Monthly Archives: May 2014

Հայաստանի եւ Լեռնային Ղարաբաղի միջեւ մաքսակետ չի կարող տեղադրվել. այս մասին հայտարարել է ԱԺ փոխնախագահ Էդուարդ Շարմազանովը՝ պատասխանելով ընդդիմադիր պատգամավորների այն մտահոգությանը, որ Մաքսային միությանն անդամակցելու դեպքում կարող է նման իրավիճակ ստեղծվել:

Սակայն պատգամավորները համառել են՝ հավելելով, որ հստակ պատասխան է պետք, եթե նման բան պարտադրվի Հայաստանին, արդյո՞ք իշխանությունները կհրաժարվեն Մաքսային միություն մտնելուց: Արդեն խոսել է վարչապետ Հովիկ Աբրահամյանը, ով դիմելով ՀՀՇ իշխանության օրոք ԱԳ նախարար աշխատած պատգամավոր Ալեքսանդր Արզումանյանին, նշել է, որ նա ունենալով դիվանագիտական մեծ փորձ, պետք է հասկանա, որ նման հարցերը չեն բարձրաձայնվում, աշխատանքներն ընթանում են եւ բոլոր խնդիրները կկարգավորվեն:

Արցախի խնդրով ՀՀ ԱԳ նախարար Էդվարդ Նալբանդյանն էլ ընդունել է ԵԱՀԿ ՄԽ համանախագահներ Իգոր Պոպովին, Ժակ Ֆորին եւ Ջեյմս Ուորլիքին, ինչպեսեւ ԵԱՀԿ գործող նախագահի անձնական ներկայացուցիչ Անջեյ Կասպրչիկին: Նախարարը եւ համանախագահները քննարկել են «ղարաբաղյան հիմնախնդրի խաղաղ կարգավորման գործընթացն առաջ մղելու հնարավոր ուղիները»: Անդրադառնալով այս օրերին նշված հրադադարի հաստատման 20-ամյակին՝ Էդվարդ Նալբանդյանը նշել է, որ Ադրբեջանը 20 տարի շարունակ կոպտորեն խախտում է ոչ միայն 1994թ. մայիսի 12-ին Ադրբեջանի, Ղարաբաղի ու Հայաստանի միջեւ հաստատված հրադադարի, այլ նաեւ 1995թ. փետրվարի 4-ին հրադադարի ամրապնդման վերաբերյալ նույն եռակողմ ձեւաչափով համաձայնությունները, շարունակական սադրանքներ կազմակերպում Հայաստանի հետ սահմանին եւ Ղարաբաղի հետ շփման գծում, հրաժարվում է կյանքի կոչել շփման գծից դիպուկահարների դուրս բերման, միջադեպերի քննության մեխանիզմի ստեղծման վերաբերյալ միջնորդների նախաձեռնությունները, ինչը լրջորեն խոչընդոտում է բանակցային գործընթացն առաջ մղելու Հայաստանի եւ ԵԱՀԿ ՄԽ համանախագահ երկրների ջանքերը։

Continue reading →

Ինքնակործանման քաղաքականությունը

Հայաստանի պետա-քաղաքական ոլորտն այսօր հսկում է մեկ կուսակցություն: Դա Հանրապետական կուսակցությունն է: ՀՀԿ-ն որոշակի փորձեր արեց՝ հասնելու քաղաքական ու իշխանական դաշինքի կազմավորմանը, բայց խորհրդարանական 4 ուժերից 2-ը հրաժարվեցին բանակցել՝ ՀԱԿ-ն ու «Ժառանգություն»-ը, իսկ ԲՀԿ-ն եւ ՀՅԴ-ն էլ՝ երեւի թե առավելագույն պահանջներ առաջ քաշեցին: Ու քաղաքական դաշինքի, այսպես կոչված՝ կոալիցիայի ձեւավորումը ձախողվեց:

Դա քիչ էր, ՀՀԿ-ՕԵԿ իշխանական համաձայնագրից դուրս եկավ (վարչապետի աթոռը չստանալուց նեղացած) ՕԵԿ-ը, եւ դարձավ 5-րդ խորհրդարանական ընդդիմությունը:

Առայժմ սա է իրավիճակը, ինչը կարող է հանգեցնել անկանխատեսելի հետեւանքների: Իշխող քաղաքական ուժը հրաժարվեց համագործակցել նաեւ արտախորհրդարանական կազմակերպությունների հետ եւ միայնակ մտավ մեծ ու պատասխանատու բեռի տակ:

Իհարկե, չի բացառվում, որ հնարավոր է միակուսակցական համակարգով գրանցել հաջողություններ, ինչպես ասենք՝ Չինաստանում, որը տնտեսական աճի տեմպերով անգամ ԱՄՆ-ից է առաջ անցել: Որոշ երկրներում նաեւ երկկուսակցական համակարգով են բավարարվում ու մեկմեկու փոխարինելով առաջ տանում իրենց պետականությունը: Այդպես է նաեւ ԱՄՆ-ում եւ Մեծ Բրիտանիայում:

Բայց Հայաստանում վաղ է խոսել նման համակարգերի հաջողության հասնելու հնարավորության մասին: Ինչպես վերլուծաբաններն են նշում, Հայաստանում կազմավորվել է մեկ կուսակցության իշխանություն, ինչը նոր էջ է բացել երկրի տարեգրության մեջ: Արդյունքները դեռ կերեւան, գնահատականներն էլ հետո կտրվեն:

Իհարկե, ՀՀԿ-ն մինչ այս էլ էր իշխանություն: Դեռ Անդրանիկ Մարգարյանի վարչապետ նշանակվելուց եւ հետո էլ՝ իշխանությունը Հայաստանում ձեւավորվում է ՀՀԿ-ի շուրջ: Վերլուծաբանները նաեւ նշել են, որ «այդ իշխանությունը Հայաստանում նույնպես ունիտար է եղել, անկախ կոալիցիոն դեկորացիաներից»: Այդպիսի մի խոսք էլ ասեց վերջին կոալիցիան վերջինը լքած ՕԵԿ-ը, չնայած մինչեւ դուրս գալը՝ սիրով ու նվիրումով էին աշխատում բոլոր ՕԵԿ-ականները:

Որոշ մեկնաբանների կարծիքով էլ, գուցե եկավ այն պահը, ՀՀԿ-ի համար վաղուց սպասված բաղձալի պահը, երբ իշխանությունն իրենով անելով վերջակետ դրվեց  ՀՀԿ առաջնորդի ու ՀՀ նախագահի ասած՝ թիմակիցների տարակուսանքներին ու մտահոգություններին:

Բայց հիմա էլ ՀՀԿ-ի ներսում ինչ-որ բան այնպես չէ: Լինում են նշանակումներ, որ չեն բավարարում հին ու նոր կամ ավելի նոր հանրապետականներին: Պարզվում է՝ միեւնույն չէ, թե ով ինչ պաշտոն կստանա, հանրապետական լինելը դեռ բավարար պայման չէ՝ կուսակցական ընկերոջ համար ուրախանալու առումով: Եվ հենց սա է պատճառը, որ ներկուսակցական կլանային համակարգով գործող կուսակցությունները չեն կարող հաջողել պետական ու ազգային քաղաքականության մեջ: Անգամ լուրեր են սպրդում, որ այսինչն ու այնիչը իրար «կծում, սեւացնում, քննադատում եւ… ուտում են իրար», ինչը հաճախ նաեւ բացահայտ երանգներ է ստանում:

Պատճառը խորքային է, Հայաստանի ընտանեկան կլանները մտել են ամենուր եւ պղտորել ամեն ինչ: Ձուկը գլխից է «կլանավորվել»… Կարծիք կա, որ նույնիսկ արեւելքին հատուկ կլաններից են տարբերվում մեր «հայրենի» ընտանեկան կլանները, որոնք հիմնականում վաստակել են «բիրդան աղաներ» կոչվելու եզակի իրավունքը…

Continue reading →

Ավանդաբանություն

Հայ էթնոսի ծագումնաբանությունը ամբողջովին ուսումնասիրված եւ բացահայտված չէ, սակայն այն բավականին ամբողջական է, որը թույլ է տալիս մեզ արդեն վստահորեն կատարել պատմական էքսկուրս: Այսօր արդեն Հայ էթնոսի ծագումը եւ տեղաբնակ լինելու հանգամանքը այլեւս չի վիճարկվում:

Ըստ ավանդույթի, Համաշխարհային ջրհեղեղի ժամանակ (որը, ըստ ժամանակակից ուսումնասիրություների, տեղի է ունեցել 19000 տարի առաջ), Հին Կտակարանի Նոյը իր փրկությունը գտավ ԱՐԱՐԱՏՅԱՆ աշխարհում, իսկ Շումերական մշակույթի ԶԻՀՈւՍՈՒԴՐԱՆ (Ziusudra)՝ Մաշու Լեռներում, նույն ինքը՝ Արարատյան Լեռներ:

Արեւելյան Վարդապետության (իմա քրիստոնեություն) շրջանի հայոց պատմագիր Մովսես Խորենացու շնորհիվ մենք գիտենք, որ հայերը ծագում են Հայկ նահապետից: Ըստ Մովսես Խորենացու, Հայկը սերում է Նոյի ավագ որդի Հաբեթից, Հայկը Նոյի 5-րդ սերունդն է՝ Հաբեթ (Japheth), Գամեր (Gomer), Թիրաս (Tiras), Թորգոմ (Togarmah) Հայկ (Haik):

Մ. Խորենացին «Հայոց Պատմություն»-ում գրում է, որ Հայկը ապստամբեց Բաբելոնի տիրակալ Բելի (Belus/Belos) դեմ, Վանա լիճի մոտ Հայկը պատերազմեց Բելի դեմ, ջարդեց նրա զորքը, սպանեց նրան ու դրեց հայոց պետության հիմքը, ըստ այդմ՝ մեր երկրը կոչվեց ՀԱՅՔ: Համաձայն ավանդույթի՝ Արմենիա անվանումը Հայոց աշխարհին տրվել է ի պատիվ Հայկի որդի Արամի: Պետք է այստեղ շեշտենք, որ Հայկական Լեռնաշխարհի բազում անուններ տրված են հայոց պետության հիմնադիր Հայկի սերունդների անուններով:

Աքմենյան (պարսկական) շրջանի պալատական պատմիչ Մար Աբաս Կատինան Հայերի մասին ասում է. «Աստվածներից առաջիններն ահեղ էին եւ երեւելի, եւ աշխարհի մեծամեծ բարիքների պատճառ, աշխարհի ու բազմամարդության սկիզբ: Սրանցից առաջ եկավ հսկաների սերունդը… հսկաներից էլ սերում է Հայկը»:

Continue reading →

Մեր ավանդապատումները շարքից.- Գեղարքունիքի մարզ

Սկիզբը՝ թիվ 39-42-ում (2013թ.) եւ թիվ 1-16-ում

Գանձավանք կամ Անգիր վանք – գտնվում է Գեղարքունիքի մարզի Լճաշեն գյուղի մոտ: Այս ամայի վանքը տեղացիների ասելով կոչվում է նաեւ Անգիր վանք, որովհետեւ նրա մեջ ոչ մի գրի նշան չկա:

Սեւանա վանք – գտնվում է Սեւանա կղզում: «Ի կառուցել մեծին Գրիգորի զայս եկեղեցի «կոչեաց եւ անուն տեղւոյս Այս է վան, որ հոլովելով աղաւաղանօք ի լեզուս, եհաս առ յետագայսն եւ առ մեզ անուամբս Սեւան»:

Սուրբ Հովհաննես – գտնվում է Սեւանի Դդմաշեն գյուղի հյուսիսում: Եղել է Հովհաննես անունով մի մարդ: Երիտասարդ ժամանակ նա ավազակությամբ է զբաղվել: Երբ ծերացել է, եկել է այստեղ, աղբյուրների մոտ քոլիկ՝ տնակ է շինել, ապրել մեջը, սնվել հովիվների եւ գյուղացիների տված կերակուրի փշրաքներով: Քավելու համար իր գործած մեղքերը՝ Հովհաննեսը դարձել է ճգնավոր: Մի օր էլ նրան գտել են մեռած: Հովհաննես ճգնավորի տնակ-մատուռը հետո դարձել է սրբավայր՝ Սարի Սուրբ Հովհաննես անունով:

Քարեջանի քռա – գտնվում է Սեւանի շրջանի Դդմաշեն գյուղի դաշտում: Քարեջան անունով մի քարհատ է եղել, աղքատ, բայց քարի պես ամուր ու աշխատավոր մարդ: Դրա համար էլ նրան տվել են Քարեջան անունը: Երկար ժամանակ զբաղվելով քարհատությամբ՝ Քարեջանը քար է մատակարարել գյուղի քարտաշներին ու տուն կառուցողներին: Այն տեղը, որտեղից ժամանակին քար է կտրել Քարեջանը, կոչվում է Քարեջանի քռա, բնական քարակույտ, կապան:

Այվազի քռա – գտնվում է Սեւանի շրջանի Դդմաշեն գյուղի հյուսիսային կողմում: Այվազ անունով մի մարդ մանգաղը վերցրած՝ գալիս է այստեղից խոտ քաղելու: Հենց մոտենում է քռային, քարերի տակ բուրդ է տեսնում: Կարծում է, թե հովիվները խուզել են ոչխարը եւ աղայից թաքցրել, որ հենց մութն ընկնի՝ գան-տանեն: Բուրդը գրկում է թե չէ, տեսնում է՝ ի՛նչ բուրդ, արջ է: Այվազին հաջողվում է ետեւի կողմից բռնել եւ սեղմել արջի ամորձիները: Արջը թուլանում է եւ ուժեղ գոռում: Մոտիկ տեղից օգնության են հասնում: Սակայն մինչեւ մարդկանց գալը, Այվազը սպանում է արջին եւ շալակով բերում գյուղ: Քարքարոտ այդ տեղը դրանից հետո կոչվում է Այվազի քռա:

Continue reading →

Սա մի ոլորտ է, որտեղ Հայաստանը կարող է մրցել ամենաբարձրորակ հատվածում:

Սա մի ոլորտ է, որ ենթարկվում է արտաքին գրեթե բոլոր ազդակներին, բայց կարող է հաջողել:

Խոսքը ադամանդագործության մասին է: Պետությունը նախանշել է այս ոլորտի զարգացման տեսլականը, գործողությունների հերթականությունը եւ հեռանկարները: Ի՞նչ վիճակ է հիմա մեզ մոտ, համաշխարհային շուկան ի՞նչ միտումներ ունի:

Նախ՝ ասենք, որ Հայաստանը նախկին ԽՍՀՄ-ում բնական ադամանդի մշակման կենտրոններից էր: Եվ այս ոլորտում անկախությունից հետո էլ արագ աճ գրանցվեց օտարերկրյա ներդրումների շնորհիվ: 1973թ. «Սապֆիր» արտադրական միավորման կազմում բացվեց առաջին վերամշակման արտադրամասը, որը հետագայում դառնում է ԽՍՀՄ 7 խոշորագույն գործարաններից մեկը՝ 1986թ. թողարկելով 70 մլն դոլարի արտադրանք: 1976թ. հիմնվեց «Շողակն» գործարանը՝ տարեկան 140 հազ կարատ վերամշակման հզորությամբ: Զարգացման գագաթնակետին ոլորտի արդյունաբերական անձնակազմի թիվը 3 հազար էր: Ընդհանրապես հայ ադամանդագործ վարպետները մեծ համբավ ունեն: Որոշ հայկական ընկերություններում իրականցվել է անգամ ադամանդի ամենաբարձր որակի՝ «գերազանց» կարգի մշակում: Հայաստանում ոլորտի վերականգնման խթան եղավ 1992թ. ադամանդների ոլորտում հայտնի գործարար Արսլանյանների ներդրումը: Ի դեպ, նրանց միջնորդությամբ մեր երկիր եկան նաեւ այս ոլորտի այլ հեղինակավոր ընկերություններ (Tashe, Rosy Blue): Բնագավառում կարեւորագույն իրադարձություն եղավ, երբ 2000թ. ոլորտի առաջատար «Լեւ Լեւաեւ դայմոնդս» (Lev Levaev Diamonds) ընկերությունը մուտք գործեց Հայաստան: Հայկական ադամանդագործության զարգացմանն էապես նպաստեց նաեւ այն, որ հումքի առաջնային աղբյուրը հասանելի էր:

Մինչեւ 2003թ. հայ-ռուսական միջկառավարական պայմանագրի շրջանակում հայկական ընկերություններին տրված քվոտան, այնուհետեւ 2007թ. հայկական ընտրված ընկերություններին հումքի հատուկ պայմաններով գնման պայմանավորվածություններն ապահովել են Հայաստանում վերմշակված հումքի զգալի մասը: Եթե մի քիչ մանրամասնենք, ապա 1997թ. ՀՀ կառավարության եւ ռուսական «Ալռոսա»-ի միջեւ կնքվում է նպաստավոր պայմաններով հումք ներմուծելու պայմանագիր (տարեկան 300-500 հազ. կարատ):  2002թ. «Ալռոսա»-ի հետ պայմանագիրը դադարեցվում է: Հենց այս տարին է ՀՀ ադամանդագործության զարգացման գագաթնակետը՝ 370 հազ. մշակված կարատով:

Continue reading →

Հայաստանից արտահանվում է… Հայաստան

Զարմանհրաշ դեպքեր են լինում նաեւ մեր տնտեսական ոլորտում:

Վերջերս հայտնի դարձավ, որ ՀՀ պետական եկամուտների կոմիտեի արտաքին առեւտրի վերաբերյալ վիճակագրությունը թվերից բացի պարունակում է նաեւ զավեշտներ, որոնք հատուկ պարզաբանման կարիք ունեն:

ՊԵԿ-ի հրապարակած վիճակագրության համաձայն, ՀՀ-ից իրականացված արտահանումների եւ դեպի ՀՀ իրականացված ներկրումների երկրների ցանկում նշված է՝ Հայաստան: Այսինքն՝ Հայաստանից Հայաստան ապրանք է ներկրվում եւ արտահանում:

Ավելի ստույգ, ըստ այս վիճակագրության, Հայաստանի Հանրապետությունից ապրանքներ են արտահանվում Հայաստան եւ հակառակը՝ Հայաստանից ապրանքներ են ներկրվում Հայաստանի Հանրապետություն:

Այսպես, 2013թ. տվյալներով՝ դեպի Հայաստան արտահանումները կազմել են 6 մլն. 323 հազ. 700 դոլար, իսկ այս տարվա առաջին եռամսյակում՝ 1 մլն. 170 հազ. 600 դոլար:

Թվում է անհեթեթ ու խառնափնթոր վիճակ է, բայց պարզվում է՝ սա էլ ունի իր բացատրությունը:

ՀՀ ֆինանսների նախարարության տեղեկատվության եւ հասարակայնության հետ կապերի բաժնից Panorama.am-ին տվել են հետեւյալ պարզաբանումը՝ «Որպես արտահանման երկիր «Հայաստան» նշված լինելու դեպքում, ապրանքներն արտահանվել են ՀՀ մաքսային սահմանից դուրս՝ անմաքս առեւտրի խանութներ»:

Այլ կերպ ասած, ապրանքը ուղարկվել է Հայաստանի տարածքում գործող այսպես կոչված «duty free»-ներ վաճառքի:

Արդյունքում, այն ձեւակերպվում է, որպես արտահանում, քանի որ իրավական տեսանկյունից «duty free.-ին մատակարարված ապրանքը հատել է Հայաստանի մաքսային սահմանը, բայց մյուս կողմից, այն շարունակում է գտնվել Հայաստանում:

Արդյունքում, լինում է այսպես՝ Հայաստանից ապրանքն արտահանվեց Հայաստան:

Նույն մեխանիզմը գործում է նաեւ Հայաստանից Հայաստան ապրանք ներկրելու ժամանակ:

Պարզապես արդեն հակառակ կառուցվածքով. Հայաստանի տարածքում գործող «duty free»-ում գտնվող ապրանքը եւ Հայաստանում է եւ Հայաստանում չէ ու երբ այնտեղից ապրանք են գնում ու ներս բերում, ստացվում է Հայաստանից Հայաստան ներմուծում:

Իրոք որ զարմանալի երկրում են ապրում… Հայաստանից գազ է արտահանվում «անհայտ երկիր»

Պարզվում է՝ Հայաստանը ոչ միայն գազ ներկրող, այլեւ արտահանող երկիր է: Որպես կանոն Հայաստանից գազն արտահանվում է հարեւան Վրաստան: Սակայն, ըստ ՀՀ պետական եկամուտների կոմիտեի հրապարակած վիճակագրական տվյալների, գազը սկսել է արտահանվել նաեւ մի «անհայտ երկիր»:

Continue reading →

Հայկական խոհանոց – (Ներկայացնում է «Արվասար» ռեստորանի (Ամիրյան 27) տնօրեն Ռուզաննա Նահապետյանը, հեռ` 531-027, 531-028) – (ռեստորանն ընդունում է կոլեկտիվ հայտեր)

– Հորթի մսով, մանդակով ու պանրով համեղհամ

Բաղադրությունը – Ծեծած հորթի միս – 400 գ, թրջած բլղուր – 100 գ, ձու – 2 հատ, սպիտակ պղպեղ, աղ, սոխ – 1 գլուխ, յուղ – 100 գ, խաշած մանդակ – 300 գ, թթվասեր – 200 գ, թել պանիր – 200 գ:

Պատրաստման եղանակը – Հորթի միսը բացել յուղած ու պաքսիմատով պատած վառարանի տակդիրի մեջ: 1 ձուն, բլղուրը, սպիտակ պղպեղն ու աղը խառնել, լցնել մսի վրա: Սրա վրա էլ լցնել յուղառատ սոխառածը, հավելել կտրտած մանդակը:

Մյուս ձուն խառնել աղով համեմված թթվասերին ու սա էլ լցնել մանդակի վրա: Սրա վրա էլ դնել թել պանիրը:

Ջեռոցում եփել 30 րոպե 2000-ի տակ:

Մնում է վայելել սննդարար այս համեղհամը: Անու՛շ լինի:

* * *

Աշխարհի մարզական հեւքից –

Հայաստանի ազգային հավաքականը նախապատրաստվում է

Հայաստանի հավաքականի շվեյցարացի գլխավոր մարզիչ Բեռնար Շալանդը առաջիկա ընկերական խաղերին նախապատրաստվող Հայաստանի ազգային հավաքականի մարզական հավաքին է հրավիրել 30 ֆուտբոլիստների, որոնցից Հայաստանի ազգային առաջնությունում հանդես եկող հետեւյալ 11 ֆուտբոլիստներին՝ Գեւորգ Կասպարով («Միկա»), Արսեն Բեգլարյան («Գանձասար»), Հովհաննես Համբարձումյան («Բանանց»), Գագիկ Դաղբաշյան («Բանանց»), Հրայր Մկոյան («Շիրակ»), Վարազդատ Հարոյան («Փյունիկ»), Տարոն Ոսկանյան («Փյունիկ»), Արթուր Յուսպաշյան («Փյունիկ»), Ալեքս Հենրիկե Դա Սիլվա («Միկա»), Ռումյան Հովսեփյան («Բանանց»): Երեւանի «Փյունիկ»-ի ֆուտբոլիստ Կամո Հովհաննիսյանը չի ընդգրվել մարզական հավաքին մասնակցող ֆուտբոլիստների թվում մկանային վնասվածքի պատճառով. հայտնել է ՀՖՖ կայքը:

Հիշեցնենք, որ ավելի վաղ ազգային հավաքականը հրավեր էր ուղարկել արտերկրում հանդես եկող հետեւյալ 19 խաղացողներին. Հենրիխ Մխիթարյան («Բորուսիա», Դորտմունդ, Գերմանիա), Մաուրո Գեւգեոզյան («Ալիանսա», Պերու), Արտակ Եդիգարյան («Ժալգիրիս», Լիտվա), Լեւոն Հայրապետյան («Պրիբրամ», Չեխիա), Ալեքսանդր Թումասյան («Յարո», Ֆինլանդիա), Նորայր Ասլանյան («Վիլեմ II», Հոլանդիա), Ռոբերտ Արզումանյան («Ակտոբե», Ղազախստան), Արթուր Եդիգարյան («Կայրաթ», Ղազախստան), Արտյոմ Խաչատուրով («Տիրասպոլ», Մոլդովա), Ռոման Բերեզովսկի («Դինամո», Մոսկվա, Ռուսաստան),Կառլեն Մկրտչյան («Անժի», Ռուսաստան), Յուրա Մովսիսյան («Սպարտակ», Մոսկվա, Ռուսաստան), Արաս Օզբիլիս («Սպարտակ», Մոսկվա, Ռուսաստան), Էդգար Մանուչարյան («Ուրալ», Ռուսաստան), Արտյոմ Սիմոնյան («Զենիթ», Ռուսաստան), Արթուր Սարկիսով («Վոլգա», Ռուսաստան), Արմեն Համբարձումյան (ԲԿՄԱ, Մոսկվա, Ռուսաստան), Արթուր Միրանյան(«Շախտյոր», Դոնեցկ, Ուկրաինա), Գեւորգ Ղազարյան («Մետալուրգ», Դոնեցկ, Ուկրաինա):

Continue reading →

Հեղինակ՝ «Լուսանցք» շաբաթաթերթ (Հայաստան, գլխավոր խմբագիր՝ Արմենուհի Մելքոնյան – http://www.hayary.org/wph/?p=2223

http://www.hayary.org/wph/?p=4111 – Համաշխարհային ավերիչ մամլիչին կարող է դիմակայել միայն Համաարիական արարիչ բռունցքը…

1. Համաշխարհային ավերիչ մամլիչին կարող է դիմակայել միայն Համաարիական արարիչ բռունցքը – Մասոնական եւ այլ գաղտնի միջազգային կառույցները մնում են վտանգավոր…

2. Վանատուրը հայոց օջախների եւ հյուրընկալության Աստվածն է… Ընտանիքի միջազգային օրը… Հայաստանում չե՛ն խրախուսվի համասեռական ու նմանատիպ ընտանիքները… Պետք է արգելվեն հայ ընտանիքի արժեհամակարգին ոչ հարիր դասընթացները…

3. Շառլ Ազնավուրի 90-ամյակի հոբելյանական համերգ Երեւանում… Կոպենհագենի «Եվրատեսիլ»-ը անբարոյականության քարոզչամիջոց – Հայաստանը պետք է հրաժարվի այս աղբանոցում հետայսու հայտնվելուց…

4. Գյադե՛ք, դե՛սն անցեք, գյադե՛ք, դե՛նն անցեք – Հուլիսի 1-ից բոլոր գործարարների համար հավասար պայմաննե՞ր են լինելու եւ իրենց մտերիմների՞ց են սկսելու…

5. Կուտակային կենսաթոշակի շուրջ. Կամավոր պարտադրվում ես – Երբ պետությունը շարունակելու է վճարել իր մասնաբաժինը՝ «դրական փորձի» վտանգը մնում է… Նորմոդելային վազք – քաղաքացին վազքի մեջ է՝ կլինի 1, թե 10 պատուհան…

6. Արցախի եւ Ղրիմի հարցերը՝ միջազգային զուգահեռներում – Կալիֆորնիայի խորհրդարանի կողմից ԼՂՀ անկախությունը ճանաչելու մասին բանաձեւը…

7. Ցավոտ կետեր – «Made in Armenia»-ն կարո՞ղ է նախանձ շարժել – «Հայկական որակ»-ը իրապես լուրջ խոսք կարող է ասել…«Ընդդեմ Մոսվայի» շարքը համալրվում է… Գործի՛ր՝ հայեցակարգ գրելու փոխարեն…

8. Մեր ավանդապատումները շարքից – Գեղարքունիքի մարզ… Հայկական խոհանոց – Ձկնապուր… Տեղադրե՛ք ձեր գովազդը – www.hayary.org-ում… «Լուսանցք»-ի բաժանորդագրության համար դիմել…

9. Աշխարհի մարզական հեւքից – Թուրք մարզիկը հրաժարվեց մենամարտել Դավիթ Խաչատրյանի հետ… Հաղթեցին հայ վետերանները… ՀԱՄ պաշտոնական կայքը տրամադրում է գովազդային վահանակի տեղ… Կարդացե՛ք եւ բաժանորդագրվե՛ք «Լուսանցք»…

http://www.hayary.org/wph/?p=4111  (կարդալ ամբողջը)

«Աշխարհի վերաձեւումը պետք է ընթանա միայն Բնակարգով»,- հատվածներ Հայ Արիական Միաբանության եւ Հայ Ազգայնականների Համախմբման ղեկավար կազմերի խորհրդակցական նիստում ներկայացված ՀԱՄ առաջնորդ Արմեն Ավետիսյանի զեկույցից (ՀԱՄ լրատվական կենտրոն):

– ՀԱՄ եւ ՀԱՀ կառույցների համատեղ համատեղ նիստի հայտարարությունը. «Միջազգային առկա իրավիճակի եւ Հայաստանի դերակատարման ու քայլերի մասին» կներկայացվի մոտ օրերս, որում մասնավորապես կարծարծվեն հայ արիականների ու ազգայնականներ դիրքորոշումները ռուս–ուկրաինական եւ ռուս–արեւմտյան հակամարտությունների, հայ-ռուսական եւ հայ–արեւմտյան հետագա հարաբերությունների, Արցախի խնդրի եւ հայ–թուրքադրբեջանական հակասությունների, Հայկական բարձրավանդակում Միացյալ Հայաստանի  վերաստեղծման եւ Մերձավորարեւելյան ու Կովկասյան թեմաներին առնչվող այլ հարցերի մասին:

Մենք, որպես հայ ազգայնականներ եւ արիադավան-հեթանոսական հավատի հետեւորդներ, կոչ ենք անում մեր համազգային ու համամարդկային պայքարին միանալու… Այսօր եւ առմիշտ արդիական է Համաարիական համաշխարհային դաշինքի ձեւավորումը, որը կծավալվիՄարդկության Կենաց (Կյանքի) Գոտու տարածքով: Այս տարածքը ներկայիս աշխարհա-քաղաքական ձեւակերպմամբ եվրասիական ճանապարհն է՝ ասիական Հիմալայներից մինչեւ եվրոպական Ալպեր, որի կապող օղակն ու կենտրոնը՝ համաարիական խաչմերուկը Հայկական Լեռնաշխարհն է… Այլ փրկություն չկա: Չարը այսօր գործում է ազգակուլ եւ մարդակուլ հնարովի օրենքներով եւ արարչածին եւ աստվածազարմ ՄԱՐԴ տեսակի գոյատեւման ու հարատեւման համար պետք է վերագործարկել Մոլորակի Կենաց Գոտին…

Միջազգային գաղտնի ուժերին՝ համազգային դիմակայություն… – http://www.hayary.org/wph/?p=4111  (կարդալ ամբողջը)

«Լուսանցք»թիվ 16 (321), 2014թ.

Կարդացեք «Լուսանցք»–ի PDF տարբերակները www.hayary.org-ի «Մամուլ» բաժնում

Վանատուր Աստծո տոնը՝ Արեւելյան ու Արեւմտյան Հայաստանների ժամանակավոր սահմանագլխին

Գարնանային տոնական հաջորդականությունն իր բնական սահմանագլխին է հասնում հենց Վանատուրյան տոներին:

Ինչպես տեղեկացրեցին ՀԱՄ լրատվական կենտրոնից, երեկ՝մայիսի 15-ին՝ Շիրակի մարզում հայ արիները նշել են Վանատուր Աստծո տոնը: Տոնախմբությունը կայացել է Հայաստանի Արեւմտյան եւ Արեւելյան (արհեստական ու ժամանակավոր բաժանված) սահմանագծային հատվածներից մեկում: Ծիսական արարողությունը կազմակերպել են ՀԱՄ Հոգեւոր հանձնախմբի քրմերն ու քրմի թեկնածուները, ովքեր փառաբանել են Հայոց հյուրընկալության եւ օջախի Աստծուն՝ հայ տներն ու ընտանիքները միշտ հյուրընկալ պահելու, Հայաստան աշխարհը վերամիավորելու եւ լի ու առատ դարձնելու համար: Հայրենատիրական վերամիավորման ծեսը կատարել են քրմեր Արմոգը, Արեգը եւ Արամը:

Տարիներ առաջ հայ արիների վերականգնած ու վերաիմաստավորած տոներից մեկն է Վանատուրի տոնը: Եվ արդեն պարբերաբար տոնվում են Հայ Աստվածների բոլոր տոները՝ համապատասխան ծիսակարգով ու տոնականությամբ: Սա հայ արիներին հաղորդում է հազարամյակների հայոց շունչն ու հավատի ոգին, զորացնում հային ու հայի Աստվածներին...

Հայ արիները փառաբանել են նաեւ Հայ Աստվածներին ու Տիեզերքի Արարչին՝ Հայք-Հայաստանը բաժանող արհեստական սահմանները վերացնելու եւ Արարչատուր Հայկական Լեռնաշխարհը վերստին հայության Միացյալ Տունը դարձնելու ձոներգությամբ: Հայկական Լեռնաշխարհը Հայոց Մեծ Օջախն է, Իսկ Հայոց Տան հովանավորը Վանատուր Աստվածն է, ում՝ հայոց դիցակարգում կոչում են նաեւ Օջախի Աստված: Հայ Արիական Միաբանությունը, մինչ այս, մայիսյան հաղթականտոներին մեծարել է նաեւ բոլոր ժամանակների հայ հերոսներին, փառաբանել նրանց, ովքեր հաղթանակներ պարգեւելով՝ ապահովեցին Հայաստանի, հայության եւ հայ օջախների անդորրն ու զարգացումը: Տոնական արարողությունը շարունակվել է ավանդական ուտեստների ու ըմպելիքների համտեսմամբ, երգ ու պարով, ծիսական փառաբանումներով եւ գինեձոներով:

Continue reading →

Հայաստանի նախագահ Սերժ Սարգսյանը եւ պետական այցով մեր երկիր ժամանած Ֆրանսիայի նախագահ Ֆրանսուա Օլանդը Կարեն Դեմիրճյանի անվան մարզահամերգային համալիրում ներկա են գտնվել երկու երկրների նախագահների բարձր հովանու ներքո անցկացվող աշխարհահռչակ ֆրանսահայ շանսոնյե Շառլ Ազնավուրի 90-ամյակի հոբելյանական համերգին:

Իսկ մինչ այդ, Հայաստանի ու Ֆրանսիայի նախագահները ծաղկեպսակ են դրել Հայոց մեծ եղեռնի զոհերի հուշարձանին:

* * *

«Եվրատեսիլ»-ը անբարոյականության քարոզչամիջոց – Հայաստանը պետք է հրաժարվի այս աղբանոցում հետայսու հայտնվելուց

«Եվրատեսիլ-2014» երգի միջազգային մրցույթում Հայաստանի ներկայացուցիչ Արամ MP3-ը զբաղեցրեց 4-րդ հորիզոնականը՝ հավաքելով 174 միավոր: Հաղթող ճանաչվեց Ավստրիայի ներկայացուցիչ Կոնչիտա Վուրստը՝ հոմոսեքսուալ եւ տրանսվեստիտ մորուքավոր օրիորդը: Այսպես էին ներկայացնում նրան «առաջադեմ» Եվրոպայում…

2-րդ տեղում է Նիդեռլանդների ներկայացուցիչը, 3-րդում՝ Շվեդիայի: Հիշեցնենք, որ մրցույթին մասնակցում էր 37 երկրի ներկայացուցիչ, եզրափակիչ անցել էր 26 երկրի ներկայացուցիչ՝ Հայաստան, Մոնտենեգրո, Ուկրաինա, Բելառուս, Ադրբեջան, Իսլանդիա, Նորվեգիա, Ռումինիա, Լեհաստան, Հունաստան, Ավստրիա, Գերմանիա, Շվեդիա, Ֆրանսիա, Ռուսաստան, Իտալիա, Սլովենիա, Ֆինլանդիա, Իսպանիա, Շվեյցարիա, Հունգարիա, Մալթա, Դանիա, Նիդեռլանդներ, Սան-Մարինո, Մեծ Բրիտանիա:

Հետաքրքիր է, որ շուրջ 50 երկրներից մասնակցել են միայն 37-ը, այս տարի էլ որոշ երկրներ նույնպես հայտարարեցին, թե իմաստ չունի ավելորդ միջոցներ ծախսել մասնակցության համար, քանի որ բոլորն էլ հասկացել են, որ «Եվրատեսիլ» երգի փառատոնը առավելապես քաղաքական ու քարոզչական թատերաբեմ է դարձել:

Հայաստանին առավելագույն՝ 12 միավոր տվեցին Ֆրանսիան, Ավստրիան, Վրաստանը, 10-ական՝ Մոնտենեգրոն, Լատվիան, Բելառուսը, Ուկրաինան, 8-ական՝ Ռուսաստանը, Մակեդոնիան, 7-ական՝ Հունաստանը, Ռումինիան, Նիդեռլանդները, Հունգարիան, 6-ական՝ Սան Մարինոն, Մալթան, Գերմանիան, Իսրայելը, 5-ական՝ Շվեդիան, Էստոնիան, 4-ական՝ Պորտուգալիան, Ֆինլանդիան, Իսպանիան, 3 միավոր՝ Մոլդովան, 2 միավոր՝ Դանիան, 1 միավոր՝ Լեհաստանը: Իսկ Հայաստանը 12 միավոր տվեց Մոնետենգրոյին, 10՝ Ռուսաստանին, 8՝ Բելառուսին:

Continue reading →

Չգիտեմ, գուցե ա՞յս ոճով են մեր կառավարությունները մշտապես վերաբերում մեր գործարարներին: Հապա ի՞նչ է նշանակում «փոխվում են խաղի կանոնները» հասկացությունը: Նկատե՞լ եք՝ ամեն հաջորդ վարչապետը փոխում է նախորդի քաղաքականությունը, եւ իրականում ոչինչ չի փոխվում:

«Խաղի կանոնները» հիմա էլ են փոխվում: Այսպես է ասել վարչապետ Հովիկ Աբրահամյանը գործարարների հետ փակ հանդիպման ժամանակ:

Կառավարության երեկվա նիստից հետո լրագրողների հետ զրույցում անդրադառնալով վարչապետ Հովիկ Աբրահամյանի՝ նիստում ստվերի դեմ պայքարի մասին հնչեցրած հայտարարությանը՝ էկոնոմիկայի նախարար Կարեն Ճշմարիտյանը շեշտեց, թե ստվերի դեմ պայքարի տեսանելի արդյունքները կլինեն հուլիսի 1-ից հետո. «Սա վերջնաժամկետ չէ, պարզապես սահմանագիծ է գծված, որից այն կողմ պետությունը պետք է իր վերաբերմունքը ցույց տա»:

Արդյո՞ք սա ենթադրում է, որ նախորդ կառավարությունը ստվերի դեմ չէր պայքարում: Կարեն Ճշմարիտյանի կարծիքով, ոչ, պարզապես մինչ այս կառավարության քայլերը ստվերի դեմ պայքարում որոշակի արդյունքներ տվել են, բայց դրանք պետք է ավելի զարգացնել:

Իսկ ի՞նչ է նշանակում այն, որ պետությունը ցույց կտա իր վերաբերմունքը: Գործարարների կաշի՞ն է քերթելու: Կարեն Ճշմարիտյանը «զարմանում» է մեր կանխատեսումից, բայց պետության քայլերի մասին չի խոսում: Ու թե ինչքա՞ն կկրճատվի ստվերի ծավալը հարցին ի պատասխան նախարարը համառոտեց. ՙԿանխատեսումների մասով թվերի լեզվով խոսելը ոչ պրոֆեսիոնալ մոտեցում է»:

Հետաքրքիր է, ի՞նչ կլինի, եթե գործարարներից մեկը համարձակվի չընդունել խաղի կանոնները: Կարեն Ճշմարիտյանը նորից զարմանում է՝ երեւի մտքում կասկածելով, որ որեւէ մեկը կունենա այդ քաջությունը: Հետո մտքինը թողած՝ բարձրաձայնում է. «Կարծում եմ, ինքներդ ավելի լավ գիտեք»:

Դե՛, մեր իմացածն էլ կաշի քերթելն էր:

Continue reading →

Ազգային Ժողովը 67 կողմ, 18 դեմ եւ 29 ձեռնպահ ձայների հարաբերակցությամբ ընդունել է «Կուտակային կենսաթոշակի մասին» օրենքում փոփոխություն կատարելու մասին օրինագիծը: Քննարկումները բուռն էին եւ ԱԺ նախագահ Գալուստ Սահակյանը կրքերը ավելի չբորբոքելու համար վերջին պահին հարցը դրեց քվեարկության:

Սակայն որոշումը միանշանակ չի ընկալվել, «առաջին հայացքից մենք հետաձգում ենք խնդիրըը, բայց ստեղծում ենք նորը: 6 ամիս հետո սա ձնագնդիի նման հավաքվելու է, այս նեղ մաջալին անհասկանալի է, թե ինչու պետք է բյուջեից 21 միլիարդ հանվի, ո՞ւր է հասնելու տնտեսությունը»,- հայտարարել է ՀԱԿ խմբակցության անդամ Հրանտ Բագրատյանը՝ ով ձեռնպահ է քվեարկել: Ձեռնպահ քվեարկելու մասին հայտարարեցին նաեւ ԲՀԿ-ն ու ՀՅԴ-ն, չնայած վերջինը կողմ քվեարկելու տրամադրություն ուներ նախապես: Իսկ ահա «Ժառանգություն»-ն ու ՀԱԿ-ը դեմ են քվեարկել:

ԲՀԿ խմբակցության անդամ Միքայել Մելքումյանը՝ «Կուտակային կենսաթոշակի մասին» օրենքում փոփոխություն կատարելու կառավարության ներկայացրած օրինագծի երկրորդ ընթերցմամբ քննարկման ժամանակ ԱԺ-ում դիմելով աշխատանքի եւ սոցիալական հարցերի նախարարին՝ հարց հնչեցրեց. ՙԹախանձագին ձեզ կոչ եմ անում, հորդորում եմ, չգիտեմ էլ ոնց ասեմ, խնդրեմ, որ պատասխանեք՝ էս ռեֆորմը առաջ եք տանո՞ւմ, կանգա՞ռ եք անում, թե հետ եք գնում: Սա շատ կարեւոր է կոնցեպտուալ իմաստով, քանի որ, Աստված մի արասցե, դժվար լինի ուղղել գործընթացը, երբ աշնանը վերադառնանք այս օրենքին: Ասեք հստակ՝ ի՞նչ եք անում՚: Նաեւ նշեց, որ բյուջեից փոխանցումները շարունակվում են, ֆոնդերը գործում են, ինչը նշանակում է, որ պարտադիր բաղադրիչն ըստ էության գոյություն ունի, ինչին պետք է նորմալ բացատրություն տրվի:

«Այս լուծումը մեզ թույլ է տալու աշխատանքներում քննարկել մեր առաջիկա ներկայացվելիք փաթեթի շրջանակում այն բոլոր խնդիրները, որ կան: Բայց այս պահին չեմ կարող նշել, թե որոնք են այս կամ այն մոդելի առավելությունները կամ թերությունները»,- նշել է նախարար Արտեմ Ասատրյանը:

«Ժառանգություն» խմբակցության քարտուղար Թեւան Պողոսյանն էլ ԱԺ-ում հայտարարեց, թե ճիշտ չէ այն փիլիսոփայությունը, որ մարդ պետք է դիմում գրի եւ հրաժարվի մասնակցել պարտադիր կենսաթոշակային կուտակային համակարգին։ «Պետք է դիմում գրվի, որ ցանկանում են մասնակցել, այլ ոչ թե չմասնակցել։ Այս դեպքում ավելի քիչ դիմումներ կգրվեն եւ պրոցեսն ավելի մեղմ կանցնի»,- վստահեցրել է պատգամավորը եւ կոչ արել հոդվածի 3-րդ կետի փիլիսոփայությունը փոխել։ Ըստ նրա, նաեւ պետք է ձեւավորել աշխատանքային խումբ, պատժել մի քանի մեղավորների, որպեսզի ապագայում հավատ ունենանք։ Պետք է կատարվեն համակարգային փոփոխություններ, որպեսզի ոչ թե «Դեմ եմ» շարժումներ լինեն, այլ՝ «Հանուն»:

Continue reading →

Կալիֆորնիայի խորհրդարանի կողմից ԼՂՀ անկախությունը ճանաչելու մասին բանաձեւը

Ամերիկայի Միացյալ Նահանգների Կալիֆորնիա նահանգի խորհրդարանը մայիսի 8-ին պատմական քվեարկությամբ ճանաչել է Լեռնային Ղարաբաղի անկախությունը: ԼՂՀ արտգործնախարարությունը հրապարակել է բանաձեւի ոչ պաշտոնական թարգմանությունը:

Հաշվի առնելով, որ Լեռնային Ղարաբաղը, որը հայտնի է նաեւ Արցախ անվանմամբ, պատմականորեն հանդիսանում է հայկական տարածք՝ ճնշող մեծամասնությամբ բնակեցված հայերով, եւ որը 1921թ. անօրինական անջատվել է Հայաստանից Խորհրդային Միության կողմից եւ բռնակցվել նորաստեղծ Խորհրդային Ադրբեջանին, ինչպես նաեւ

Հաշվի առնելով, որ 1988թ. փետրվարի 20-ին Լեռնային Ղարաբաղում սկիզբ է դրվել ազգային-ազատագրական շարժմանը, որը ոգեշնչել է Խորհրդային Միության ժողովուրդներին՝ ընդդիմանալու բռնապետությանը եւ տեր կանգնելու սեփական իրավունքներին ու ազատություններին՝ նպաստելով ժողովրդավարության տարածմանը միլիոնավոր մարդկանց համար ու խաղաղության հաստատմանը ողջ աշխարհում, ինչպես նաեւ

Հաշվի առնելով, որ ԱՄՆ-ի Կոնգրեսը բազմիցս իր աջակցությունն է հայտնել Լեռնային Ղարաբաղի ժողովրդի ազատության օրինական ձգտումներին եւ 1991թ. սեպտեմբերի 2-ին Լեռնային Ղարաբաղի օրենսդրական մարմինը հռչակել է Լեռնային Ղարաբաղի Հանրապետությունը՝ այն ժամանակ գործող օրենսդրության համաձայն, ինչպես նաեւ

Հաշվի առնելով, որ 1991թ. դեկտեմբերի 10-ին Լեռնային Ղարաբաղի Հանրապետության ժողովուրդը քվեարկել է հօգուտ անկախության, ու 1992թ. հունվարի 6-ին ժողովրդավարական ճանապարհով ընտրված Լեռնային Ղարաբաղի Հանրապետության օրենսդիր մարմինը պաշտոնապես հայտարարել է անկախության մասին, ինչպես նաեւ

Հաշվի առնելով, որ անկախության հռչակումից ի վեր Լեռնային Ղարաբաղի Հանրապետությունը զգալի առաջընթաց է արձանագրել ժողովրդավարության կառուցման գործում, ինչը լավագույնս դրսեւորվել է վերջերս՝ 2012թ. հուլիսի 19-ի նախագահական ընտրությունների ժամանակ, որոնք միջազգային դիտորդների կողմից գնահատվել են որպես ազատ եւ թափանցիկ:

Կալիֆորնիա նահանգի Վեհաժողովը եւ Սենատը համատեղ որոշել են, որ Կալիֆորնիայի օրենսդիր մարմինը սույնով հավանություն է տալիս ու սատարում Լեռնային Ղարաբաղի Հանրապետության՝ ազատ եւ անկախ պետություն կառուցելու շարունակական ջանքերին՝ երաշխավորելու համար իր քաղաքացիների այն իրավունքները, որոնք բնորոշ են ազատ եւ անկախ հասարակությանը:

Այնուհետեւ որոշել են, որ Կալիֆորնիա նահանգի օրենսդիր մարմինը կոչ է անում ԱՄՆ Նախագահին եւ Կոնգրեսին սատարել Լեռնային Ղարաբաղի ինքնորոշման իրավունքին ու ժողովրդավար անկախությանը եւ նրա կառուցողական ներգրավմանը միջազգային հանրության ջանքերին՝ ուղղված ռազմավարական կարեւորություն ունեցող այդ տարածաշրջանում անվտանգության հարցերի արդար ու երկարատեւ լուծմանը:

Այնուհետեւ որոշել են, որ Վեհաժողովի Գլխավոր Քարտուղարը սույն Բանաձեւի պատճենը կփոխանցի Միացյալ Նահանգների նախագահին, Սենատում մեծամասնության ղեկավարին, Ներկայացուցիչների պալատի խոսնակին, Միացյալ Նահանգների Կոնգրեսում Կալիֆորնիայի պատվիրակության յուրաքանչյուր անդամին եւ Կալիֆորնիա նահանգի պետական քարտուղարին։

* * *

Արցախի անկախության ճանաչումը այլեւս հավակնում է դառնալ միջազգային օրակարգի հարց: Կալիֆորնիայի խորհրդարանը ձայների ջախջախիչ մեծամասնությամբ (70 կողմ եւ 1 ձեռնպահ ձայներով) ընդունել է Արցախի Հանրապետության անկախությունը ճանաչող պատմական բանաձեւ: Ամերիկահայերը եւ աշխարհասփյուռ շատ հայեր ողջունել են այդ խիզախ եւ հիմնարար քայլը եւ նշել, որ սա ամերիկահայության ու Կալիֆորնիայի քաղաքացիական հասարակության տքնաջան աշխատանքի արդյունք է: Առանձնակի շնորհակալություն են հայտնել խորհրդարանի անդամներ Մայք Կաթոյին, Աթրին Նազարյանին, Քաջո Աշաճյանին եւ խորհրդարանի նախագահ Ջոն Փերեզին, ովքեր ղեկավարել են այս դրական արդյունքին հասնելու աշխատանքները:

Խոսքը AJR 32 օրինագծի մասին է, որը մայիսի 5-ին հավանության էր արժանացել խորհրդարանի կանոնադրական հանձնաժողովի կողմից: Օրինագիծը կոչ է անում ԱՄՆ-ի նախագահին եւ Կոնգրեսին աջակցել ԼՂՀ ինքնորոշմանն ու ժողովրդավարական անկախության կայացմանը: Այս որոշումը պատմական է ԱՄՆ ամենամեծ նահանգի համար: Բանաձեւի ընդունումը հաղթանակ է նաեւ հայության համար, Արցախի բնակչության եւ ինքնորոշման պայքար տանող բոլոր ժողովուրդների համար, քանի որ Կալիֆորնիայի եւ Միացյալ Նահանգների խոշորագույն քաղաքներից Լոս Անջելեսի քաղաքային խորհուրդը 2014թ. սկզբին Լեռնային Ղարաբաղը ճանաչեց որպես անկախ ու ինքնիշխան պետություն: Իսկ 2013թ. աշնանը Արցախի անկախությունը ճանաչեց նույն նահանգի Հայլենդ քաղաքը, Կալիֆորնիան ԱՄՆ-ի 5-րդ նահանգն է, որ ճանաչեց Արցախի անկախությունը: Հիշեցնենք, որ ԼՂՀ անկախությունը ճանաչել են Լոս Անջելեսի քաղաքային խորհուրդը, Ավստրալիայի Նոր Հարավային Ուելսի նահանգի Օրենսդրական խորհուրդը, Կալիֆորնիայի Ֆրեզնո շրջանը, Մեյն նահանգի օրենսդիր մարմինը, ԱՄՆ Լուիզիանա նահանգը, ԱՄՆ Մասաչուսեթս նահանգի Ներկայացուցիչների պալատը եւ Ռոդ Այլենդ նահանգի Ներկայացուցիչների պալատը:

Continue reading →

Սկիզբը՝ թիվ 12-15-ում

Ցավոտ կետեր – «Made in Armenia»-ն կարո՞ղ է նախանձ շարժել – »Հայկական որակ»-ը իրապես լուրջ խոսք կարող է ասել… «թուրքական որակ»-ին մենք կարո՜ղ ենք հակադրել «հայկական որակ»-ը, եթե պետությունը բռնի մասնավորի ձեռքը…

Թուրքիան արդեն 9 տարի «Turk Quality» (թուրքական որակ) քաղաքականությունն է տանում ամբողջ աշխարհում:

Ի՞նչ է սա նշանակում: Նախ՝ ընդհանրապես ոլորտի արտահանումը Թուրքիայում 2011թ. կազմել է 7.9 մլրդ դոլար: Ներկայում ոլորտում գործում են շուրջ 7,500 արտադրողներ, որոնց գերակշիռ մասի արտադրությունն ունի արտահանման ուղղվածություն: Արտադրությունները հիմնականում զինված են ժամանակակից մեքենա-սարքավորումներով: Եթե մինչեւ 2000-ականները արտադրանքի գերակշիռ մասը ցածրարժեք տեքստիլ եւ տրիկոտաժե արտադրատեսակներն էին, ապա 2000-ականներից սկսած Թուրքիան շարունակաբար մեծացնում է համեմատաբար բարձր ավելացված արժեք ունեցող հագուստի արտահանումը Եվրոպա եւ այլ շուկաներ:

Այս 9 տարիներին ներգրավված եւ «թուրքական որակ» նշումը սեփական լոգոյի հետ օգտագործող տեղական բրենդերին պետությունը տրամադրում է պետական հավելյալ ֆինանսական օժանդակություն: Խոսքը 300-500 հազ դոլարի մասին է, որ իբրեւ օգնություն տրվում է, ասենք, ձեւավորման համար:

Երբ հայկական ժամագործության, ոսկեգործության ոլորտների զարգացման խնդիրներն էինք քննարկում, եզրակացությունը մեկն էր. մենք աշխարհին ծավալի առումով ասելիք չունենք, մեր խոսքը պետք է որակական լինի՝ բարձր գնային միջակայքում. ուրույն ձեռագրի համար վճարունակ սպառող աշխարհում միշտ էլ գտնվում է: Նաեւ՝ նորաձեւության միջազգային տարբեր փորձագետներ վկայում են, որ վճարունակ սպառողները պատրաստ են վճարել այն միակի, անկրկնելիի, նորույթի համար, իրավամբ՝ նորույթի, քանզի միջազգային համընդհանրացումը հոգնեցրել է բոլորին:

Դրա համար էլ աշխարհահռչակ շատ ընկերություններ հսկայածավալ գումարներ են ծախսում դիզայնի՝ նորույթի համար: Դա է գումար ապահովում:

Դրա համար էլ Թուրքիան արդեն տարիներ շարունակ տանում է «թուրքական որակ»-ի քաղաքականությունը:

Իմ դիտարկումներով՝ դեռ չի հաջողել, բայց չի նշանակում, որ չի հաջողի: Պարզապես դեռ էժան ու միջին գնային հատվածի «կարիքներն» է հոգում:

Զուգահեռաբար՝ «հայկական որակ»-ը լուրջ խոսք կարող է ասել: Ես դրանում բազմիցս համոզվել եմ ցուցահանդեսների ժամանակ, երբ մեր արտադրանքով հիացել են անգամ Հնդկաստանի ոլորտային ներկայացուցիչները: Այն Հնդկաստանի, որի ոլորտի արտադրությունը ներառող ԱՏԳ-ները յուրաքանչյուրն ունեն մի քանի հարյուր հա տարածք, հարկային ու մաքսային արտոնություններ, շատ մատչելի աշխատուժ, հսկայական միջոցներ, եւ որի ազատ տնտեսական գոտիներում բուն արտադրական ենթակառուցվածքներից զատ առկա է նաեւ օժանդակ ծառայությունների լայն տեսականի՝ hումքի մատակարարում, արտադրանքի վերամշակման, ֆինանսական, բեռնափոխադրման, ապահովագրական, աշխատուժի հավաքագրման ու վերապատրաստման եւ այլ ծառայություններ:

Այլ կերպ՝ ոլորտի զարգացման համար ստեղծված են բոլոր պայմանները:

Այո, մենք խնդիրներ ունենք, բազում խնդիրներ՝ տրանսպորտայինից, ֆինանսական միջոցներից սկսած, «հայկական որակ»-ը ճանաչեցնել տալուց վերջացրած, ամեն ինչի խնդիր՝ ձեւավորման, հումքի, պատվերների, արտապատվերների, սեփական մտահղացումների: Բայց խնդիրները լուծելի են, եթե կա նպատակը՝ արտադրելու, իրացնելու, միջազգային շուկայում հաստատվելու, սեփական խոսքն ասելու:

Հատկապես վերջինս է կարեւորվում, քանզի ծավալով մենք աշխարհին զարմացնել չենք կարող: Դա վաղուց ուրիշներն են անում:

Եվ իբրեւ ամփոփում մեր այս հոդվածաշարի:

Continue reading →