ԲԱՑ ՆԱՄԱԿ. ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՄԵԾԱՐԳՈ ՆԱԽԱԳԱՀ ՏԻԱՐ ՍԵՐԺ ՍԱՐԳՍՅԱՆԻՆ

Աղբյուր` Panorama.am

 

Արցախի ազատագրության համար մղված ազգային-ազատագրական պատերազմը 14 տարի առաջ պսակվեց հայության հաղթանակով: Այս հաղթանակի շնորհիվ հայ զինվորը դուրս եկավ Հայոց Հայրենիքի հյուսիս-արեւելյան այժմյա սահմանները: Այս պատերազմը նախ եւ առաջ մղվել է Հայոց Հայրենիքի սրբազան հողի ազատագրության համար: Ջնջելով հայ ժողովրդին պարտադրված «Լեռնային Ղարաբաղի Ինքնավար մարզի» ապօրինի, արհեստական եւ անկենսունակ նախկին սահմանները 2006թ. Հանրաքվեով ընդունված ԼՂՀ Սահմանադրությունն ամրագրել է մեր ժողովրդի լավագույն զավակների արյան գնով ազատագրված Հայոց Հողի ինքնիշխան սահմանները:

Այս պատերազմը ոչ միայն պատերազմ էր հանուն հայրենի հողի ազատագրության, այլեւ արդարացի հատուցում՝ Արցախի հայության քաղաքական պահանջներին՝ ի պատասխան Ադրբեջանի կողմից սանձազերծած Ցեղասպանության: Ամրագրելով հաղթանակի արդյունքները, հայ ժողովուրդը համայն աշխարհին վճռականորեն ցույց է տվել, որ նման նկրտումներն այսուհետ երբեւէ անպատիժ չեն մնալու: Գաղափարախոսության կամ գործնական քաղաքականության ոլորտներում հայ ժողովրդի տարած հաղթանակի արդյունքների անտեսումը ոչ միայն սրբապղծում է մարտում զոհված հերոսների հավերժ վաստակը, այլեւ ոտնահարում Սումգայիթում, Բաքվում, Գանձակում (Կիրովաբադում) եւ Ադրբեջանի մյուս քաղաքներում ու գյուղերում ցեղասպանված հայության հիշատակը` խրախուսելով Հայոց Պետականության դեմ Ադրբեջանի նոր ռազմական ագրեսիան:

Այսպիսի հարցերում չկան եւ չեն կարող լինել մանրուքներ: Հայաստանի հանրային, ինչպես նաեւ մյուս հեռուստատեսությունների եթերում ԼՂՀ հռչակման պահից գոյություն չունեցող ԼՂԻՄ քարտեզի ամենօրյա ցուցադրումն ամեն օր շարունակ խորապես անարգում է ոչ միայն ՀՀ եւ ԼՂՀ, այլեւ Սփյուռքի հեռուստադիտողներին: Քաղաքական առումով այն հատկապես բացասական ազդեցություն է ունենում այժմ, երբ ազգի համար հակամարտության կարգավորման բանակցությունների վճռորոշ փուլում, ինչպես բոլորս հույս ունենք, հայոց դիվանագիտությունը պայքարում է հայ ժողովրդի շահերի պաշտպանության համար:

Պահանջում ենք բոլոր հեռուստատեսությունների ցուցադրած օդերեւութաբանական կանխատեսման քարտեզներից հանել «ԼՂԻՄ»-ի պատկերը եւ փոխարինել այն ՀՀ եւ ԼՂՀ քարտեզով: Համոզված ենք, որ ամենակարճ ժամկետներում կգործադրվեն բոլոր անհրաժեշտ միջոցները՝ ստեղծված իրավիճակը փոփոխելու ուղղությամբ:

“Արցախի Երիտասարդ Քաղաքագետների ակումբ”

Արցախի Ազատամարտիկների Միության “Հայրենաց պաշտպան” ՀԿ

ՀՅԴ Արցախի Երիտասարդական Միություն”

ԱԺԿ Երիտասառդական թեւ

“Ազատ հայրենիք” երիտասառդական թեւ

“Վաչագան Բարեպաշտ” ՀԿ

“Հայկի Սերունդ” ՀԿ

“Ալֆա-Օմեգա” ՀԿ

“Զեփյուռ” ՀԿ


Բաց նամակն ավարտվում է: Ձեր ուշադրությունը հրավիրենք ընդամենը մի «փաստի» վրա. 2008թ. հոկտեմբերի 31-ին Ադրբեջանի նախագահ Իլհամ Ալիեւը նոր նախարարներ նշանակեց: Նրանցից միայն մեկն էր նոր՝ տնտեսական զարգացման նախարար Շահին Մուստաֆաևը, որ ծնվել է, ըստ «պաշտոնական» աղբյուրի, 13.06.1965 թ-ին (սա՝ ոչինչ) «Արեւմտյան Ադրբեջանի Նոյեմբերյանի շրջանում»:

Այս գրառումը հրապարակվել է Հ.Ա.Մ., Հայտարարություններ խորագրում։ Էջանշեք մշտական հղումը։