ, ուստի և չեն կարող լինել նրանց շահերն արտահայտող կուսակցություններ: Առկա բոլոր «կուսակցությունները» այդ իսկ պատճառով չեն կարող ունենալ, մանավանդ արդի պայմաններից բխող, ԱԶԳԱՅԻՆ ԾՐԱԳԻՐ:
Ռուսաստանի լծի տակ, թե նրանից դուրս ՀԱՅ ԱԶԳԻՆ ՄՇՏԱՊԵՍ ՈՒՂԵԿՑԵԼՈՒ Է ԿԱՐՄԻՐ ԵՎ ՍՊԻՏԱԿ ՑԵՂԱՍՊԱՆՈՒԹՅՈՒՆԸ:
ՀԱՅ ԱԶԳԻ կենսագանձի /գենոֆոնդի/ գոյության նախապայմանը  ՀԱՅՈՑ ԱԶԳԱՅԻՆ ԲԱՆԱԿՆ է, իսկ բարգավաճման գրավականը՝ ՀԱՅԱԴԱՎԱՆ ԱԶԳ-ԲԱՆԱԿԸ:
ՀԱՅՈՑ ԱԶԳԱՅԻՆ ԲԱՆԱԿԸ ՀԱՅ ԱԶԳԻ գոյատևման արտահայտությունն է, նրա կամքի դրսևորումը:
ՀԱՅՈՑ ԱԶԳԸ լավագույնս կարող է դրսևորել իր ընդունակություններն ու կարողությունները, լուծել ԱԶԳԻ առջև ծառացած խնդիրները, նպաստ բերել համաշխարհային քաղաքակրթության զարգացմանը, ունենալով պաշտպանության կայուն  երաշխիքներ:
ՀԱՅ ԺՈՂՈՎՐԴԻ գոյապահպանման գործում ՀԱՅՈՑ ԱԶԳԱՅԻՆ ԲԱՆԱԿԸ անխտիր համագործակցում է հասարակության բոլոր ուժերի հետ, որովհետև ԱԶԳԻ գոյապահպանությունը վերաբերում է բոլորին և յուրաքանչյուրի անկապտելի իրավունքն է:
ՀԱՅՈՑ ԱԶԳԱՅԻՆ ԲԱՆԱԿԻ գերխնդիրը ՀԱՅԱՍՏԱՆԻ և ԱՐՑԱԽԻ անձեռնմխելիությունն է, Հայ – ադրբեջանական /ներառյալ Նախիջևանը/, հայ-վրացական սահմանների պաշտպանությունը: ՀԱՅՈՑ ԱԶԳԱՅԻՆ ԲԱՆԱԿԸ պաշտպանելու է նաև հայ-թուրքական և հայ-պարսկական սահմանները:
Ռուսաստանի լծի ներքո ՀԱՅՈՑ ԱԶԳԱՅԻՆ ԲԱՆԱԿԸ բացառում է առճակատման նախաձեռնությունը կանոնավոր բանակի զորամասերի հետ:
ՀԱՅՈՑ ԱԶԳԱՅԻՆ ԲԱՆԱԿԻ գործողությունները ուղղված չեն ՀԱՅԱՍՏԱՆԻ ու ԱՐՑԱԽԻ տարածքի և նրանց սահմանակից երկրների ժողովուրդների դեմ: ՀԱՅՈՑ ԱԶԳԱՅԻՆ ԲԱՆԱԿԻ անխախտ սկզբունքն է խաղաղ և համարաշխ ապրել բոլոր ժողովուրդների հետ՝ հիմնված միջազգային իրավական չափանիշների վրա՝ իրենց պատմական հայրենիքում ազգերի ինքնորոշման իրավունքի վրա:
ՀԱՅՈՑ ԱԶԳԱՅԻՆ ԲԱՆԱԿԸ մերժում է քաղաքական կուսակցությունների և խմբավորումների զինված ուժեր ունենալու գաղափարը, առավել ևս դրանց իրականացումը, դրանում տեսնելով քաղաքացիական եղբայրասպան պատերազմի ստույգ վտանգը:
ՀԱՅՈՑ ԱԶԳԱՅԻՆ ԲԱՆԱԿԸ ԵՐԱՇԽԱՎՈՐՎԱԾ մերժում է իր ենթակայությունը որևէ քաղաքական կուսակցության:
Իր ազգանպաստ գործունեության մեծ երաշխիքը ՀԱՅՈՑ ԱԶԳԱՅԻՆ ԲԱՆԱԿԸ տեսնում է 200-հազարանոց աշխարհազորի և 30-հազարանոց կանոնավոր բանակի շուտափույթ կազմակերպման մեջ, ներքին և արտաքին Սփյուռքի հետ ՍԵՐՏ ՀԱՄԱԳՈՐԾԱԿՑՈՒԹՅԱՆ պայմաններում:
Թուրքիայի ու Ադրբեջանի հետ ՀԱՅՈՑ ԱԶԳԱՅԻՆ ԲԱՆԱԿԸ իր հարաբերությունները կարող է սկսել միայն այն բանից հետո, երբ այդ պետությունները ՄԱԿ-ում կհայտարարեն ՀԱՅՈՑ ՑԵՂԱՍՊԱՆՈՒԹՅԱՆ ճանաչման և կորուստների հատուցման պատրաստակամության մասին:
ՀԱՅՈՑ ԱԶԳԱՅԻՆ ԲԱՆԱԿԸ իր մարտիկներին զինում է ՀԱՅԱԴԱՎԱՆՈՒԹՅԱՆ ոգով, ՀԱՅ ԺՈՂՈՎՈՒՐԴԸ՝ ԱԶԳ-ԲԱՆԱԿ դարձնելու աննախադեպ մտադրությամբ:
ՀԱՅԱԴԱՎԱՆՈՒԹՅՈՒՆ է՝ Հայոց պատմական տեղանունների վերականգնումը, համաշխարհային ճանաչման արժանացած Հայոց ավանդական արհեստների /առաջին հերթին զինագործության/ և արվեստների վերականգնումը, համաշխարհային առևտրում Հայոց ձեռներեցության վերստին ստանձնումը, արտադրության միջազգային ստանդարտի նվաճումը, ԱԶԳԻ զավակների մեջ հավատարմության, ազնվության, եղբայրության, անձնազոհության պատրաստակամությունը, ազգային նկարագրի գերադասությունը, մայրենի լեզվի /գրաբար, աշխարհաբար, բար-բառ/, պատմության, գրականության տիրապետումը, հեթանոսական և քրիստո- նեական տաճարների, ամրոցների, քաղաքների, լքված գյուղերի վերականգնումը, մշակույթի իմացությունը՝ հեթանոսականից մինչև այսօր: Հայոց պատմության նշանավոր անձերի՝ նվիրյալների ու նզովյալների ճշմարտացի և խոր իմացությունը՝ պաշտամունքի և նզովքի ծեսերով ու արարողություններով, Հայոց պատմության հեթանոսական և ողբերգական դրվագների ցուցադրությամբ, Հայոց լեռների, լճերի, գետերի պաշտամունքի օրերի և ծեսերի սահմանմամբ և կատարմամբ, Ցանքի, Հունձքի և Այգեկութի տոնակատարությամբ, արհեստների փառաբանությամբ:
ՀԱՅԱԴԱՎԱՆՈՒԹՅՈՒՆԸ պետք է սկսվի նախ և առաջ ՀԱՅՈՑ ՊԱՏՄՈՒԹՅԱՆ անաչառ հայեցի շարադրանքից, զերծ օտարամատույց հարկադրանքից և որոգայթից:
ՀԱՅԱԴԱՎԱՆՈՒԹՅԱՆ ԲԱՐՈՅԱԿԱՆ ՍԿԶԲՈՒՆՔՆ է՝ նպաստել ՀԱՅՈՑ ԱԶԳԻ համակողմանի բարգավաճմանը իր բնօրրանում, ԱԶԳԻ բոլոր կորուստների՝ նյութական և հոգևոր վերականգնումով: ՀԱՅԱԴԱՎԱՆՈՒԹՅԱՆ պայմաններն են՝ ԲԱԶՄԱԶԱՎԱԿՈՒԹՅՈՒՆԸ, ԱԶԳԱՅԻՆ ՀԱՐՍՏՈՒԹՅԱՆ ԲԱԶՄԱՊԱՏԿՈՒՄԸ, ՀԱՅԱՀԱՎԱՔՆ ու ՀՈՂԱՀԱՎԱՔԸ, տարագիր մեծանուն ՀԱՅԵՐԻ վերադարձը և վախճանվածների աճյունի վերաթաղումը մայր հողում:
ՀԱՅՈՑ  ԱԶԳԱՅԻՆ  ԲԱՆԱԿԻ  դրամա-տնտեսական գործունեությունը ելնում է ՀԱՅԱՍՏԱՆԻ արդի վիճակից: Իր դրամա-տնտեսական ապահովությունը և եկամտաբերությունը ՀԱՅՈՑ ԱԶԳԱՅԻՆ ԲԱՆԱԿԸ ակնկալում է ճամբար-ֆերմաների, արտադրությունների, եղբայրությունների /կոոպերատիվներ/ կազմակերպումից, ամենից առաջ աղետի գոտում: Իր դրամա-իրային գործունեության հուսալիության երաշխիքը ՀԱՅՈՑ ԱԶԳԱՅԻՆ ԲԱՆԱԿԸ տեսնում է սեփական դրամատուն ունենալու մեջ: 
ԱԶԳԻ հուսալի պաշտպանության, ՀԱՅՈՑ ԱԶԳԱՅԻՆ ԲԱՆԱԿԻ հզորացման համար Հանրապետության բոլոր խոշոր քաղաքներում, շրջկենտրոններում և ռազմավարական /ստրատեգիական/ հանգույցներում ծրագրվում է կազմակերպել կայազորներ, պաշտպանական  համակարգեր:
Մանկապարտեզներում /խևսուրական սկզբունքով/, հանրակրթական դպրոցներում, ուսումնարաններում և բուհերում /շվեյցարական սկզբունքով/, հիմնարկ-ձեռնարկություններում, գյուղական տնտեսություններում ներդրվում են մարտական մարզաձևերը, ուսուցանվում զինավարժություն և զորավարժություն: 
ՀԱՅՈՑ ԱԶԳԱՅԻՆ ԲԱՆԱԿԸ ունի իր դրոշը, երդումը, զինանշանը, տարբերանշանները, զինգրքույկը, համազգեստը, դատաստանագիրքը և դատարանը:
ՀԱՅՈՑ ԱԶԳԱՅԻՆ ԲԱՆԱԿԸ  իր զինված ուժերը և լիազորությունները անվերապահ կհանձնի ԱԶԳԱՅԻՆ ԾՐԱԳԻՐ ունեցող ԵՐՐՈՐԴ ՀԱՆՐԱՊԵՏՈՒԹՅԱՆ ԽՈՐՀՐԴԱՐԱՆԻՆ, որը պայմանագրային հիմունքներով կտնօրինի ազգամիջյան և միջազգային բոլոր հարաբերությունները՝ ի շահ ՀԱՅ ԱԶԳԻ տնտեսական, մշակութային, քաղաքական և ռազմական դաշնակցության: 
                                  

 Հ Ա Յ Ո Ց  Ա Զ Գ Ա Յ Ի Ն  Բ Ա Ն Ա Կ Ի 
ՌԱԶՄԱԿԱՆ ԽՈՐՀՈՒՐԴ        

     1990թ. – ք. ԵՐԵՎԱՆ
   —————————–

Այս գրառումը հրապարակվել է Հ.Ա.Մ., Հայտարարություններ խորագրում։ Էջանշեք մշտական հղումը։