---

ՀԱՄ ստեղծման առաջին իսկ օրվանից կառույցում կային բազմաթիվ երիտասարդներ, առանձին-առանձին փոքր խմբով գործում էին ՀԱՄ ուսանողական, երիտասարդական եւ մանկա պատանեկան կազմակերպություններ: Եվ միայն 2003թ., երբ երիտասարդների առաջին սերունդն արդեն քաղաքականապես հասունացել էր, միասնական հզոր երիտասարդական կառույց ստեղծելու խնդիր դրվեց: 2003թ ապրիլի 24-ին, դեպի Ծիծեռնակաբերդի բարձունք ոգեկոչման ու վրեժի երթի իրականացումով իր ծնունդը (կամ վերակազմակերպումը) հայտարարեց ՀԱՄ ուսանողական եւ երիտասարդական կազմակերպությունը: Ստեղծման առաջին օրվանից այս կառույցը, որն անվանվեց «Ոգու պահապաններ», ՀՀ հասարակական-քաղաքական երիտասարդական դաշտում առանձնացավ իր ինքնատիպությամբ, սկզբունքայնությամբ, համարձակությամբ, ազգային խնդիրների լուծմանը նպատակաուղղված հետեւողական քայլերով: Սա խնդիր էր, որ ՀԱՄ երիտասարդներին առաջադրել էին ՀԱՄ առաջնորդն ու Գերագույն Խորհուրդը: Մեր ավագ սերունդը կարողացավ Հայ ոգու ուժով հաղթությամբ ավարտել Արցախյան ազատագրական պատերազմը եւ ռազմի դաշտից ազգային-քաղաքական դաշտ մտավ ոգեղեն արժեքներով, կարողացավ հայ հանրությունում արթնացնել ազգային գենը-ծինը, ազգային ոգին, ձեւավորել ազգային ոգեղեն արժեհամակարգ: Երիտասարդ հայարիների համար առաջնային խնդիր պետք է լիներ այդ ձեւավորված արժեհամակարգի պահպանումը: Երիտասարդները, փաստորեն, պիտի դառնային հայ ոգու պահապաններ, ու այդ ամենը սկսվեց անվան ճիշտ ու նպատակային ընտրությամբ:
Այժմ արդեն ՀԱՄ ուսանողական եւ երիտասարդական կազմակերպությունը ունի մոտ 300 երիտասարդներ Երեւանում, Չարենցավանում, Աբովյանում, Վանաձորում, Գյումրիում, Արցախում, Ջավախքում, նաեւ` սփյուռքում: ՀԱՄ «Ոգու պահապաններ»-ը գաղափարապես ավելի կազմակերպված է, քան շատ բազմահազարանոց երիտկառույցներ: «Ոգու պահապաններ» ուսանողական եւ երիտասարդական կազմակերպությունը երկար ժամանակ ղեկավարվել է համակարգող խորհրդի կողմից, որ բաղկացած է 5 անդամներից: Այստեղ էլ կար կայացման ու որոշակի ճանապարհ անցնելու խնդիր: Եվ միայն 2005թ. ՀԱՄ առաջնորդ Արմեն Ավետիսյանի եւ երիտասարդական կազմակերպության համակարգող խորհրդի որոշմամբ երիտասարդական կազմակերպության ղեկավար ընտրվեց:
Հիմնադրման առաջին իսկ օրերից ՀԱՄ ուսանողական եւ երիտասարդական կազմակերպությունը գործուն մասնակցություն է ունեցել Հայաստանի ազգային-քաղաքական կյանքում: Կազմակերպել ու իրականացրել է բազմաթիվ միջոցառումներ նվիրված Հայաստանի ու հայության ներքին ու արտաքին խնդիրներին: Բազմաթիվ միջոցառումներ է իրականացրել` նվիրված Արցախի, Ջավախքի, Հայոց ցեղասպանության ու Հայ դատի խնդիրներին:
ՀԱՄ ուսանողական եւ երիտասարդական կազմակերպությունը եռանդուն աշխատանքներ է տանում նաեւ տարեկիցների շրջանում` ազգային ոգին բարձրացնելու եւ հայրենատիրական գաղափարներ սերմանելու համար: